അഹമ്മദാബാദ്: ഇന്ത്യൻ പ്രീമിയർ ലീഗ് ക്രിക്കറ്റിന്റെ പതിനാറാമത് സീസണിന് ഇന്ന് അഹമ്മദാബാദിലെ നരേന്ദ്ര മോദി അന്താരാഷ്ട്ര സ്റ്റേഡിയത്തിൽ തുടക്കം. നിലവിലെ ചാമ്പ്യന്മാരായ ഗുജറാത്ത് ടൈറ്റൻസും ചെന്നൈ സൂപ്പർ കിംഗ്സും തമ്മിൽ രാത്രി 7.30നാണ് ഉദ്ഘാടന മത്സരം.
അഞ്ച് ടീമുകൾ അടങ്ങുന്ന രണ്ട് ഗ്രൂപ്പുകളിലായാണ് മത്സരങ്ങൾ. സ്വന്തം ഗ്രൂപ്പിലെ ടീമുകളുമായി ഓരോ മത്സരവും രണ്ടാം ഗ്രൂപ്പിലെ ടീമുകളുമായി രണ്ട് മത്സരങ്ങളും ഒരു ടീം കളിക്കണം. ഒരു ടീമിന് ആകെ 14 മത്സരങ്ങളാണ് ഉള്ളത്. പോയിന്റ് നിലയിൽ മുന്നിലെത്തുന്ന നാല് ടീമുകൾ പ്ലേ ഓഫിലേക്ക് യോഗ്യത നേടും.
ഒന്നാമതും രണ്ടാമതുമുള്ള ടീമുകൾ ഒന്നാം ക്വാളിഫയറിൽ ഏറ്റുമുട്ടും. ഇതിലെ വിജയികൾ നേരിട്ട് ഫൈനലിലെത്തും. മൂന്നും നാലും സ്ഥാനക്കാർ തമ്മിൽ എലിമിനേറ്ററിൽ ഏറ്റുമുട്ടും. ഇതിലെ വിജയികൾ ഒന്നാം ക്വാളിഫയറിൽ തോറ്റ ടീമുമായി രണ്ടാം ക്വാളിഫയർ കളിക്കും. ഇതിൽ വിജയിക്കുന്നവരായിരിക്കും ഫൈനലിലെ രണ്ടാം ടീം. മെയ് 28നാണ് ഫൈനൽ.
ടീമുകൾ
ഗ്രൂപ്പ് എ: ഡൽഹി ക്യാപ്പിറ്റൽസ്, കൊൽക്കത്ത നൈറ്റ് റൈഡേഴ്സ്, ലഖ്നൗ സൂപ്പർ ജയന്റ്സ്, മുംബൈ ഇന്ത്യൻസ്, രാജസ്ഥാൻ റോയൽസ്
ഗ്രൂപ്പ് ബി: ചെന്നൈ സൂപ്പർ കിംഗ്സ്, ഗുജറാത്ത് ടൈറ്റൻസ്, പഞ്ചാബ് കിംഗ്സ്, റോയൽ ചലഞ്ചേഴ്സ് ബാംഗ്ലൂർ, സൺറൈസേഴ്സ് ഹൈദരാബാദ്
