പോലീസിനോടാ കളി, കള്ളനെ പിടിക്കാന്‍ രോഗിയായും എത്തും; ദന്തല്‍ ക്ലിനിക്കിലെത്തിയ കള്ളന്മാരെ കയ്യോടെ പിടിച്ച് ‘രോഗി’

വളരെ അപ്രതീക്ഷിതമായാണ് ബ്രസീലിലെ ഒരു ദന്തല്‍ ക്ലിനിക്കിലേക്ക് ആയുധധാരികളായ കുറച്ചുപേര്‍ അതിക്രമിച്ചെത്തിയത്. അപ്പോള്‍ ഒരു രോഗിയെ പരിശോധിച്ചുകൊണ്ടിരിക്കുകയായിരുന്നു ഡോക്ടര്‍. സാധാരണഗതിയില്‍ ഡോക്ടറും രോഗിയും ഇതുകണ്ട് എന്തുചെയ്യണമെന്ന് അറിയാതെ ഞെട്ടേണ്ടതാണ്. പക്ഷേ ഇവിടെ ഞെട്ടിയത് അതിക്രമിച്ചെത്തിയ കള്ളന്മാരാണ്. അവര്‍ ഒട്ടും പ്രതീക്ഷിക്കാത്ത ചില സംഗതികളാണ് പിന്നീട് അവിടെ അരങ്ങേറിയത്.

പ്ലാന്‍ ചെയ്തത് പോലെ ഗംഭീരമായ രംഗപ്രവേശനമൊക്കെ കള്ളന്മാര്‍ നടത്തിയെങ്കിലും പിന്നീടവരുടെ ആസൂത്രണങ്ങളൊക്കെ പാളിപ്പോയി. അവര്‍ക്കെന്തെങ്കിലും ചെയ്യാന്‍ കഴിയുന്നതിന് മുമ്പ് രോഗി അവരെ കീഴ്‌പ്പെടുത്തിയിരുന്നു. അന്ന് അവധിയെടുത്ത് ഡോക്ടറെ കാണാനെത്തിയ ഒരു പോലീസുകാരനായിരുന്നു ആ രോഗി. എന്തായാലും സിനിമസ്‌റ്റെലില്‍ ഉള്ള സംഘട്ടനത്തിന്റെ പഴയ വീഡിയോ ഇപ്പോള്‍ വീണ്ടും വൈറലായിരിക്കുകയാണ്. ക്ലിനിക്കിലെ സിസിടിവി ക്യാമറയില്‍ പതിഞ്ഞ വീഡിയോയാണ് ഇപ്പോള്‍ സോഷ്യല്‍ മീഡിയയില്‍ പ്രചരിക്കുന്നത്.

They tried to rob this office but the patient became a hero!pic.twitter.com/guoqRCPLTQ

— The Figen (@TheFigen_) April 13, 2023

ഒരു വനിത ഡോക്ടര്‍ രോഗിയെ പരിശോധിക്കുന്നതും കള്ളന്മാര്‍ അതിക്രമിച്ചെത്തുന്നതും എല്ലാം വീഡിയോയില്‍ കാണാം. അകത്തെത്തിയ കള്ളന്മാര്‍ അവിടെയുള്ള ജീവനക്കാരെ കത്തി കാണിച്ച് പേടിപ്പിക്കുകയും ഡോക്ടറോടും ജീവനക്കാരോടും ഭിത്തിക്ക് അഭിമുഖമായി നില്‍ക്കാനും ആവശ്യപ്പെടുന്നു. രോഗിയോട് നിലത്തേക്ക് ഇറങ്ങാനും ഇവര്‍ നിര്‍ദ്ദേശിക്കുന്നുണ്ട്. കൗമാരപ്രായക്കാരായ കള്ളന്മാരില്‍ ഒരാളുടെ രോഗിയുടെ കീശ പരിശോധിക്കുകയും കീശയില്‍ നിന്ന് തോക്ക് പുറത്തെടുക്കാന്‍ ശ്രമിക്കുകയും ചെയ്യുന്നതിനിടെ ഒരു മേശ മറിഞ്ഞുവീണു. ആ തക്കത്തിന് പോലീസ് അയാളെ കീഴ്‌പ്പെടുത്തുകയായിരുന്നു.

എന്തായാലും പോലീസുകാരന്റെ ധീരതയെ പുകഴ്ത്തി നിരവധിപേരാണ് വീഡിയോയ്ക്ക് കമന്റുകള്‍ ഇട്ടിരിക്കുന്നത്.