വോട്ടർ പട്ടിക പരിഷ്കരണത്തെക്കുറിച്ചും വോട്ട് തിരിമറി ആരോപണങ്ങളെക്കുറിച്ചും പരസ്യ സംവാദത്തിന് ധൈര്യമുണ്ടെങ്കിൽ പാർലമെന്റിലേക്ക് വരാൻ ലോകസഭയിലെ പ്രതിപക്ഷ നേതാവ് രാഹുൽ ഗാന്ധിയെ വെല്ലുവിളിച്ച് കേന്ദ്ര ആഭ്യന്തരമന്ത്രി അമിത് ഷാ. ഹരിയാനയിലെ കർണാലിൽ ബി.ജെ.പി സംഘടിപ്പിച്ച പദയാത്രയിലും റാലിയിലും സംസാരിക്കവെയാണ് അമിത് ഷാ രാഹുൽ ഗാന്ധിക്കെതിരെ കടുത്ത ഭാഷയിൽ വിമർശനമുന്നയിച്ചത്. ഉന്നയിക്കുന്ന ആരോപണങ്ങളിൽ സത്യവും യുക്തിയുമുണ്ടെങ്കിൽ തെരുവുകളിൽ ബഹളമുണ്ടാക്കാതെ പാർലമെന്റിനുള്ളിൽ വന്ന് ചോദ്യങ്ങൾ ചോദിക്കാൻ അദ്ദേഹം രാഹുലിനോട് ആവശ്യപ്പെട്ടു.
ഹരിയാനയിലെ കർണാലിൽ ബിജെപി സംഘടിപ്പിച്ച ‘ലോക്തന്ത്ര ബചാവോ, അരാജകതാ ഹഠാവോ’ പദയാത്രയെ അഭിസംബോധന ചെയ്യുകയായിരുന്നു അദ്ദേഹം. ആരോപണങ്ങളിൽ സത്യമുണ്ടെന്നും ചർച്ചയ്ക്ക് ആവശ്യമായ തെളിവുകളും യുക്തിയും ഉണ്ടെന്നും രാഹുൽ ഗാന്ധിക്ക് വിശ്വാസമുണ്ടെങ്കിൽ പാർലമെന്റിൽ എത്തി നേരിട്ട് സംവദിക്കാമെന്ന് അമിത് ഷാ പറഞ്ഞു. പ്രധാനമന്ത്രി നരേന്ദ്ര മോദിക്ക് കത്തയച്ച് ഔദ്യോഗികമായി ആവശ്യപ്പെട്ടാൽ പ്രത്യേക പാർലമെന്റ് സമ്മേളനം വിളിക്കാൻ സർക്കാർ തയ്യാറാണെന്നും അദ്ദേഹം വ്യക്തമാക്കി. എന്നാൽ, രാഹുൽ ഗാന്ധിക്ക് ചോദ്യങ്ങൾക്കുള്ള മറുപടി നേരിടാൻ കഴിയില്ലെന്നും ചർച്ചയിൽ നിന്ന് അദ്ദേഹം പിന്മാറുമെന്നും അമിത് ഷാ പരിഹസിച്ചു.
പാർലമെന്റിന്റെ പ്രവർത്തനം തടസ്സപ്പെടുത്തുകയും ചർച്ചകൾ ഒഴിവാക്കുകയും ചെയ്യുന്നത് കോൺഗ്രസിന്റെ രാഷ്ട്രീയ സംസ്കാരമായി മാറിയെന്ന് അമിത് ഷാ ആരോപിച്ചു. ഇവിഎമ്മുകൾ, എസ്‌ഐആർ, വോട്ടർ പട്ടികയിലെ അനധികൃത പേരുകൾ എന്നിവയെക്കുറിച്ച് പ്രതിപക്ഷം നിരന്തരം ആരോപണങ്ങൾ ഉന്നയിക്കുന്നുണ്ടെങ്കിലും പാർലമെന്റിൽ ചർച്ചയ്ക്ക് തയ്യാറാകുന്നില്ലെന്നാണ് അദ്ദേഹത്തിന്റെ വാദം. തിരഞ്ഞെടുപ്പ് പട്ടികയിൽ നിന്ന് അർഹതയില്ലാത്തവരെയും അനധികൃത കുടിയേറ്റക്കാരെയും നീക്കം ചെയ്യുന്നതിനാണ് എസ്‌ഐആർ നടപടിയെന്നും ഷാ വ്യക്തമാക്കി.
