കൊച്ചി: കോൺഗ്രസ് എന്ന പാർട്ടി സംഘടനാപരമായി എത്ര ദുർബ്ബലമാണെന്നതിന്റെ തെളിവാണ് കേരളത്തിന്റെ തലസ്ഥാനം കൊച്ചിയിലേക്ക് മാറ്റണമെന്ന ഹൈബി ഈഡന്റെ ആവശ്യമെന്ന് മന്ത്രി മുഹമ്മദ് റിയാസ്. മാദ്ധ്യമങ്ങളോട് ഇതുമായി ബന്ധപ്പെട്ട് പ്രതികരിക്കുകയായിരുന്നു മുഹമ്മദ് റിയാസ്.
ഹൈബി ഈഡൻ എന്നതല്ല പ്രശ്‌നം കോൺഗ്രസിൽ ജനപ്രതിനിധികളായി വിജയിക്കുന്നവർക്ക് അവരുടെ ഇഷ്ടത്തിന് അനുസരിച്ച് എന്ത് നിലപാടും സ്വീകരിക്കാനാകും എന്നതിന്റെ ഉദാഹരണമാണിത്. അപ്പോൾ സംഘടന എന്ന നിലയിൽ കോൺഗ്രസ് എത്രത്തോളം ദുർബ്ബലമാകുമെന്നാണ് ചിന്തിക്കേണ്ടതെന്നും മുഹമ്മദ് റിയാസ് പറഞ്ഞു.
കേരളത്തിൽ കോൺഗ്രസ് ചിഹ്നത്തിൽ മത്സരിച്ച് വിജയിക്കുന്നവർക്ക് എന്ത് നിലപാടും സ്വീകരിക്കാമെന്നതിന്റെ ഉദാഹരണമാണിതെന്നും റിയാസ് കൂട്ടിച്ചേർത്തു. വിഷയവുമായി ബന്ധപ്പെട്ട മറ്റ് കാര്യങ്ങളിൽ സർക്കാർ നിലപാട് എടുത്തിട്ടുണ്ടെന്നും പാർട്ടി സെക്രട്ടറിയും അതിൽ വിശദീകരണം നൽകിയിട്ടുണ്ടെന്നും റിയാസ് കൂട്ടിച്ചേർത്തു.
തലസ്ഥാനം തിരുവനന്തപുരത്തായതിനാൽ വടക്കൻ കേരളത്തിൽ നിന്നുളളവർക്കും മദ്ധ്യകേരളത്തിലുളളവർക്കും ഓരോ കാര്യങ്ങൾക്ക് എത്തിപ്പെടാൻ ബുദ്ധിമുട്ടാണെന്നും അതുകൊണ്ട് കൊച്ചിയിലേക്ക് തലസ്ഥാനം മാറ്റണമെന്നും ആവശ്യപ്പെട്ട് പാർലമെന്റിൽ ഹൈബി സ്വകാര്യ ബില്ലിന് അനുമതി തേടിയിരുന്നു. എന്നാൽ ഇത് പ്രായോഗികമല്ലെന്ന നിലപാടാണ് സംസ്ഥാന സർക്കാർ സ്വീകരിച്ചത്.
