പത്തനംതിട്ട: ഗവിയിലേക്കുള്ള യാത്രയ്ക്ക് നിരോധനം ഏർപ്പെടുത്തി പത്തനംതിട്ട ജില്ലാ കളക്ടർ. ശക്തമായ മഴയുടെ പശ്ചാത്തലത്തിലാണ് യാത്രയ്ക്ക് നിരോധനം ഏർപ്പെടുത്തിയത്. ഇനി ഒരു അറിയിപ്പ് ഉണ്ടാകുന്നതുവരെ ഗവിയിലേക്ക് യാത്ര പാടില്ലെന്നാണ് അറിയിപ്പ്.
നിലവിൽ ജില്ലയിലെ മലയോരമേഖലകളിൽ ശക്തമായ മഴയാണ് അനുഭവപ്പെടുന്നത്. ഇന്നലെ വൈകുന്നേരം മുതൽ ആരംഭിച്ച മഴ രാത്രിയും തുടരുകയായിരുന്നു. ഇതേ തുടർന്ന് ഗവിയിലേക്കുള്ള പാതയിൽ പലയിടത്തും മണ്ണിടിച്ചിൽ ഉണ്ടായി. ഇതേ തുടർന്നായിരുന്നു അപകട സാദ്ധ്യത കണക്കിലെടുത്ത് യാത്രയ്ക്ക് നിരോധനം ഏർപ്പെടുത്തിയത്.
അതേസമയം ശക്തമായ മഴ തുടരുന്നതിനാൽ പുഴകളിലും മറ്റ് ജലാശയങ്ങളിലും ജലനിരപ്പ് ഉയർന്നു. രാത്രി ഉരുൾപൊട്ടൽ ഉണ്ടായതോടെ മണിയാർ, മൂഴിയാർ ഡാമുകൾ തുറന്നുവിട്ടിരുന്നു. ജില്ലയിൽ ഇന്നും മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രം നൽകുന്ന വിവരം. ഈ സാഹചര്യത്തിൽ ജാഗ്രത പാലിക്കണമെന്ന് കളക്ടർ അറിയിച്ചിട്ടുണ്ട്.












