കോഴിക്കോട് : താമരശ്ശേരി ചുരത്തിൽ ഗതാഗത നിയന്ത്രണം ഏർപ്പെടുത്തി ജില്ലാ ഭരണകൂടം. അവധി ദിനങ്ങളിലാണ് ഗതാഗത നിയന്ത്രണം ഉള്ളത്. തിരക്കേറിയ ദിവസങ്ങളിൽ പതിവായി ഉണ്ടാകുന്ന ഗതാഗതക്കുരുക്ക് ഒഴിവാക്കാനാണ് പുതിയ തീരുമാനം. ഇനിമുതൽ അവധി ദിനങ്ങളിൽ താമരശ്ശേരി ചുരത്തിൽ വൈകിട്ട് മൂന്നു മുതൽ രാത്രി 9 വരെ ചരക്ക് വാഹനങ്ങൾക്ക് വിലക്ക് ഏർപ്പെടുത്തിയിട്ടുണ്ട്.
നവരാത്രി അവധി ദിനങ്ങളിൽ വലിയ ഗതാഗതക്കുരുക്ക് ആയിരുന്നു താമരശ്ശേരി ചുരത്തിൽ ഉണ്ടായിരുന്നത്. ഇതോടെയാണ് അവധി ദിനങ്ങളിൽ ഗതാഗത നിയന്ത്രണം ഏർപ്പെടുത്താൻ ജില്ലാ ഭരണകൂടം തീരുമാനിക്കുന്നത്. ആറു ചക്രത്തില്‍ കൂടുതലുള്ള ടിപ്പര്‍ ലോറികള്‍, പത്ത് ചക്രത്തില്‍ കൂടുതലുള്ള ചരക്ക് വാഹനങ്ങള്‍ എന്നിവ ഉള്‍പ്പെടെയുള്ള വലിയ വാഹനങ്ങള്‍ക്കാണ് അവധി ദിനങ്ങളില്‍ വൈകിട്ട് മൂന്ന് മുതല്‍ രാത്രി ഒമ്പതുവരെ വിലക്ക് ഏര്‍പ്പെടുത്തിയിരിക്കുന്നത്.
കോഴിക്കോട് ജില്ലാ കളക്ടർ ആണ് ഗതാഗത നിയന്ത്രണം സംബന്ധിച്ച ഉത്തരവ് പുറത്തിറക്കിയത്. താമരശ്ശേരി ചുരത്തിൽ വാഹനങ്ങൾ പാർക്ക് ചെയ്യുന്നതിനും വിലക്ക് ഏർപ്പെടുത്തിയിട്ടുണ്ട്. അനധികൃതമായി വാഹനങ്ങൾ പാർക്ക് ചെയ്താൽ അവരിൽ നിന്നും പിഴ ഈടാക്കുമെന്നും കളക്ടറുടെ ഉത്തരവിൽ പറയുന്നു. എന്നാൽ മുൻപും ഇത്തരത്തിൽ പലപ്പോഴും നിയന്ത്രണങ്ങൾ ഏർപ്പെടുത്തിയിട്ടുണ്ടെങ്കിലും അവയൊന്നും നടപ്പാക്കപ്പെട്ടിട്ടില്ല എന്നാണ് നാട്ടുകാരുടെ പരാതി.
