തിരുവനന്തപുരം: നെടുമങ്ങാട് ഇരിഞ്ചയത്ത് ടൂറിസ്റ്റ് ബസ് മറി‌ഞ്ഞുണ്ടായ അപകടത്തില്‍ ഡ്രൈവറെ കസ്റ്റഡിയിലെടുത്ത് പൊലീസ്. ഒറ്റശേഖരമംഗലം സ്വദേശി അരുൾ ദാസ് ആണ് കസ്റ്റഡിയിലുള്ളത്. അപകട ശേഷം സംഭവ സ്ഥലത്ത് നിന്നും ഇയാൾ ഓടിരക്ഷപ്പെടുകയായിരുന്നു. കാട്ടാക്കടയിലെ സ്വകാര്യ ആശുപത്രിയിൽ ചികിത്സ തേടിയ ശേഷം സുഹൃത്തിന്റെ വീട്ടിൽ അഭയം തേടുകയായിരുന്നു. തുടർന്ന് വിവരമറിഞ്ഞ നെടുമങ്ങാട് പൊലീസ് ഡ്രൈവറെ കസ്റ്റഡിയിൽ എടുത്തത്.
. ഇന്നലെ രാത്രി 10.15 ഓടെ നെടുമങ്ങാട്- വെമ്പായം റോഡിൽ ഇരിഞ്ചയം വളവിലാണ് സംഭവം. ഒരു മരണം. കാവല്ലൂർ സ്വദേശി ദാസിനിയാണ് (63) മരിച്ചത്. കുട്ടികളും മുതിർന്നവരും ഉൾപ്പെടെ നിരവധിപ്പേർക്ക് പരിക്കേറ്റിട്ടുണ്ട് എന്നാണ് ഇപ്പോൾ ലഭ്യമായ വിവരം. ഏതാണ്ട് 49 ഓളം പേരാണ് വാഹനത്തിൽ ഉണ്ടായിരുന്നത് .
അപകടത്തിൽ പരിക്കേറ്റ 25 പേരെ തിരുവനന്തപുരം മെഡിക്കൽ കോളേജ് ആശുപത്രിയിലും പത്തു കുട്ടികളെ എസ്.എ.ടി ആശുപത്രിയിലും ഏഴു പേരെ നെടുമങ്ങാട് ജില്ലാ ആശുപത്രിയിലും പ്രവേശിപ്പിച്ചിട്ടുണ്ട് . ദാസിനി സംഭവസ്ഥലത്ത് തന്നെ മരണപ്പെടുകയായിരുന്നു . പരിക്കേറ്റവരിൽ ചിലരുടെ നില ഗുരുതരമാണെന്നാണ് റിപ്പോ‌ർട്ട്.
അതേസമയം ബസ് അമിതവേഗതയിൽ ആയിരിക്കിന്നുവെന്നാണ് ദൃക്‌സാക്ഷികൾ പറയുന്നത്. പെരുങ്കടവിളയിൽ നിന്ന് മൂന്നാറിലേക്ക് പോവുകയായിരുന്നു ബസ്. എതിർ ദിശയിൽ വന്ന വാഹനത്തിന് സൈഡ് കൊടുക്കുന്നതിനിടെ നിയന്ത്രണം തെറ്റി മറിയുകയായിരുന്നു.
