കോട്ടയത്തു നടക്കുന്ന സിഐടിയു സംസ്ഥാന സമ്മേളനത്തിൽ മുൻ എൽഡിഎഫ് സർക്കാരിനും മുൻ തൊഴിൽ വകുപ്പ് മന്ത്രി വി. ശിവൻകുട്ടിക്കുമെതിരെ പ്രതിനിധികളുടെ ഭാഗത്തുനിന്ന് രൂക്ഷവിമർശനം. എൽഡിഎഫ് സർക്കാരിന്റെ ജനവിരുദ്ധവും തൊഴിലാളി വിരുദ്ധവുമായ നടപടികൾ പരമ്പരാഗത തൊഴിലാളി വർഗ്ഗത്തെ പാർട്ടിയുമായി അകറ്റിയെന്നും, തെരഞ്ഞെടുപ്പിലെ കനത്ത തോൽവിക്കും ഭരണനഷ്ടത്തിനും പ്രധാന കാരണം ഇതാണെന്നും സമ്മേളനത്തിലെ പ്രവർത്തന റിപ്പോർട്ടിന്മേലുള്ള ചർച്ചയിൽ പ്രതിനിധികൾ തുറന്നടിച്ചു.
കഴിഞ്ഞ എൽഡിഎഫ് ഭരണകാലത്ത് തൊഴിൽ വകുപ്പ് കൈകാര്യം ചെയ്ത മുൻ മന്ത്രി വി. ശിവൻകുട്ടി തൊഴിലാളികളുടെ അവകാശങ്ങൾ സംരക്ഷിക്കുന്നതിലോ ആനുകൂല്യങ്ങൾ ലഭ്യമാക്കുന്നതിലോ പൂർണ്ണ പരാജയമായിരുന്നുവെന്ന് ചർച്ചയിൽ കുറ്റപ്പെടുത്തലുയർന്നു. വകുപ്പുമന്ത്രി എന്ന നിലയിൽ തൊഴിലാളികൾക്കായി ഒന്നും ചെയ്യാൻ ശിവൻകുട്ടിക്ക് കഴിഞ്ഞില്ല. തൊഴിൽ ക്ഷേമ ബോർഡുകൾ വഴി തൊഴിലാളികൾക്ക് ലഭിക്കേണ്ട പെൻഷൻ ഉൾപ്പെടെയുള്ള ആനുകൂല്യങ്ങൾ മാസങ്ങളോളം കുടിശ്ശികയായി കിടന്നിട്ടും അത് നൽകാൻ സർക്കാർ തയ്യാറായില്ല. ഇത് സാധാരണക്കാരായ തൊഴിലാളികൾക്കിടയിൽ കടുത്ത അമർഷത്തിന് കാരണമായി.
കൂടാതെ, സർക്കാരിന്റെ പ്രായോഗികമല്ലാത്ത പുതിയ മദ്യനയം ചെത്തുതൊഴിലാളി മേഖലയെ തകിടം മറിച്ചെന്നും ഈ മേഖലയിലുള്ളവരെ ഇടതുപക്ഷ രാഷ്ട്രീയത്തിൽ നിന്നും പാർട്ടിയുടെ അടിത്തറയിൽ നിന്നും പൂർണ്ണമായി അകറ്റാൻ ഇത് ഇടയാക്കിയെന്നും വിമർശനമുയർന്നു. മുൻ മുഖ്യമന്ത്രി പിണറായി വിജയനും സർക്കാരിന്റെ നയങ്ങൾക്കുമെതിരെ സമ്മേളനത്തിൽ കടുത്ത പ്രതിഷേധമാണ് ഉയർന്നത്. തൊഴിലാളിപക്ഷ നയങ്ങളിൽ നിന്ന് സർക്കാർ വ്യതിചലിച്ചതാണ് ജനവിധിയിൽ പ്രതിഫലിച്ചതെന്ന ആത്മപരിശോധന വേണമെന്നും സമ്മേളനത്തിൽ പ്രതിനിധികൾ ആവശ്യപ്പെട്ടു.
