സിപിഎം ലോക്കൽ കമ്മിറ്റി ഓഫീസിനുള്ളിൽ പരസ്യമായി മദ്യപിച്ച സംഭവത്തിൽ ലോക്കൽ സെക്രട്ടറി ഉൾപ്പെടെ മൂന്ന് നേതാക്കൾക്കെതിരെ സസ്പെൻഷൻ നടപടിയുമായി സിപിഎം ജില്ലാ നേതൃത്വം. മുതലമട ഒന്ന് ലോക്കൽ സെക്രട്ടറി ബ്രിജേഷ്, പാർട്ടി പ്രവർത്തകരായ സൂര്യപ്രകാശ്, റഷീദ് എന്നിവരെയാണ് അന്വേഷണവിധേയമായി സസ്പെൻഡ് ചെയ്തത്. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയും വിവാദമാവുകയും ചെയ്തതിന് പിന്നാലെയാണ് സിപിഐഎം പാലക്കാട് ജില്ലാ സെക്രട്ടറി ഇ.എൻ. ചെന്താമരാക്ഷന്റെ അടിയന്തര നടപടി.
മുതലമടയിലെ പാർട്ടി ഓഫീസിനുള്ളിൽ ലോക്കൽ സെക്രട്ടറി ബ്രിജേഷിന്റെ നേതൃത്വത്തിൽ നേതാക്കൾ മദ്യപിക്കുന്നത് ശ്രദ്ധയിൽപ്പെട്ടതോടെ കൊല്ലങ്കോട് ഏരിയാ കമ്മിറ്റി അംഗം കെ. സിയാവുദ്ദീൻ, ലോക്കൽ കമ്മിറ്റി അംഗം കെ. വിനേഷ് എന്നിവരുൾപ്പെടെയുള്ള പ്രവർത്തകർ ഇത് ചോദ്യം ചെയ്യുകയായിരുന്നു. എന്നാൽ ചോദ്യം ചെയ്ത പ്രവർത്തകരെ ലോക്കൽ സെക്രട്ടറി തടഞ്ഞുനിർത്തുകയും കയ്യേറ്റം ചെയ്യുകയും ഉന്തിത്തള്ളുകയും ചെയ്തു.
തുടർന്ന് പ്രവർത്തകർ തന്നെ മദ്യപാനത്തിന്റെയും വാക്കേറ്റത്തിന്റെയും ദൃശ്യങ്ങൾ മൊബൈലിൽ പകർത്തി ജില്ലാ നേതൃത്വത്തിന് പരാതി നൽകുകയായിരുന്നു. ദൃശ്യങ്ങൾ പുറത്തുവന്നതോടെ പാർട്ടിക്ക് കടുത്ത അവമതിപ്പ് ഉണ്ടാക്കിയെന്ന് വിലയിരുത്തിയാണ് നടപടി. പാർട്ടി ഓഫീസുകൾ ദുരുപയോഗം ചെയ്യുന്നതും അച്ചടക്കലംഘനങ്ങളും വെച്ചുപൊറുപ്പിക്കില്ലെന്ന മുന്നറിയിപ്പോടെയാണ് മൂന്ന് പേരെയും പ്രാഥമിക അംഗത്വത്തിൽ നിന്ന് സസ്പെൻഡ് ചെയ്തിരിക്കുന്നത്.
