കൂത്താട്ടുകുളം: അവിശ്വാസ പ്രമേയത്തിൽ എതിർത്ത് വോട്ട് ചെയ്യുമെന്ന ഭയത്താൽ നഗരസഭയിലെ വനിതാ കൗൺസിലറായ കലാ രാജുവിനെ തട്ടിക്കൊണ്ടുപോയ സംഭവത്തിൽ നാല് സിപിഎം പ്രവർത്തകർ പിടിയിൽ. ചെള്ളയ്ക്കപ്പടി ബ്രാഞ്ച് സെക്രട്ടറി അരുൺ.വി.മോഹൻ (40), കൂത്താട്ടുകുളം ടൗൺ ബ്രാഞ്ച് അംഗം ടോണി ബോബി (34), ചെള്ളയ്ക്കപ്പടി ബ്രാഞ്ച് അംഗം റിൻസ് വർഗീസ് (42), പൈറ്റക്കുളം ബ്രാഞ്ച് അംഗം സജിത്ത് എബ്രഹാം (40), എന്നിവരാണ് പിടിയിലായത്. കൂടുതൽ സി പി എം അംഗങ്ങൾ അറസ്റ്റിലാകുമെന്നാണ് ലഭ്യമായ വിവരം.
സംഭവത്തിൽ സിപിഎം കൂത്താട്ടുകുളം ഏരിയ സെക്രട്ടറിയും നഗരസഭ ചെയർപേഴ്സനുമടക്കം 45 പേർക്കെതിരെയാണ് കേസെടുത്തിരിക്കുന്നത്. നഗരസഭ വൈസ് ചെയർമാൻ, പാർട്ടി ലോക്കൽ സെക്രട്ടറി എന്നിവരും പ്രതികളാണ്. കലാ രാജുവിന്റെ മക്കൾ നൽകിയ പരാതിയിലാണ് കേസ്.
അതേസമയം നിഷ്ടൂരമായ ആക്രമണമാണ് കലാ രാജു നേരിട്ടത് എന്നാണ് പുറത്ത് വരുന്ന വിവരം. തട്ടിക്കൊണ്ടു പോകലിന്റെ ഭാഗമായി കൗൺസിലറെ വാഹനത്തിലേക്ക് വലിച്ചെറിയുകയായിരുന്നു. പൊതുജനമധ്യത്തിലാണ് ഈ സംഭവങ്ങൾ നടന്നത്. കാറിന്റെ ഡോറിനിടയിൽ കുരുങ്ങിയ കാല് എടുക്കാൻ കഴിഞ്ഞില്ല. വേദനകൊണ്ട് പുളഞ്ഞപ്പോഴും ഡോർ തുറന്ന് കാലെടുക്കാൻ അനുവദിച്ചില്ല. കാല് വെട്ടിക്കളയുമെന്ന ഭീഷണിയും ഇവരുടെ ഭാഗത്ത് നിന്നും ഉണ്ടായതായി കലാ രാജു ആരോപിച്ചു.
