മലയാളികൾക്ക് അഭിമാനമായി ജോബി മാത്യൂ. ഖേലോ ഇന്ത്യ പാരാ പവർലിഫ്റ്റിങ്ങിൽ സ്വർണ്ണ മെഡൽ നേടിയാണ് ജോബി മാത്യു കേരളത്തിന്റെ താരമായി മാറിയിരിക്കുന്നത്. 65 കിലോ വിഭാഗത്തിൽ 148 കിലോ ഭാരം ഉയർത്തിയാണ് ജോബി സ്വർണ മേഡൽ കരസ്ഥമാക്കിയിരിക്കുന്നത്.
ലോക പഞ്ചഗുസ്തി ചാമ്പ്യൻഷിപ്പിൽ വികലാംഗവിഭാഗം ചാമ്പ്യനാണ് ജോബി മാത്യു. ഒൻപത് കായിക ഇനങ്ങളിൽ ഇദ്ദേഹം വിവിധ ഇടങ്ങളിലായി മത്സരിച്ചിട്ടുണ്ട്. 110 സെന്റീമീറ്ററാണ് ജോബിയുടെ ഉയരം. പഞ്ചഗുസ്തി കൂടാതെ ഷോട്ട്പുട്ട്, ജാവലിൻത്രോ, ഡിസ്‌കസ് ത്രോ, ബാഡ്മിന്റൻ, നീതൽ, പവർലിഫ്റ്റിങ് തുടങ്ങിയ മത്സരങ്ങളിലും പങ്കെടുത്തിട്ടുണ്ട്. അമേരിക്കയിലെ മിഷിഗണിൽ നടന്ന വേൾഡ് ഡ്വാർഫ് ഗെയിംസിൽ രണ്ടു സ്വർണ്ണവും ഒരു വെള്ളിയും ജോബി നേടിയിട്ടുണ്ട്.
പാലാ അടുക്കം സ്വദേശിയായ ജോബി ഇപ്പോൾ ഇരുമ്പനം ഭാരത് പെട്രോളിയം കമ്പനിയിൽ ജോലി ചെയ്യുന്നു. ആലുവയ്ക്കടുത്ത് തോട്ടയ്ക്കാട്ടുകരയിലാണ് താമസിക്കുന്നത്. മേഘയാണ് ഭാര്യ. ജ്യോതിസ് ഏക മകൻ.
ഖേലോ ഇന്ത്യ പാരാ ഗെയിംസിനു മാർച്ച് 21 നാണ് ഡൽഹിയിൽ തുടക്കമായത്. കേന്ദ്രമന്ത്രി മൻസുഖ് മാണ്ഡവ്യയാണ് ഉദ്ഘാടനം ചെയ്തത്. വിവിധ സംസ്ഥാനങ്ങളിൽ നിന്നുള്ള 1300 ലേറെ പാരാ അത്ലീറ്റുകളാണ് 27 വരെ നടക്കുന്ന ഗെയിംസിൽ ഭാഗമാകുക.
ആഗോള തലത്തിൽ കരുത്തുറ്റ കായിക രാഷ്ട്രമാവുകയെന്ന ഇന്ത്യയുടെ ലക്ഷ്യത്തിന് അടിത്തറ പാകുന്ന പദ്ധതിയാണ് ഖേലോ ഇന്ത്യ. 2018 ൽ ആരംഭിച്ച ഖേലോ ഇന്ത്യ സ്‌കൂൾ ഗെയിംസ് രാജ്യത്തു വലിയ കായിക മുന്നേറ്റമാണു സൃഷ്ടിച്ചത്. ഗെയിംസിന്റെ 16 പതിപ്പുകളിലായി ഒട്ടേറെ കായികതാരങ്ങളെ സൃഷ്ടിക്കാൻ കഴിഞ്ഞിട്ടുണ്ട്.
