എത്ര ഇഷ്ടമല്ലെന്ന് പറഞ്ഞാലും ജീവിതത്തിൽ ഒരിക്കലെങ്കിലും സാരിയുടുത്ത് നോക്കാത്ത പെൺകുട്ടികൾ കുറവായിരിക്കും. ചെറുപ്പത്തിൽ അമ്മയും കുട്ടിയും കളിക്കുമ്പോൾ ചുരിദാർ ഷാൾ ഉപയോഗിച്ച് സാരി ചുറഅറിയ ബാല്യം പലർക്കുമുണ്ടാവും. വലുതാകുമ്പോൾ സ്‌കൂളിലെയോ കോളേജിലെയോ ഓണപരിപാടിക്കോ നാട്ടിലെ ഉത്സവത്തിനോ ഫെയർവെല്ലിനോ സാരിയുടുക്കും.
ഫാഷൻ പ്രേമികളുടെ വാഡ്രോബിൽ എന്തായാലും ഒരു സാരിയെങ്കിലും കാണും.
ഇപ്പോഴിതാ സാരി യൂത്തിനിടയിലും ട്രെൻഡാവുകയാണത്രേ. സാരിക്കായി അന്താരാഷ്ട്ര തലത്തിൽ ഒരു ദിനം തന്നെയുണ്ട്, ഡിസംബർ 21. നെയ്ത്തുകാരെ ആദരിക്കുക എന്ന ഉദ്ദേശത്തോടെ 2020 മുതലാണ് സാരി ദിനം ആഘോഷിക്കാൻ തുടങ്ങിയത്. ഫാഷനിൽ അതീവ തത്പരരായ സിന്ദൂര കവിതിയും നിസ്റ്റ്വൽ ഹെബ്ബാറുമാണ് ഇങ്ങനെയൊരു ആശയത്തിന് തുടക്കമട്ടത്.
ഇപ്പോഴിതാ കഴിഞ്ഞ സാമ്പത്തിക വർഷത്തെ ഉപഭോക്തൃ ചിലവിനെ കുറിച്ചുള്ള കേന്ദ്ര റിപ്പോർട്ടിൽ കേരളത്തിന്റെ സാരിപ്രിയവും വ്യക്തമാകുന്നുണ്ട്. സംസ്ഥാനത്തെ സ്ത്രീകൾക്ക് ഗ്രാമ-നഗര വ്യത്യാസമില്ലാതെ സാരി പ്രിയം ഏറുന്നുണ്ടത്രേ. ഗ്രാമപ്രദേശങ്ങളിലെയും നഗരപ്രദേശങ്ങളിലെയും ഒരു മലയാളി കുടുംബം ശരാശരി മൂന്നു മാസത്തിലൊരിക്കൽ പുതിയ സാരി വാങ്ങുന്നുവത്രേ.
ഉത്തരേന്ത്യൻ വസ്ത്രങ്ങൾക്കും പ്രചാരം കൂടിയിട്ടുണ്ട്. ‘ഷെർവാണി, ലെഹങ്ക, ഗൗൺ’ എന്നിവയുടെ ഉപഭോഗം ഗ്രാമങ്ങളിലും നഗരങ്ങളിലും ഇരട്ടിയായി. ഗ്രാമപ്രദേശങ്ങളിൽ ‘കുർത്തി, കമീസ്’ എന്നിവയുടെ ഉപഭോഗം 93 ശതമാനവും ‘പൈജാമ, സൽവാർ, ലെഗ്ഗിങ്‌സ്, പലാസോ’ എന്നിവയുടെ ഉപഭോഗം 57 ശതമാനവും വർദ്ധിച്ചു. 2023 -24 ൽ ഗ്രാമീണ കുടുബങ്ങൾ വസ്ത്രങ്ങൾക്കായി ശരാശരി 3321 രൂപ ചെലവിട്ടു. നഗരപ്രദേശങ്ങളിലിത് 3516 രൂപയായിരുന്നു. മുൻവർഷം ഗ്രാമങ്ങളിലെയും നഗരങ്ങളിലെയും വസ്ത്ര ചെലവ് യഥാക്രമം 2648 രൂപ, 3136 എന്നിങ്ങനെയായിരുന്നു.
