തിരുവനന്തപുരം: ശബരിമല സ്വർണ്ണക്കൊള്ള കേസിൽ അറസ്റ്റിലായ തന്ത്രി കണ്ഠരര് രാജീവരെ സംരക്ഷിക്കില്ലെന്ന് ബിജെപി സംസ്ഥാന അദ്ധ്യക്ഷൻ രാജീവ് ചന്ദ്രശേഖർ. സ്വർണ്ണക്കൊള്ളയിൽ പങ്കുണ്ടെന്ന് സംശയിക്കുന്ന ഉന്നതരെ സംരക്ഷിക്കുന്ന നിലപാടാണ് സർക്കാർ സ്വീകരിക്കുന്നതെന്ന് അദ്ദേഹം കുറ്റപ്പെടുത്തി. “തന്ത്രി ജയിലിലാകുമ്പോൾ, കൊള്ളയ്ക്ക് കൂട്ടുനിന്ന മന്ത്രി വീട്ടിലിരിക്കുകയാണ്. സ്വർണ്ണത്തിന്റെ കാവൽക്കാരായ മന്ത്രിയും ദേവസ്വം ബോർഡുമാണ് ഇതിൽ മറുപടി പറയേണ്ടത്” – രാജീവ് ചന്ദ്രശേഖർ പറഞ്ഞു.
തന്ത്രിക്കെതിരെയുള്ള കുറ്റം ആചാരലംഘനമാണെങ്കിൽ, ശബരിമലയിൽ യുവതീപ്രവേശനത്തിന് ഒത്താശ ചെയ്ത് ആചാരം ലംഘിച്ച മുഖ്യമന്ത്രി പിണറായി വിജയനാണ് ആദ്യം ജയിലിൽ പോകേണ്ടതെന്ന് അദ്ദേഹം പരിഹസിച്ചു.ലോക്കൽ ബോഡി തിരഞ്ഞെടുപ്പിലെ തിരിച്ചടിയിൽ നിന്ന് ജനശ്രദ്ധ തിരിക്കാനാണ് തന്ത്രിയെ അറസ്റ്റ് ചെയ്തതെന്ന് രാജീവ് ചന്ദ്രശേഖർ ആരോപിച്ചു. സ്വർണ്ണക്കൊള്ളയ്ക്ക് പിന്നിൽ സിപിഎമ്മും കോൺഗ്രസും ചേർന്ന ‘കുറുവ സംഘമാണെന്നും’ ഇതിനെക്കുറിച്ച് സ്വതന്ത്ര അന്വേഷണം വേണമെന്നും അദ്ദേഹം ആവശ്യപ്പെട്ടു.
കേസിലെ മുഖ്യപ്രതിയായ ഉണ്ണികൃഷ്ണൻ പോറ്റിക്ക് കോൺഗ്രസ് നേതാക്കളുമായുള്ള അവിശുദ്ധ ബന്ധം രാജീവ് ചന്ദ്രശേഖർ ചോദ്യം ചെയ്തു.സോണിയ ഗാന്ധിയുമായുള്ള ബന്ധം: ഉണ്ണികൃഷ്ണൻ പോറ്റി എന്തിനാണ് സോണിയ ഗാന്ധിയെ കണ്ടതെന്ന് കോൺഗ്രസ് വ്യക്തമാക്കണം. സോണിയയുടെ വോട്ടറാണോ പോറ്റി എന്നും അദ്ദേഹം ചോദിച്ചു.നുണപ്രചാരണം: ബിജെപിക്കെതിരെ കോൺഗ്രസും സിപിഎമ്മും കാലങ്ങളായി നുണപ്രചാരണങ്ങൾ നടത്തുകയാണെന്നും അദ്ദേഹം പറഞ്ഞു.
ജനുവരി 14-ന് മകരവിളക്ക് ദിനത്തിൽ ബിജെപിയുടെ നേതൃത്വത്തിൽ ‘അയ്യപ്പ ജ്യോതി’ പ്രതിഷേധം സംഘടിപ്പിക്കുമെന്നും രാജീവ് ചന്ദ്രശേഖർ അറിയിച്ചു.
