അമേരിക്കൻ രാഷ്ട്രീയത്തിന്റെ ഹൃദയഭൂമിയായ വാഷിംഗ്ടൺ ഡിസിയിൽ ചരിത്രം കുറിക്കാൻ ഒരു ഇന്ത്യൻ വംശജ. ഡിസി മേയർ സ്ഥാനത്തേക്ക് മത്സരിക്കുന്ന ആദ്യ സൗത്ത് ഏഷ്യൻ സ്ഥാനാർത്ഥിയായി തമിഴ്‌നാട് സ്വദേശിനി റിനി സമ്പത്ത് തിരഞ്ഞെടുപ്പ് ഗോദയിൽ ഇറങ്ങുന്നു. തമിഴ്നാട്ടിലെ തേനിയിൽ ജനിച്ച മുപ്പത്തിയൊന്നുകാരിയായ റിനി, തന്റെ ഏഴാം വയസ്സിലാണ് മാതാപിതാക്കൾക്കൊപ്പം അമേരിക്കയിലേക്ക് കുടിയേറിയത്. കഴിഞ്ഞ പത്ത് വർഷത്തിലേറെയായി വാഷിംഗ്ടൺ ഡിസിയിലെ സ്ഥിരതാമസക്കാരിയായ റിനി ഒരു സൈബർ സെക്യൂരിറ്റി വിദഗ്ദ്ധ കൂടിയാണ്.
‘അടിസ്ഥാന സൗകര്യങ്ങൾ ശരിയാക്കുക’ (Fix the Basics), ‘പുതിയൊരു ഡിസി’ എന്നീ മുദ്രാവാക്യങ്ങൾ ഉയർത്തിയാണ് റിനിയുടെ പ്രചാരണം. നഗരത്തിലെ വർധിച്ചു വരുന്ന വാടക കുറയ്ക്കുക, സാധാരണക്കാർക്ക് താങ്ങാനാവുന്ന ഭവനങ്ങൾ നിർമ്മിക്കുക, തകർന്ന റോഡുകളും നടപ്പാതകളും നന്നാക്കുക തുടങ്ങിയ അടിസ്ഥാന ആവശ്യങ്ങൾക്കാണ് റിനി മുൻഗണന നൽകുന്നത്. നഗരത്തിലെ എമർജൻസി സർവീസുകളായ 911, 311 എന്നിവയുടെ കാര്യക്ഷമത വർദ്ധിപ്പിക്കുമെന്നും പ്രാദേശിക വ്യാപാരികളെ സഹായിച്ചുകൊണ്ട് ഭക്ഷണസാധനങ്ങളുടെ വില കുറയ്ക്കുമെന്നും റിനി വാഗ്ദാനം ചെയ്യുന്നു. ഭരണകൂടത്തിന്റെ പരാജയങ്ങൾ കാരണം പ്രാദേശിക രാഷ്ട്രീയത്തിൽ നിന്ന് അകന്നുപോയ ജനങ്ങളെ തിരികെ കൊണ്ടുവരികയാണ് തന്റെ ലക്ഷ്യമെന്ന് റിനി വ്യക്തമാക്കി.
സോഷ്യൽ മീഡിയയിൽ തനിക്കെതിരെ ഉയർന്ന ‘ഇന്ത്യയിലേക്ക് മടങ്ങിപ്പോകൂ’ എന്ന വിദ്വേഷ പരാമർശത്തിന് റിനി നൽകിയ മറുപടിയും ശ്രദ്ധേയമാണ്. “ഞാനൊരു അഭിമാനിയായ കുടിയേറ്റക്കാരിയാണ്. അമേരിക്കൻ സ്വപ്നം തേടിയാണ് എന്റെ കുടുംബം ഇവിടെയെത്തിയത്. ആ സ്വപ്നം ഓരോ ഡിസി നിവാസിക്കും യാഥാർത്ഥ്യമാക്കുക എന്നതാണ് എന്റെ ലക്ഷ്യം,” റിനി എക്‌സിൽ കുറിച്ചു. ഡൊണാൾഡ് ട്രംപിന്റെ കുടിയേറ്റ വിരുദ്ധ നയങ്ങളെ ശക്തമായി എതിർക്കുന്ന റിനി, വാഷിംഗ്ടൺ ഡിസിയെ കുടിയേറ്റക്കാരെ സ്വാഗതം ചെയ്യുന്ന നഗരമായി നിലനിർത്തുമെന്നും പ്രഖ്യാപിച്ചു. ഐസിഇ (ICE) പോലുള്ള ഏജൻസികളുമായി പ്രാദേശിക പോലീസ് വിവരങ്ങൾ പങ്കുവെക്കുന്നതിനെ താൻ എതിർക്കുമെന്നും അവർ വ്യക്തമാക്കി.
നിലവിൽ ഡെമോക്രാറ്റിക് പാർട്ടി അംഗമായ റിനിക്ക് അമേരിക്കൻ ഹിന്ദു കോളിഷൻ (AHC) ഉൾപ്പെടെയുള്ള സംഘടനകളുടെ വലിയ പിന്തുണയാണ് ലഭിക്കുന്നത്. ജാനീസ് ലൂയിസ് ജോർജ്, കെനിയൻ മക്ഡഫി തുടങ്ങി പ്രമുഖ സ്ഥാനാർത്ഥികളാണ് റിനിയുടെ എതിരാളികൾ. നഗരത്തിന്റെ ബജറ്റിൽ 1.1 ബില്യൺ ഡോളറിന്റെ കുറവുണ്ടെന്നും നടപ്പിലാക്കാൻ കഴിയാത്ത വ്യാജ വാഗ്ദാനങ്ങൾ നൽകി ജനങ്ങളെ വഞ്ചിക്കാനില്ലെന്നും റിനി പറയുന്നു. ജൂൺ 16-നാണ് പ്രൈമറി തിരഞ്ഞെടുപ്പ് നടക്കുന്നത്. നവംബർ 3-ന് നടക്കുന്ന പൊതുതിരഞ്ഞെടുപ്പിൽ റിനി വിജയിച്ചാൽ അമേരിക്കൻ തലസ്ഥാന നഗരത്തിന്റെ അമരത്തെത്തുന്ന ആദ്യ ഇന്ത്യൻ വംശജയെന്ന ചരിത്ര നേട്ടം ഈ തമിഴ്നാട്ടുകാരിക്ക് സ്വന്തമാകും. തമിഴ്നാട്ടിലെ തേനിയിൽ നിന്നും അമേരിക്കയുടെ അധികാര കേന്ദ്രങ്ങളിലേക്കുള്ള റിനിയുടെ ഈ യാത്ര ഇതിനോടകം തന്നെ സോഷ്യൽ മീഡിയയിൽ വലിയ തരംഗമായിട്ടുണ്ട്.
