കൊച്ചി: നഗരറോഡുകളിൽ സർവീസ് നടത്തുന്ന സ്വകാര്യ ബസുകളുടെ മരണപ്പാച്ചിലിനും അശ്രദ്ധമായ ഡ്രൈവിംഗിനുമെതിരെ കടുത്ത നിലപാടുമായി ഹൈക്കോടതി. ബസുകൾ ജനങ്ങളുടെ ജീവനെടുക്കുന്ന ‘കില്ലിംഗ് മെഷീനുകൾ’ ആകരുതെന്നും ഇത്തരം നിയമലംഘനങ്ങൾക്കെതിരെ പോലീസ് ഉരുക്കുമുഷ്ടി പ്രയോഗിച്ച് ശക്തമായ നടപടികൾ സ്വീകരിക്കണമെന്നും കോടതി കർശന നിർദേശം നൽകി. നിയമലംഘനങ്ങൾ നടത്തുന്ന ബസുകളുടെ ദൃശ്യങ്ങൾ പകർത്തി അധികൃതർക്ക് കൈമാറാൻ പൊതുജനങ്ങളോട് നിർദേശിക്കണമെന്നും കോടതി വാക്കാൽ പരാമർശിച്ചു. ഇതിനൊപ്പം സംസ്ഥാനത്തെ സ്വകാര്യ ബസ് ഡ്രൈവർമാർക്ക് സ്മാർട്ട് ഐഡന്റിറ്റി കാർഡ് നിർബന്ധമാക്കാനും കോടതി ഉത്തരവിട്ടു.
കാക്കനാട് ഇൻഫോപാർക്കിന് സമീപം കുളക്കാട്ടുമൂലയിൽ സ്വകാര്യ ബസിടിച്ച് ഇൻഫോപാർക്ക് ജീവനക്കാരിയായ അക്ഷര ദാരുണമായി കൊല്ലപ്പെട്ട സംഭവത്തിൽ സ്വമേധയാ ഇടപെട്ടാണ് ഹൈക്കോടതിയുടെ നിർണായക പ്രതികരണം.വാദത്തിനിടെ, അപകടത്തിന് കാരണക്കാരനായ ബസ് ഡ്രൈവർ ലഹരിക്കേസുകളിൽ ഉൾപ്പെടെ പ്രതിയാണെന്ന വിവരം പുറത്തുവന്നതിൽ കോടതി കടുത്ത ഞെട്ടൽ രേഖപ്പെടുത്തി. ഇത്തരക്കാർ പൊതുഗതാഗത സംവിധാനത്തിന്റെ ഭാഗമാകുന്നത് ജനങ്ങളുടെ സുരക്ഷയ്ക്ക് ഗുരുതരമായ ഭീഷണിയാണെന്ന് കോടതി ചൂണ്ടിക്കാട്ടി.
സംഭവത്തിൽ മരിച്ച അക്ഷരയുടെ കുടുംബത്തോട് കോടതി മാപ്പ് ചോദിക്കുന്നതായും നിഷ്കളങ്കരായ മനുഷ്യരുടെ ജീവൻ റോഡിൽ പൊലിയുന്നത് ഇനി അനുവദിക്കാനാകില്ലെന്നും കോടതി വ്യക്തമാക്കി. നഗരത്തിലെ ബസുകളുടെ അമിതവേഗതയും മത്സരയോട്ടവും തടയാൻ എറണാകുളം ജില്ലാ കളക്ടറുടെയും മോട്ടോർ വാഹന വകുപ്പിന്റെയും പോലീസിന്റെയും സംയുക്ത യോഗം വിളിച്ചുചേർത്ത് അടിയന്തര നടപടികൾ കൈക്കൊള്ളാൻ നിർദേശമുണ്ട്.ഡ്രൈവർമാരുടെ പശ്ചാത്തല പരിശോധനയും ലഹരി പരിശോധനയും കർശനമാക്കണമെന്നും സുരക്ഷ ഉറപ്പാക്കുന്നതിൽ വീഴ്ച വരുത്തുന്ന ബസ് ഉടമകൾക്കെതിരെയും ലൈസൻസ് റദ്ദാക്കൽ ഉൾപ്പെടെയുള്ള കടുത്ത നടപടികൾ ഉണ്ടാകുമെന്നും അധികൃതർ അറിയിച്ചു.
