ഐ.പി.എൽ 2026-ൽ തുടർച്ചയായ മൂന്ന് വിജയങ്ങൾക്ക് ശേഷം ചെന്നൈ സൂപ്പർ കിംഗ്‌സിന് അപ്രതീക്ഷിത തിരിച്ചടി. പോയിന്റ് പട്ടികയിൽ താഴെയുള്ള ലഖ്‌നൗ സൂപ്പർ ജാന്റ്സിനോട് തോറ്റതോടെ ചെന്നൈയുടെ പ്ലേ ഓഫ് പ്രതീക്ഷകൾക്ക് മങ്ങലേറ്റു. ഈ പരാജയത്തിന് പിന്നാലെ നായകൻ ഋതുരാജ് ഗെയ്‌ക്‌വാദിന്റെ തന്ത്രപരമായ പിഴവുകളെ രൂക്ഷമായി വിമർശിച്ച് മുൻ താരം സുബ്രഹ്മണ്യം ബദരീനാഥ് രംഗത്തെത്തി.
പഞ്ചാബ് കിംഗ്‌സിന്റെ പരാജയത്തോടെ പോയിന്റ് പട്ടികയിൽ നാലാം സ്ഥാനത്തേക്ക് കയറാൻ ചെന്നൈക്ക് ലഭിച്ച സുവർണ്ണാവസരമാണ് ലഖ്‌നൗവിന് മുന്നിൽ അവർ തല്ലിക്കെടുത്തിയത്. ആദ്യം ബാറ്റ് ചെയ്ത ചെന്നൈ 187/5 എന്ന മികച്ച സ്കോർ പടുത്തുയർത്തിയെങ്കിലും, ലഖ്‌നൗ വെറും 16.4 ഓവറിൽ ലക്ഷ്യം മറികടന്നു.
മത്സരശേഷം എക്സിൽ (X) പങ്കുവെച്ച കുറിപ്പിലാണ് ബദരീനാഥ് ചെന്നൈയുടെ ടീം സെലക്ഷനെ ചോദ്യം ചെയ്തത്. “ടീം സെലക്ഷനിലെ പിഴവുകൾ കാരണം സിഎസ്‌കെ തോൽക്കുന്നത് ഈ സീസണിൽ ഒരു പതിവായി മാറിയിരിക്കുകയാണ്. ഈ പിച്ചിൽ അക്കീൽ ഹൊസൈനെ മാറ്റിനിർത്തിയത് ഒട്ടും യുക്തിസഹമല്ല. മറ്റൊരു മത്സരം കൂടി, വീണ്ടുമൊരു അവസരം കൂടി നഷ്ടപ്പെടുത്തിയിരിക്കുന്നു,” ബദരീനാഥ് കുറിച്ചു.
പരാജയപ്പെട്ടെങ്കിലും പരിഭ്രാന്തരാകേണ്ടതില്ലെന്നാണ് ക്യാപ്റ്റൻ ഋതുരാജ് ഗെയ്‌ക്‌വാദിന്റെ നിലപാട്. ബാറ്റിംഗിൽ തങ്ങൾ പ്രതീക്ഷിച്ചതിലും നല്ല സ്കോർ (187 റൺസ്) നേടിയെന്നും എന്നാൽ ബൗളിംഗിൽ കളി കൈവിട്ടുപോയെന്നും റുതുരാജ് പറഞ്ഞു.
“ഞങ്ങൾ ബാറ്റ് ചെയ്തപ്പോൾ ഫാസ്റ്റ് ബൗളർമാർക്ക് പിച്ചിൽ നിന്ന് സഹായം ലഭിച്ചിരുന്നു. 160-170 റൺസ് പ്രതീക്ഷിച്ചയിടത്ത് ഞങ്ങൾക്ക് 180-ലധികം റൺസ് നേടാനായി. ബാറ്റിംഗിൽ ഇതിലും നന്നായി ചെയ്യാൻ കഴിയുമായിരുന്നില്ല. എന്നാൽ ലഖ്‌നൗ അസാധാരണമായ ഷോട്ടുകളിലൂടെ മത്സരം കൈക്കലാക്കി. ഇനി വരാനിരിക്കുന്ന രണ്ട് മത്സരങ്ങളും ജയിക്കുക എന്ന ലളിതമായ കണക്കുകൂട്ടൽ മാത്രമാണ് ഞങ്ങൾക്ക് മുന്നിലുള്ളത്,” ഋതുരാജ് വ്യക്തമാക്കി.
