തീവ്രവാദ റിക്രൂട്ട്‌മെന്റ് കേസുമായി ബന്ധപ്പെട്ട് ജമ്മു കാശ്മീരിൽ വിവിധയിടങ്ങളിൽ വൻ റെയ്ഡ് നടത്തി ജമ്മു കാശ്മീർ പൊലീസിന്റെ കൗണ്ടർ ഇന്റലിജൻസ് കാശ്മീർ (സി.ഐ.കെ) വിഭാഗം. ദക്ഷിണ കാശ്മീരിലെ പുൽവാമ, അനന്ത്നാഗ് ജില്ലകളിലും ശ്രീനഗർ, ബുഡ്ഗാം എന്നിവിടങ്ങളിലുമുള്ള ആറോളം കേന്ദ്രങ്ങളിലാണ് ഉദ്യോഗസ്ഥർ തെരച്ചിൽ നടത്തിയത്. ഭീകരവിരുദ്ധ നിയമമായ യു.എ.പി.എ (UAPA), ഭാരതീയ ന്യായ സംഹിത വകുപ്പുകൾ പ്രകാരം രജിസ്റ്റർ ചെയ്ത കേസിന്റെ അടിസ്ഥാനത്തിലാണ് ഈ കർശന നടപടി.
സോഷ്യൽ മീഡിയ പ്ലാറ്റ്‌ഫോമുകൾ വഴി കശ്മീരി യുവാക്കളെ തീവ്രവാദത്തിലേക്ക് ആകർഷിക്കുകയും നിയമവിരുദ്ധ സംഘടനകളിലേക്ക് റിക്രൂട്ട് ചെയ്യുകയും ചെയ്യുന്ന ശൃംഖലയെക്കുറിച്ചുള്ള അന്വേഷണത്തിന്റെ ഭാഗമായാണ് റെയ്ഡ് നടത്തിയത്. പാക്കിസ്ഥാനിലുള്ള ഹാൻഡ്‌ലർമാരും ലഷ്കറെ തൊയ്ബ പോലുള്ള നിരോധിത ഭീകര സംഘടനകളും ചേർന്ന് യുവാക്കളെ രാജ്യത്തിനെതിരെ പ്രകോപിപ്പിക്കാൻ ശ്രമിക്കുന്നുവെന്ന വിവരത്തിന്റെ അടിസ്ഥാനത്തിലാണ് പൊലീസിന്റെ ഈ നീക്കം. പ്രാദേശിക പൊലീസിന്റെയും റവന്യൂ ഉദ്യോഗസ്ഥരുടെയും സഹകരണത്തോടെ മജിസ്‌ട്രേറ്റിന്റെ സാന്നിധ്യത്തിലായിരുന്നു തെരച്ചിൽ നടപടികൾ പൂർത്തിയാക്കിയത്.
അനന്ത്നാഗിലെ ബിജ്ബെഹറ, മട്ടാൻ പ്രദേശങ്ങളിലെ വീടുകളിലും പുൽവാമയിലെ ഗ്രാമങ്ങളിലുമാണ് പ്രധാനമായും പരിശോധന നടന്നത്. പരിശോധനയിൽ കേസിന് ആസ്പദമായ നിർണ്ണായക രേഖകളും ഡിജിറ്റൽ തെളിവുകളും പിടിച്ചെടുത്തതായി ഉദ്യോഗസ്ഥർ സൂചിപ്പിച്ചു. മേഖലയിലെ ക്രമസമാധാന നില ഉറപ്പാക്കാനും ഭീകരവാദ ശൃംഖലകളെ പൂർണ്ണമായി തകർക്കാനും ശക്തമായ നിയമനടപടികളുമായി മുന്നോട്ട് പോകുമെന്ന് പൊലീസ് വ്യക്തമാക്കി.
