റോയൽ ചലഞ്ചേഴ്സ് ബംഗളൂരുവിനോട് വഴങ്ങിയ കനത്ത തോൽവിക്ക് പിന്നാലെ പഞ്ചാബ് കിംഗ്‌സ് പ്ലേ ഓഫ് റേസിൽ നിന്ന് പുറത്താവലിന്റെ വക്കിലാണ്. മത്സരശേഷം ധർമ്മശാലയിലെ ഡഗ് ഔട്ടിൽ തലതാഴ്ത്തി തനിച്ചിരിക്കുന്ന റിക്കി പോണ്ടിംഗിന്റെ ചിത്രം ക്രിക്കറ്റ് ലോകത്തെ സങ്കടത്തിലാഴ്ത്തിയിരിക്കുകയാണ്. മുൻ പഞ്ചാബ് നായകൻ ആർ. അശ്വിൻ ഈ ചിത്രത്തെ “ശക്തമായ ഒരു കാഴ്ച” എന്നാണ് വിശേഷിപ്പിച്ചത്.
തന്റെ യൂട്യൂബ് ചാനലിലൂടെ സംസാരിക്കവെയാണ് അശ്വിൻ പഞ്ചാബ് ക്യാമ്പിലെ അവസ്ഥ വിവരിച്ചത്. മനോഹരമായ ധർമ്മശാല മലനിരകൾക്ക് മുന്നിൽ പോണ്ടിംഗ് തകർന്നിരിക്കുന്നത് കാണുന്നത് വേദനയുണ്ടാക്കുന്ന ഒന്നാണെന്ന് അദ്ദേഹം പറഞ്ഞു. “ടൂർണമെന്റിന്റെ തുടക്കത്തിൽ ആദ്യ രണ്ട് സ്ഥാനങ്ങളിലേക്ക് എത്താൻ എല്ലാ സാധ്യതയുമുണ്ടായിരുന്ന ടീമാണിത്. എവിടെയാണ് പിഴച്ചതെന്ന് അവർക്ക് തന്നെ അറിയില്ല,” അശ്വിൻ പറഞ്ഞു.
പഞ്ചാബ് കിംഗ്‌സ് ഉടമകൾക്കെതിരെ കടുത്ത വിമർശനമാണ് അശ്വിൻ ഉയർത്തിയത്. ടീമിന്റെ വിജയത്തേക്കാൾ ഉടമകൾ ബിസിനസ് ലാഭത്തിന് മുൻഗണന നൽകിയതാണ് തിരിച്ചടിയായതെന്ന് അദ്ദേഹം ആരോപിക്കുന്നു. പകുതി മത്സരങ്ങൾ മുള്ളൻപൂരിലും ബാക്കി ധർമ്മശാലയിലും കളിക്കാനുള്ള തീരുമാനം തെറ്റായിപ്പോയി. ചാമ്പ്യൻ ടീമുകൾ ഒരിക്കലും തങ്ങളുടെ ഹോം ഗ്രൗണ്ട് മാറ്റാറില്ല. മുള്ളൻപൂരിലെ പിച്ചും ധർമ്മശാലയിലെ പിച്ചും തമ്മിൽ വലിയ വ്യത്യാസമുണ്ട്. മുള്ളൻപൂരിൽ ഹൈദരാബാദിനെതിരെ 220 റൺസ് പ്രതിരോധിച്ചു ജയിച്ചവർക്ക് ധർമ്മശാലയിൽ അടിതെറ്റി. കാലാവസ്ഥയും ഉയരവും മാറുമ്പോൾ താരങ്ങൾക്ക് പൊരുത്തപ്പെടാൻ സാധിക്കുന്നില്ല.
നായകൻ ശ്രേയസ് അയ്യരോടും കോച്ച് പോണ്ടിംഗിനോടും തനിക്ക് സഹതാപമുണ്ടെന്ന് അശ്വിൻ പറഞ്ഞു. ബിസിനസ് താല്പര്യങ്ങൾ നോക്കുമ്പോൾ വിജയങ്ങൾ നഷ്ടമാകുന്നത് ഒഴിവാക്കാനാവില്ലെന്നും അദ്ദേഹം ഓർമ്മിപ്പിച്ചു.
പഞ്ചാബ് കിംഗ്‌സിന്റെ ഈ സീസണിലെ അവസാന മത്സരം ലക്നൗവിനെതിരെ ഏകാന സ്റ്റേഡിയത്തിലാണ് നടക്കുക. ബാറ്റിംഗ് ദുഷ്കരമായ ഈ ഗ്രൗണ്ടിൽ പഞ്ചാബിന് ജയിക്കാനാകുമോ എന്നാണ് ആരാധകർ ഉറ്റുനോക്കുന്ന
