അഫ്ഗാനിസ്ഥാനെതിരായ ഏകദിന പരമ്പരയ്ക്കുള്ള ഇന്ത്യൻ ടീമിനെ ബിസിസിഐ പ്രഖ്യാപിച്ചു. നേരത്തെ റിപ്പോർട്ട് ചെയ്യപ്പെട്ടിരുന്നത് പോലെ മലയാളി താരം സഞ്ജു സാംസണെ ടീമിൽ ഉൾപ്പെടുത്തിയിട്ടില്ല. ജസ്പ്രീത് ബുംറ, മുഹമ്മദ് സിറാജ് എന്നിവർക്ക് വിശ്രമം അനുവദിച്ചപ്പോൾ യുവതാരങ്ങൾക്ക് വലിയ അവസരമാണ് സെലക്ടർമാർ നൽകിയിരിക്കുന്നത്.
യുവതാരം ശുഭ്മാൻ ഗിൽ ടീമിനെ നയിക്കുമ്പോൾ ശ്രേയസ് അയ്യരാണ് വൈസ് ക്യാപ്റ്റൻ. രോഹിത് ശർമ്മ, വിരാട് കോഹ്‌ലി എന്നിവർ ടീമിലുണ്ടെങ്കിലും മലയാളി ആരാധകരെ നിരാശരാക്കിക്കൊണ്ട് സഞ്ജു സാംസണെ വീണ്ടും ഏകദിന ടീമിൽ നിന്ന് തഴഞ്ഞു. ടി20 ലോകകപ്പ് വിജയത്തിൽ നിർണ്ണായക പങ്കുവഹിച്ചിട്ടും സഞ്ജു സാംസണെ ഏകദിന ഫോർമാറ്റിലേക്ക് പരിഗണിക്കാൻ സെലക്ടർമാർ തയ്യാറായില്ല. കെ.എൽ. രാഹുൽ തന്നെയാണ് ടീമിലെ ഒന്നാം നമ്പർ വിക്കറ്റ് കീപ്പർ. ഐപിഎല്ലിലും ലോകകപ്പിലും മിന്നും ഫോമിലുള്ള ഇഷാൻ കിഷൻ രണ്ടാമത്തെ വിക്കറ്റ് കീപ്പറായി ടീമിലേക്ക് തിരിച്ചെത്തി. ഇതോടെ സഞ്ജുവിന് വീണ്ടും കടുത്ത നീതികേടാണ് നേരിടേണ്ടി വന്നിരിക്കുന്നത്.
വർക്ക് ലോഡ് മാനേജ്‌മെന്റിന്റെ ഭാഗമായി പ്രമുഖ പേസർമാരായ ജസ്പ്രീത് ബുംറ, മുഹമ്മദ് സിറാജ് എന്നിവർക്ക് പരമ്പരയിൽ വിശ്രമം അനുവദിച്ചു. ഇതോടെ യുവ ഫാസ്റ്റ് ബൗളർമാരായ പ്രിൻസ് യാദവ്, ഗുർനൂർ ബ്രാർ, സ്പിന്നർ ഹർഷ് ദുബെ എന്നിവർക്ക് അപ്രതീക്ഷിതമായി ഇന്ത്യൻ ടീമിലേക്ക് വിളി വന്നു. ഐപിഎല്ലിലെ മികച്ച പ്രകടനമാണ് ഈ യുവതാരങ്ങൾക്ക് തുണയായത്.
ഹാർദ്ദിക് പാണ്ഡ്യക്കൊപ്പം യുവ ഓൾറൗണ്ടർ നിതീഷ് കുമാർ റെഡ്ഡിയും ടീമിൽ ഇടംനേടിയിട്ടുണ്ട്. വാഷിംഗ്ടൺ സുന്ദർ, കുൽദീപ് യാദവ് എന്നിവരാണ് സ്പിൻ നിരയെ നയിക്കുക. അർഷ്ദീപ് സിംഗ്, പ്രസിദ്ധ് കൃഷ്ണ എന്നിവരാണ് പേസ് നിരയിലെ പരിചയസമ്പന്നർ.
TEAM: ഗിൽ (സി), രോഹിത്, കോഹ്‌ലി , ശ്രേയസ് (വിസി), രാഹുൽ (ഡബ്ല്യുകെ), കിഷൻ (ഡബ്ല്യുകെ), ഹാർദിക്, നിതീഷ് കുമാർ റെഡ്ഡി, സുന്ദർ, കുൽദീപ്, അർഷ്ദീപ്, പ്രസീദ്, പ്രിൻസ് യാദവ്, ഗുർണൂർ ബ്രാർ, ഹർഷ് ദുബെ.
