രാജ്യത്തെ ഇന്ധന വിപണിയിലും വാഹന വിപണിയിലും വൻ വിപ്ലവത്തിന് വഴിതുറന്ന് കേന്ദ്ര സർക്കാരിന്റെ നിർണ്ണായക നീക്കം. ഇന്ധന ഇറക്കുമതി ചിലവ് ഗണ്യമായി കുറയ്ക്കുന്നതിനും ആഭ്യന്തര ഉൽപ്പാദനം വർദ്ധിപ്പിക്കുന്നതിനുമായി 100 ശതമാനം എഥനോൾ (E100 Fuel) ഇന്ധന പദ്ധതി സർക്കാർ അതിവേഗം നടപ്പിലാക്കുന്നു. ഇതിന്റെ ഭാഗമായി അടുത്ത രണ്ട് വർഷത്തിനുള്ളിൽ രാജ്യത്തൊട്ടാകെ 5,000 എഥനോൾ ഇന്ധന വിതരണ കേന്ദ്രങ്ങൾ (Dispensing Stations) സ്ഥാപിക്കാനാണ് കേന്ദ്ര പെട്രോളിയം മന്ത്രാലയം ലക്ഷ്യമിടുന്നത്. പ്രമുഖ ഓട്ടോമൊബൈൽ നിർമ്മാണ കമ്പനികളും പൊതുമേഖലാ എണ്ണ വിപണന കമ്പനികളും (OMCs) സംയുക്തമായാണ് ഇതിനായുള്ള വൻ ഒരുക്കങ്ങൾ നടത്തുന്നത്.
രാജ്യത്തെ ഇന്ധന വിപണി നിലവിൽ 20 ശതമാനം എഥനോൾ കലർത്തിയ പെട്രോൾ (E20) വിതരണം ചെയ്യുന്ന ഘട്ടത്തിലേക്ക് വിജയകരമായി മാറിയിട്ടുണ്ട്. ഇതിന് തൊട്ടുപിന്നാലെയാണ് പൂർണ്ണമായും എഥനോളിൽ ഓടുന്ന വാഹനങ്ങൾക്കായുള്ള ‘ഫ്ലെക്സ് ഫ്യുവൽ’ (Flex-Fuel) നയം രാജ്യം നടപ്പാക്കുന്നത്. പദ്ധതിയുടെ ആദ്യഘട്ടമെന്ന നിലയിൽ അടുത്ത ഒരു മാസത്തിനുള്ളിൽ ഡൽഹി, മുംബൈ, പൂനെ, നാഗ്പൂർ എന്നീ നഗരങ്ങളിലായി 150 വിതരണ കേന്ദ്രങ്ങൾ പ്രവർത്തനക്ഷമമാക്കും. അടുത്ത 6 മുതൽ 12 മാസത്തിനുള്ളിൽ ബംഗളൂരു, ചെന്നൈ, കൊൽക്കത്ത, ഹൈദരാബാദ് തുടങ്ങിയ മെട്രോ നഗരങ്ങളിലേക്കും മഹാരാഷ്ട്ര, ഡൽഹി-എൻസിആർ മേഖലകളിലേക്കും ശൃംഖല വ്യാപിപ്പിച്ച് 500 കേന്ദ്രങ്ങൾ തുറക്കും. തുടർന്നുള്ള 24 മാസത്തിനുള്ളിലാണ് ലക്ഷ്യമിട്ട 5,000 കേന്ദ്രങ്ങളും രാജ്യത്തുടനീളം യാഥാർത്ഥ്യമാക്കുക.
കഴിഞ്ഞ സാമ്പത്തിക വർഷത്തിൽ മാത്രം ഇന്ത്യയുടെ ക്രൂഡ് ഓയിൽ ഇറക്കുമതി ചിലവ് 10.9 ലക്ഷം കോടി രൂപയായിരുന്നു. എഥനോൾ ഉപയോഗം പൂർണ്ണതോതിലാകുന്നതോടെ വിദേശനാണ്യ ശേഖരത്തിൽ വലിയൊരു തുക രാജ്യത്തിന് ലാഭിക്കാൻ സാധിക്കുമെന്നാണ് വിലയിരുത്തൽ. കൂടാതെ, പൂർണ്ണമായും ഇന്ത്യയിൽ തന്നെ ഉൽപ്പാദിപ്പിക്കുന്ന എഥനോൾ വ്യാവസായിക അടിസ്ഥാനത്തിൽ മാറുമ്പോൾ കരിമ്പ് കർഷകർ ഉൾപ്പെടെയുള്ള കോടിക്കണക്കിന് വരുന്ന കാർഷിക മേഖലയിലുള്ളവർക്ക് ഇത് മികച്ച വരുമാന മാർഗ്ഗമായി മാറും. പരിസ്ഥിതി മലിനീകരണം വലിയ തോതിൽ കുറയ്ക്കാൻ സാധിക്കുമെന്നതാണ് പദ്ധതിയുടെ മറ്റൊരു പ്രധാന സവിശേഷത.
പദ്ധതി യാഥാർത്ഥ്യമാകുന്നതോടെ രാജ്യത്തെ പ്രമുഖ വാഹന നിർമ്മാതാക്കളായ മാരുതി സുസുക്കി, ഹ്യുണ്ടായ്, ടാറ്റാ മോട്ടോഴ്സ്, മഹീന്ദ്ര, ഹീറോ മോട്ടോകോർപ്പ്, ടിവിഎസ് തുടങ്ങിയ കമ്പനികൾ തങ്ങളുടെ ഫ്ലെക്സ് ഫ്യുവൽ വാഹനങ്ങളുടെ (FFVs) പ്രോട്ടോടൈപ്പുകൾ ഇതിനകം തന്നെ വികസിപ്പിച്ചു കഴിഞ്ഞിട്ടുണ്ട്.
