സൂര്യകുമാർ യാദവിന് പകരം ഇന്ത്യൻ ട്വന്റി-20 ടീമിന്റെ നായകസ്ഥാനം ഏറ്റെടുത്ത ശ്രേയസ് അയ്യർക്ക് കനത്ത തിരിച്ചടി നൽകിക്കൊണ്ട് ഇംഗ്ലണ്ടിനെതിരായ രണ്ടാം ടി20 മത്സരത്തിലും ഇന്ത്യക്ക് പരാജയം. അയർലൻഡിനെതിരായ പരമ്പരയിലെ ചരിത്രപരമായ 0-2 ന്റെ വൈറ്റ്‌വാഷിന് പിന്നാലെയാണ് ഇംഗ്ലണ്ടിനെതിരായ അഞ്ച് മത്സരങ്ങളുടെ പരമ്പരയിലെ രണ്ടാം പോരാട്ടത്തിലും ഇന്ത്യ നാല് വിക്കറ്റിന്റെ തോൽവി വഴങ്ങിയത്. പരമ്പരയിലെ ആദ്യ മത്സരം മഴമൂലം ഉപേക്ഷിക്കപ്പെട്ടിരുന്നു. മാഞ്ചസ്റ്ററിൽ നടന്ന രണ്ടാം മത്സരത്തിൽ ഇന്ത്യ ഉയർത്തിയ 191 റൺസ് വിജയലക്ഷ്യം ഒരു ഓവർ അവശേഷിക്കെ ഇംഗ്ലണ്ട് മറികടക്കുകയായിരുന്നു.
ക്യാപ്റ്റൻ എന്ന നിലയിൽ ശ്രേയസ് അയ്യരുടെ തുടർച്ചയായ മോശം പ്രകടനങ്ങൾക്കും പരാജയങ്ങൾക്കും എതിരെ വലിയ രീതിയിലുള്ള വിമർശനങ്ങൾ ഉയരുന്നതിനിടയിലാണ് മുൻ ഇന്ത്യൻ ഓൾറൗണ്ടർ ഇർഫാൻ പത്താൻ മധ്യനിരയിലേക്ക് രജത് പാട്ടീധാറിനെ നിർദ്ദേശിച്ച് രംഗത്തെത്തിയത്. നിലവിലെ ഇന്ത്യൻ ട്വന്റി-20 ടീമിൽ ഇടംകൈയ്യൻ ബാറ്റർമാരുടെ എണ്ണം കൂടുതലാണെന്നും അതുകൊണ്ട് തന്നെ വലംകൈയ്യൻ ബാറ്ററായ രജത് പാട്ടീധാറിനെ ടീമിലേക്ക് പരിഗണിക്കാൻ മാനേജ്‌മെന്റ് തയ്യാറാകണമെന്നും ഇർഫാൻ തന്റെ എക്സ് അക്കൗണ്ടിൽ കുറിച്ചു.
അടുത്ത ട്വന്റി-20 ലോകകപ്പിന് മുൻപ് ഇന്ത്യക്ക് പുതിയ പരീക്ഷണങ്ങൾ നടത്താൻ ആവശ്യത്തിന് സമയമുണ്ടെന്നും ആഭ്യന്തര ക്രിക്കറ്റിലും ഐപിഎല്ലിലും മികച്ച റെക്കോർഡുള്ള പാട്ടീധാറിന് അവസരം നൽകുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു. ഇന്ത്യക്കായി ഇതുവരെ ട്വന്റി-20 യിൽ അരങ്ങേറിയിട്ടില്ലെങ്കിലും 106 ആഭ്യന്തര ഇന്നിങ്സുകളിൽ നിന്ന് 160.08 എന്ന മികച്ച സ്ട്രൈക്ക് റേറ്റിൽ 3,389 റൺസ് പാട്ടീധാർ അടിച്ചുകൂട്ടിയിട്ടുണ്ട്. ഇതിനുപുറമേ, ഐപിഎല്ലിൽ റോയൽ ചലഞ്ചേഴ്സ് ബെംഗളൂരുവിനെ നയിച്ച് ഇക്കഴിഞ്ഞ 2026 സീസണിലടക്കം തുടർച്ചയായി രണ്ട് തവണ കിരീടം ചൂടിച്ച മികച്ചൊരു ക്യാപ്റ്റൻസി ട്രാക്ക് റെക്കോർഡും പാട്ടീധാറിനുണ്ട്.
