കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ രാജി വെച്ചതിന് പിന്നാലെ ആഘോഷപ്രകടനങ്ങളുമായി രംഗത്തെത്തിയ കോക്രോച്ച് ജനതാ പാർട്ടി (സിജെപി) പ്രവർത്തകർക്ക് താക്കീതുമായി പ്രമുഖ പരിസ്ഥിതി-സാമൂഹിക പ്രവർത്തകൻ സോനം വാങ്ചുക്. “വിജയം എപ്പോഴും വിനയത്തോടെയാകണം കൈകാര്യം ചെയ്യേണ്ടത്” എന്ന് അദ്ദേഹം പ്രവർത്തകരെയും രാഷ്ട്രീയ നേതൃത്വത്തെയും ഓർമ്മിപ്പിച്ചു.
വിദ്യാഭ്യാസ മന്ത്രിയുടെ രാജി സമരം ചെയ്തവരുടെ വിജയമാണെന്ന രീതിയിൽ സിജെപി പ്രവർത്തകർ സോഷ്യൽ മീഡിയയിൽ വ്യാപകമായി ആഘോഷ വീഡിയോകൾ പങ്കുവെച്ചിരുന്നു. എന്നാൽ, പ്രക്ഷോഭങ്ങൾ ഒരു രാഷ്ട്രീയ പാർട്ടിയുടെ മാത്രം നേട്ടമല്ലെന്നും ലക്ഷക്കണക്കിന് വിദ്യാർത്ഥികളുടെയും രക്ഷിതാക്കളുടെയും പോരാട്ടമാണെന്നും വാങ്ചുക് പരോക്ഷമായി വ്യക്തമാക്കി. അനാവശ്യമായ ആഹ്ലാദപ്രകടനങ്ങൾ ജനകീയ സമരങ്ങളുടെ ഗൗരവം ചോർത്തിക്കളയുമെന്നും ഉത്തരവാദിത്തമുള്ള രാഷ്ട്രീയ ഇടപെടലുകളാണ് ഉണ്ടാകേണ്ടതെന്നും അദ്ദേഹം ഓർമ്മിപ്പിച്ചു.
സിജെപി നടത്തിയ ആഹ്ലാദപ്രകടനങ്ങൾക്കെതിരെ പൊതുസമൂഹത്തിൽ നിന്നും വലിയ വിമർശനങ്ങൾ ഉയർന്നിരുന്നു. ഈ സാഹചര്യത്തിലാണ് സമരത്തിന്റെ മുഖമായിരുന്ന സോനം വാങ്ചുക് തന്നെ വിഷയത്തിൽ നിലപാട് വ്യക്തമാക്കി രംഗത്തെത്തിയത്. വാങ്ചുക്കിന്റെ പ്രതികരണം സിജെപി നേതൃത്വത്തെ പ്രതിരോധത്തിലാക്കിയിട്ടുണ്ട്.
