പാകിസ്താനിൽ സാമ്പത്തിക-രാഷ്ട്രീയ പ്രതിസന്ധികൾ രൂക്ഷമാകുന്നതിനിടെ ഷെഹ്ബാസ് ഷെരീഫ് സർക്കാർ അഞ്ചുവർഷത്തെ കാലാവധി പൂർത്തിയാക്കുമെന്ന് വ്യക്തമാക്കി ആഭ്യന്തരമന്ത്രി മൊഹ്സിൻ നഖ്‌വി. രാജ്യത്തെ ഭരണസംവിധാനം പൂർണ്ണമായും തകർന്നുവെന്ന (System Collapse) സ്വന്തം പരാമർശം വൻ രാഷ്ട്രീയ കൊടുങ്കാറ്റിന് തിരികൊളുത്തിയതിന് പിന്നാലെയാണ് മാധ്യമങ്ങൾക്ക് മുന്നിൽ വിശദീകരണവുമായി നഖ്‌വി രംഗത്തെത്തിയത്. പാക് സൈനിക മേധാവി ജനറൽ ആസിം മുനീറുമായി അടുത്ത ബന്ധം പുലർത്തുന്ന വ്യക്തിയാണ് മൊഹ്സിൻ നഖ്‌വി എന്നതും ശ്രദ്ധേയമാണ്.
കഴിഞ്ഞ ആഴ്ച നടന്ന പാകിസ്ഥാൻ ഇക്കണോമിക് സമ്മിറ്റിലാണ് രാജ്യത്തെ തകർന്ന ഭരണസംവിധാനത്തെക്കുറിച്ച് മൊഹ്സിൻ നഖ്‌വി തുറന്നടിച്ചത്. ഇതോടെ ഷെഹ്ബാസ് സർക്കാരിന്റെ ഭാവിയെക്കുറിച്ചും സൈന്യം ഭരണം നേരിട്ട് ഏറ്റെടുക്കുമെന്നതിനെക്കുറിച്ചും അഭ്യൂഹങ്ങൾ ശക്തമായി. തർക്കം രൂക്ഷമായതോടെ വ്യാഴാഴ്ച മാധ്യമങ്ങളെ കണ്ട നഖ്‌വി, “സർക്കാരിന്റെ ഭാവി വ്യക്തമാണ്. ഷെഹ്ബാസ് ഷെരീഫ് തന്നെ അടുത്ത അഞ്ച് വർഷം പ്രധാനമന്ത്രിയായി തുടരും, ഭരണകാലാവധി പൂർത്തിയാക്കും” എന്ന് വ്യക്തമാക്കിയതായി പ്രമുഖ പാക് മാധ്യമമായ ‘ദി ഡോൺ’ റിപ്പോർട്ട് ചെയ്തു.
എങ്കിലും ചരിത്രം പരിശോധിക്കുമ്പോൾ ഇത്തരം പ്രസ്താവനകളെ ഏറെ സംശയത്തോടെയാണ് ലോകരാജ്യങ്ങൾ വീക്ഷിക്കുന്നത്. 1947-ൽ സ്വാതന്ത്ര്യം ലഭിച്ചത് മുതൽ ഇതുവരെ ഒരു പാകിസ്ഥാൻ പ്രധാനമന്ത്രി പോലും തങ്ങളുടെ അഞ്ചുവർഷത്തെ ഭരണം പൂർത്തിയാക്കിയിട്ടില്ല. സൈനിക അട്ടിമറികളും വധശ്രമങ്ങളും നിർബന്ധിത രാജി വയ്ക്കലുകളുമാണ് പാക് രാഷ്ട്രീയ ചരിത്രത്തെ എപ്പോഴും ഭരിച്ചിട്ടുള്ളത്. സൈന്യത്തിന്റെ പിന്തുണയോടെ അധികാരാരൂഢനായ ഷെഹ്ബാസ് ഷെരീഫിന് നിലവിലെ കടുത്ത ആഭ്യന്തര പ്രക്ഷോഭങ്ങൾക്കിടയിൽ കാലാവധി തികയ്ക്കാനാകുമോ എന്ന് കണ്ടുതന്നെ അറിയണം.
