വാർഷിക വരുമാനം 2.5 ലക്ഷം രൂപയിൽ താഴെയുള്ള കുടുംബങ്ങൾക്ക് പ്രതിവർഷം മൂന്ന് സൗജന്യ എൽപിജി സിലിണ്ടറുകൾ നൽകുന്ന ‘അന്നപൂരണി സൂപ്പർ സിക്സ്’ പദ്ധതി ഉൾപ്പെടെയുള്ള സുപ്രധാന ക്ഷേമപദ്ധതികൾ പ്രഖ്യാപിച്ചു. 2027 പൊങ്കൽ മുതൽ പ്രാബല്യത്തിൽ വരുന്ന ഈ പദ്ധതി വഴി 1.30 കോടിയോളം കുടുംബങ്ങൾക്ക് പ്രയോജനം ലഭിക്കും.
ഗുണഭോക്താക്കൾ വാങ്ങുന്ന മൂന്ന് സിലിണ്ടറുകളുടെ തുക നേരിട്ട് അവരുടെ ബാങ്ക് അക്കൗണ്ടിലേക്ക് നൽകുന്നതിലൂടെ സംസ്ഥാന ഖജനാവിന് പ്രതിവർഷം 4,000 കോടി രൂപയുടെ ബാധ്യത വരുമെന്ന് കണക്കാക്കുന്നു. ഗൾഫ് മേഖലയിലെ യുദ്ധസാഹചര്യങ്ങൾ മൂലമുണ്ടാകുന്ന പാചകവാതക ക്ഷാമവും ഉയർന്ന വിലക്കയറ്റവും സാധാരണക്കാർക്ക് സൃഷ്ടിക്കുന്ന സാമ്പത്തിക ഭാരം കുറയ്ക്കുകയാണ് പദ്ധതിയുടെ പ്രധാന ലക്ഷ്യം.
ഇതിനുപുറമെ, ട്രാൻസ്‌ജെൻഡർ വിഭാഗക്കാർക്ക് സൗജന്യ ബസ് യാത്ര അനുവദിക്കുകയും സ്ത്രീകൾക്കായുള്ള സൗജന്യ ബസ് യാത്രാ പദ്ധതിയായ ‘വെട്രി പയണം’ വിപുലീകരിക്കുകയും ചെയ്തു. പുതിയ മാറ്റത്തോടെ സാധാരണ ബസുകൾക്ക് പുറമെ എക്സ്പ്രസ്, എൽഎസ്എസ്, ഡീലക്സ് സർവീസുകളിലും ജില്ലകൾക്കിടയിലുള്ള ദീർഘദൂര സർവീസുകളിലും സ്ത്രീകൾക്ക് സൗജന്യമായി യാത്ര ചെയ്യാം. ഗതാഗതച്ചെലവ് കാരണം തമിഴ്നാട്ടിലെ ഒരു സ്ത്രീക്കും അവസരങ്ങൾ നഷ്ടപ്പെടരുതെന്ന സാമൂഹിക നീതിയുടെ ഭാഗമായി നടപ്പിലാക്കുന്ന ഈ പദ്ധതിക്ക് പ്രതിവർഷം 6,000 കോടി രൂപ ചെലവ് വരും. ഗാന്ധി ജയന്തി ദിനമായ ഒക്ടോബർ രണ്ട് മുതൽ ഈ വിപുലീകരിച്ച പദ്ധതി നിലവിൽ വരും.
ചെന്നൈയ്ക്കടുത്ത് പരന്തൂരിൽ നിർദ്ദേശിച്ച വിമാനത്താവള പദ്ധതിയിൽ നിന്ന് പിന്നോട്ട് പോകാനുള്ള തീരുമാനവും ഔദ്യോഗികമായി അറിയിച്ചു. കർഷകരുടെയും പ്രാദേശിക ജനങ്ങളുടെയും താത്പര്യങ്ങൾ സംരക്ഷിച്ചുകൊണ്ട് മാത്രമേ വികസനം സാധ്യമാകൂ എന്നും, ജനങ്ങളെ കുടിയൊഴിപ്പിക്കാത്ത മറ്റ് അനുയോജ്യമായ സ്ഥലങ്ങൾ പുതിയ വിമാനത്താവളത്തിനായി പരിശോധിക്കുകയാണെന്നും വ്യക്തമാക്കി. ഒപ്പം നിലവിലെ ചെന്നൈ മീനമ്പാക്കം വിമാനത്താവളത്തിൽ പുതിയ ടെർമിനൽ 5 നിർമ്മിക്കുമെന്നും അറിയിച്ചിട്ടുണ്ട്.
