ഗുവാഹത്തി: പാകിസ്താൻ ആസ്ഥാനമായി പ്രവർത്തിക്കുന്ന ഭീകരശൃംഖലയുമായി അടുത്ത ബന്ധമുണ്ടെന്ന് ആരോപിക്കപ്പെടുന്ന 31-കാരനെ അസാം പോലീസിന്റെ സ്‌പെഷ്യൽ ടാസ്‌ക് ഫോഴ്‌സ് (STF) അറസ്റ്റ് ചെയ്തു. നൽബാരി ജില്ലയിലെ ബെൽസോർ ഗ്രാമവാസിയായ മൃഗൻ സലോയി ആണ് പിടിയിലായത്. ഓഗസ്റ്റ് 31-ന് കാമ്രൂപ്പ് ജില്ലയിലെ ചാങ്സാരിയിലുള്ള ഗൗരിപൂരിലെ വാടകവീട്ടിൽ നിന്നാണ് ഇയാളെ എസ്ടിഎഫ് സംഘം സാഹസികമായി പിടികൂടിയത്. കഴിഞ്ഞ ഒരു വർഷമായി പ്രദേശത്തെ സ്വകാര്യ ഉൽപ്പാദന യൂണിറ്റിൽ ജോലി ചെയ്തു വരികയായിരുന്നു ഇയാൾ.
പ്രതിയിൽ നിന്ന് ദേശവിരുദ്ധ വിവരങ്ങളും നിർണ്ണായക രേഖകളും അടങ്ങിയ ഇലക്ട്രോണിക് ഉപകരണങ്ങളും രേഖകളും പിടിച്ചെടുത്തതായി എസ്ടിഎഫ് ഉദ്യോഗസ്ഥർ സ്ഥിരീകരിച്ചു. പാകിസ്താൻ ചാരസംഘടനയായ ഐഎസ്ഐയുടെ (ISI) നേരിട്ടുള്ള നിയന്ത്രണത്തിൽ പ്രവർത്തിക്കുന്ന ഷെഹ്സാദ് ഭാട്ടി നെറ്റ്‌വർക്കുമായി (SBN) ഇയാൾക്ക് അടുത്ത ബന്ധമുണ്ടെന്നാണ് നിഗമനം. എൻക്രിപ്റ്റ് ചെയ്ത ആശയവിനിമയ മാർഗ്ഗങ്ങൾ ഉപയോഗിച്ച് പാകിസ്താൻ ആസ്ഥാനമായുള്ള ഹാൻഡ്‌ലർമാരുമായി ഇയാൾ നേരിട്ട് ബന്ധപ്പെട്ടിരുന്നതായി അന്വേഷണത്തിൽ കണ്ടെത്തിയിട്ടുണ്ട്.
ഈ കേസിൽ അസാം പോലീസിന്റെ പിടിയിലാകുന്ന അഞ്ചാമത്തെ ആളാണ് മൃഗൻ സലോയി. നേരത്തെ ധുബ്രി, ചിരാങ്, ബാർപേട്ട, ഹൈലാകണ്ഡി എന്നീ ജില്ലകളിൽ നിന്നും സമാനമായ രീതിയിൽ സംഘത്തിലെ മറ്റ് കണ്ണികളെ അറസ്റ്റ് ചെയ്തിരുന്നു. ഇയാൾക്ക് ഭീകരശൃംഖലയുമായുള്ള ബന്ധത്തിന്റെ ആഴവും വ്യാപ്തിയും എത്രത്തോളമുണ്ടെന്നും, ഈ മാഫിയാ ശൃംഖലയിൽ പ്രദേശവാസികളായ കൂടുതൽ ആളുകൾ ഉൾപ്പെട്ടിട്ടുണ്ടോയെന്നും കണ്ടെത്തുന്നതിനായി അന്വേഷണം ശക്തമാക്കിയിരിക്കുകയാണ് പോലീസ്.
