പ്രധാനമന്ത്രി നരേന്ദ്ര മോദിയുടെ ക്ഷണപ്രകാരം മൂന്ന് ദിവസത്തെ ഔദ്യോഗിക സന്ദർശനത്തിനായി ബെൽജിയം പ്രധാനമന്ത്രി ബാർട്ട് ഡി വെവർ (Bart De Wever) ഇന്ത്യയിലെത്തി. സെപ്റ്റംബർ 2 മുതൽ 4 വരെ നീളുന്ന സന്ദർശനത്തിൽ ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ശക്തമാക്കുന്നതിനും വ്യാപാരം, നിക്ഷേപം, പ്രതിരോധം, സാങ്കേതികവിദ്യ, കണക്റ്റിവിറ്റി എന്നീ മേഖലകളിൽ സഹകരണം വിപുലീകരിക്കുന്നതിനും ലക്ഷ്യമിട്ടാണ് കൂടിക്കാഴ്ചകൾ ക്രമീകരിച്ചിരിക്കുന്നത്. ഡൽഹിയിലെത്തിയ ബെൽജിയം പ്രധാനമന്ത്രിയെ കേന്ദ്ര പ്രതിരോധ സഹമന്ത്രി സഞ്ജയ് സേത്ത് വിമാനത്താവളത്തിൽ സ്വീകരിച്ചു.
കഴിഞ്ഞ രണ്ട് പതിറ്റാണ്ടിനിടെ ആദ്യമായാണ് ഒരു ബെൽജിയൻ പ്രധാനമന്ത്രി ഇന്ത്യ സന്ദർശിക്കുന്നത്. ബെൽജിയം പ്രതിരോധ-വിദേശവ്യാപാര മന്ത്രി തിയോ ഫ്രാങ്കൻ, പ്രമുഖ വ്യവസായികൾ, പ്രതിരോധ മേഖലയിലെ ഉന്നത ഉദ്യോഗസ്ഥർ എന്നിവരടങ്ങുന്ന ഉന്നതതല സംഘവും അദ്ദേഹത്തോടൊപ്പമുണ്ട്. സന്ദർശനത്തിന്റെ ഭാഗമായി പ്രധാനമന്ത്രി നരേന്ദ്ര മോദിയുമായി ഡി വെവർ ഉഭയകക്ഷി ചർച്ചകൾ നടത്തി. ഇന്ത്യ-യൂറോപ്യൻ യൂണിയൻ സ്വതന്ത്ര വ്യാപാര കരാറിന്റെ (FTA) പശ്ചാത്തലത്തിൽ കോൺഫെഡറേഷൻ ഓഫ് ഇന്ത്യൻ ഇൻഡസ്ട്രി (CII) സംഘടിപ്പിക്കുന്ന ബിസിനസ് സമ്മേളനത്തിലും അദ്ദേഹം മുഖ്യപ്രഭാഷണം നടത്തും.
ന്യൂഡൽഹിയിലെ പരിപാടികൾക്ക് ശേഷം സെപ്റ്റംബർ 4-ന് മുംബൈ സന്ദർശിക്കുന്ന ഡി വെവർ രത്നവ്യാപാരം, തുറമുഖം, ലോജിസ്റ്റിക്സ് തുടങ്ങിയ മേഖലകളിലെ പ്രമുഖരുമായി കൂടിക്കാഴ്ച നടത്തും. 2025-26 സാമ്പത്തിക വർഷത്തിൽ 13.01 ശതകോടി ഡോളറിന്റെ ഉഭയകക്ഷി വ്യാപാരം നടന്ന ഇരുരാജ്യങ്ങളും തമ്മിൽ വജ്രവ്യാപാരത്തിലും പുനരുപയോഗ ഊർജ്ജ മേഖലയിലും വലിയ സഹകരണമാണുള്ളത്. ഐക്യരാഷ്ട്രസഭയുടെ രക്ഷാസമിതിയിൽ (UNSC) ഇന്ത്യയുടെ സ്ഥിരാംഗത്വത്തെ പിന്തുണയ്ക്കുന്ന ബെൽജിയവുമായുള്ള ഈ ഉന്നതതല സന്ദർശനം ഇന്ത്യ-യൂറോപ്പ് നയതന്ത്ര ബന്ധത്തിൽ നിർണ്ണായക നാഴികക്കല്ലാകും.
