പഹൽഗാം ഭീകരാക്രമണമടക്കം നിരവധി ക്രൂരകൃത്യങ്ങൾക്ക് പിന്നിൽ പ്രവർത്തിച്ച ലഷ്‌കർ-ഇ-തൊയ്ബയുടെ ‘പീർ പഞ്ചാൾ’ ഭീകരസംഘത്തെ ഇന്ത്യൻ സുരക്ഷാസേന പൂർണ്ണമായും വധിച്ചു. നാലംഗ ഭീകരസംഘത്തിലെ അവസാനത്തെ ആളായ മുഹമ്മദ് ആസിഫ് എന്ന ഹാഷിം മൂസയെ കഴിഞ്ഞ ദിവസം ബുഡ്ഗാമിലെ വനമേഖലയിൽ നടന്ന ഏറ്റുമുട്ടലിൽ സൈന്യം വധിച്ചതോടെയാണ് വർഷങ്ങൾ നീണ്ട തിരച്ചിലിന് വിരാമമായത്. പാകിസ്ഥാൻ ആർമി മുൻ ഉദ്യോഗസ്ഥന്റെ മകനായ ഹാഷിം മൂസ 2023-ലാണ് ഇന്ത്യയിലേക്ക് നുഴഞ്ഞുകയറിയത്. ഇതോടെ ജമ്മു കശ്മീരിൽ ഭീതി വിതച്ച മുതിർന്ന ലഷ്‌കർ കമാൻഡർമാരുടെ സംഘം പൂർണ്ണമായി ഇല്ലാതായതായി കേന്ദ്ര ആഭ്യന്തര മന്ത്രാലയം സ്ഥിരീകരിച്ചു.
2023 ഡിസംബറിൽ പൂഞ്ചിലെ ദേര കി ഗലിയിൽ നാല് സൈനികരുടെ വീരമൃത്യുവിനിടയാക്കിയ ആക്രമണത്തിലൂടെയാണ് ഈ സംഘം ശ്രദ്ധയിൽപ്പെടുന്നത്. തുടർന്ന് പീർ പഞ്ചാൾ മലനിരകളിലെ സാന്ദ്രമായ വനമേഖല മറയാക്കി ഒളിവിൽ കഴിഞ്ഞ ഇവർ സുരക്ഷാസേനയുടെ വാഹനങ്ങൾക്കും തീർത്ഥാടകർക്കും നേരെ നിരന്തരം ആക്രമണങ്ങൾ അഴിച്ചുവിട്ടു. 26 പേർ കൊല്ലപ്പെട്ട പഹൽഗാമിലെ ഭീകരാക്രമണം, റിയാസിയിൽ തീർത്ഥാടകരുടെ ബസിന് നേരെയുണ്ടായ വെടിവെപ്പ്, ഗന്ദർബാൽ നിർമ്മാണ മേഖലയിലെ ആക്രമണം തുടങ്ങി നിരവധി ക്രൂരകൃത്യങ്ങളിൽ ഈ സംഘത്തിന് പങ്കുണ്ടായിരുന്നു. ജംഗിൾ വാർഫെയറിൽ പ്രത്യേക പരിശീലനം ലഭിച്ച ഇവർ പ്രാദേശിക സഹായത്തോടെയാണ് വനത്തിനുള്ളിൽ കഴിഞ്ഞുകൂടിയിരുന്നത്.
സുരക്ഷാസേനയുടെ കൃത്യമായ നിരീക്ഷണത്തിനും ആസൂത്രിതമായ തിരച്ചിലുകൾക്കുമൊടുവിലാണ് നാലുപേരെയും വെവ്വേറെ ഏറ്റുമുട്ടലുകളിൽ വധിക്കാൻ സാധിച്ചത്. സംഘത്തിലെ ജുനൈദ് റംസാൻ ഭട്ടിനെ 2024 ഡിസംബറിലും, സുലൈമാൻ എന്ന ഫൈസൽ ജട്ടിനെ 2025 ജൂലൈയിലും, യാസിറിനെ 2025 സെപ്റ്റംബറിലും സുരക്ഷാസേന വധിച്ചിരുന്നു. ഒടുവിൽ ബുഡ്ഗാമിൽ വെച്ച് ഹാഷിം മൂസയെക്കൂടി വധിച്ചതോടെ ലഷ്‌കറിന്റെയും അതിന്റെ ഉപസംഘടനയായ ദ റസിസ്റ്റൻസ് ഫ്രണ്ടിന്റെയും (TRF) കശ്മീരിലെ പ്രധാന ശൃംഖലയ്ക്കാണ് തിരിച്ചടിയേറ്റത്. കാടുകൾ കേന്ദ്രീകരിച്ച് ഒളിപ്പോര് നടത്തിയിരുന്ന ഭീകരരെ അതേ വനമേഖലയിൽ തന്നെ വളഞ്ഞ് വധിക്കാൻ കഴിഞ്ഞത് ഇന്ത്യൻ സുരക്ഷാസേനയുടെ വൻ വിജയമായി വിലയിരുത്തപ്പെടുന്നു.
