കൊച്ചി: ഗുരുതര പരിക്കുകളെ തുടർന്ന് ദയാവധം നടപ്പാക്കാൻ ആലോചിച്ചിരുന്ന കോടനാട് അഭയാരണ്യത്തിലെ 18 മാസം പ്രായമുള്ള ‘മായ’ എന്ന ആനക്കുട്ടിക്ക് ഇനി ജീവിതത്തിലേക്ക് വഴിതുറക്കുന്നു. കൊച്ചി നെടുമ്പാശ്ശേരി അന്താരാഷ്ട്ര വിമാനത്താവളത്തിൽ (CIAL) നിന്ന് പ്രത്യേക ചാർട്ടേഡ് വിമാനമാർഗം ആനക്കുട്ടിയെ ഗുജറാത്തിലെ ജാംനഗറിലുള്ള വൻതാരയിലെ അത്യാധുനിക മൃഗസംരക്ഷണ കേന്ദ്രത്തിലേക്ക് കൊണ്ടുപോയി. ആനക്കുട്ടിയുടെ സുരക്ഷിതമായ യാത്രയ്ക്കായി പ്രത്യേകം സജ്ജമാക്കിയ സിലിണ്ടർ ആകൃതിയിലുള്ള പ്രത്യേക പെട്ടിയിലാണ് വിമാനത്തിൽ കയറ്റിയത്.
ജനിച്ചതിന്റെ പിറ്റേന്ന് തന്നെ കാട്ടാനക്കൂട്ടം ഉപേക്ഷിച്ച നിലയിലാണ് ആനക്കുട്ടിയെ വനംവകുപ്പിന് ലഭിക്കുന്നത്. ജനിതക വൈകല്യങ്ങളും എല്ലുകളെ ബാധിക്കുന്ന രോഗങ്ങളും (ഓസ്റ്റിയോപീനിയ) തരണം ചെയ്ത് അഭയാരണ്യത്തിലെ ജീവനക്കാരുടെ കരുതൽ പരിചരണത്തിൽ വളർന്നുവരവെയാണ് അടുത്തിടെ വീഴ്ചയിൽ ആനക്കുട്ടിക്ക് ഗുരുതരമായി പരിക്കേൽക്കുന്നത്. മാസങ്ങളോളം എഴുന്നേറ്റുനിൽക്കാൻ പോലും കഴിയാതെ കിടപ്പിലായതോടെ, കേരളത്തിലെ പരിമിതമായ ചികിത്സാ സൗകര്യങ്ങൾ മുൻനിർത്തി വനംവകുപ്പ് ദയാവധം നടപ്പാക്കുന്നതിനെക്കുറിച്ച് ആലോചിക്കുകയായിരുന്നു.
എങ്കിലും വനപാലകരുടെ കടുത്ത എതിർപ്പും മൃഗസ്നേഹികളുടെ ഇടപെടലും ഒടുവിൽ വഴിത്തിരിവായി. ദയാവധ നടപടികളിലേക്ക് നീങ്ങുന്നതിനിടെയാണ് റിലയൻസിന്റെ നേതൃത്വത്തിലുള്ള വൻതാരയിലെ വിദഗ്ധ ഡോക്ടർമാർ നേരിട്ടെത്തി പരിശോധന നടത്തിയതും ആനക്കുട്ടിയുടെ ചികിത്സ സൗജന്യമായി ഏറ്റെടുക്കാൻ സന്നദ്ധത അറിയിച്ചതും. എൻഡോസ്കോപ്പി, ജീൻ തെറാപ്പി, ഹോർമോൺ തെറാപ്പി, ഹൈഡ്രോ തെറാപ്പി തുടങ്ങിയ ലോകോത്തര ശാസ്ത്രീയ മാർഗ്ഗങ്ങളിലൂടെ ആറുമാസത്തിനുള്ളിൽ കുട്ടിയാനയ്ക്ക് ആരോഗ്യം വീണ്ടെടുക്കാനാകുമെന്നാണ് വൻതാരയിലെ വെറ്ററിനറി ഡോക്ടർമാരുടെ വിലയിരുത്തൽ. 80-ഓളം മുഴുവൻ സമയ ഡോക്ടർമാരും ആനകൾക്കായുള്ള പ്രത്യേക ആംബുലൻസും ഹോട്ട് സ്പാ സൗകര്യങ്ങളുമുള്ള വൻതാരയിൽ ആനക്കുട്ടിക്ക് പൂർണ സൗഖ്യം ലഭിക്കുമെന്ന പ്രതീക്ഷയിലാണ് പ്രകൃതി സ്നേഹികൾ.
