അയൽരാജ്യമായ ബംഗ്ലാദേശിലെ ധാക്കയിലെ അതിദരിദ്ര ചേരിപ്രദേശങ്ങളിൽ ലൈവ് സ്ട്രീമിംഗ് നടത്തി, അത് ഇന്ത്യയിലെ കാഴ്ചകളാണെന്ന് വരുത്തിതീർക്കാൻ ചൈനീസ് വ്ലോഗർമാരുടെ ആസൂത്രിത നീക്കം. ചൈനീസ് സോഷ്യൽ മീഡിയ പ്ലാറ്റ്‌ഫോമുകളിലൂടെ ലക്ഷക്കണക്കിന് ആളുകളിലേക്ക് ഇന്ത്യയ്ക്കെതിരെയുള്ള കുപ്രചാരണങ്ങൾ എത്തിക്കുന്ന വൻ വ്യാജപ്രചാരണ ശൃംഖലയെക്കുറിച്ചുള്ള ഞെട്ടിക്കുന്ന റിപ്പോർട്ടുകൾ പുറത്തുവന്നു. ബംഗ്ലാദേശിലെ പ്രമുഖ മാധ്യമമായ ‘പ്രഥം ആലോ’യും (Prothom Alo) ‘ദി ബിസിനസ് സ്റ്റാൻഡേർഡു’മാണ് ഈ ചൈനീസ് സംഘത്തിന്റെ തട്ടിപ്പ് പുറത്തുകൊണ്ടുവന്നത്.
ധാക്കയിലെ ഉത്തരാ സെക്ടർ 12, ടെക്പാറ തുടങ്ങിയ പാവപ്പെട്ട തൊഴിലാളികൾ താമസിക്കുന്ന ചേരികളിലാണ് നൂറ്റമ്പതോളം വരുന്ന ചൈനീസ് പൗരന്മാർ ക്യാമറകളുമായി ദിവസങ്ങളോളം തമ്പടിക്കുന്നത്. ഇവിടെനിന്നുള്ള ദൃശ്യങ്ങൾ തത്സമയം സംപ്രേക്ഷണം ചെയ്യുമ്പോൾ, തങ്ങൾ നിൽക്കുന്നത് ഭാരതത്തിന്റെ തലസ്ഥാനമായ ന്യൂഡൽഹിയിലാണെന്നാണ് ചൈനീസ് പ്രേക്ഷകരോട് ഇവർ പറയുന്നത്. ‘മിയാൻമിയാൻ’ എന്ന പേരുള്ള ചൈനീസ് വ്ലോഗർ ഒരു അഴുക്കുചാലിന് സമീപം നിന്ന് നടത്തിയ ലൈവ് സ്ട്രീമിംഗിൽ, “ഇതാണ് ന്യൂഡൽഹി. ഇവിടുത്തെ വീടുകൾ വളരെ വൃത്തിഹീനമാണ്. അടിസ്ഥാന വികസനമില്ല, ക്രമസമാധാന നില തകർന്നിരിക്കുകയാണ്” എന്നിങ്ങനെയാണ് ചൈനീസ് ഭാഷയിൽ വിശദീകരിച്ചത്. പ്രദേശത്തെ ചായക്കടയിൽ നിന്ന് തത്സമയ ദൃശ്യങ്ങൾ പകർത്തിയ മറ്റൊരു വ്ലോഗർ, പ്രദേശവാസികൾ കുടിക്കുന്നത് പശുവിൻ മൂത്രം കലർത്തിയ ചായയാണെന്ന തരത്തിൽ അങ്ങേയറ്റം അപകീർത്തികരമായ അവകാശവാദവും ഉന്നയിച്ചു.
ചൈനീസ് വ്ലോഗർമാരുടെ അനാവശ്യ ചിത്രീകരണവും അനുവാദമില്ലാതെ വീടുകളിലേക്ക് അതിക്രമിച്ചുകയറുന്നതും ധാക്കയിലെ പ്രാദേശിക ജനങ്ങൾക്കിടയിൽ കടുത്ത രോഷത്തിന് കാരണമായിട്ടുണ്ട്. സ്ത്രീകളുടെ സ്വകാര്യതയെപ്പോലും ചോദ്യം ചെയ്യുന്ന തരത്തിലാണ് ഇവരുടെ പെരുമാറ്റമെന്ന് നാട്ടുകാർ ആരോപിക്കുന്നു. ചൈനയെ മറികടന്ന് ഇന്ത്യ അതിവേഗം വളരുന്ന സാമ്പത്തിക ശക്തിയായി മാറുന്നതിലും അന്താരാഷ്ട്ര കമ്പനികൾ ഇന്ത്യയിലേക്ക് നിക്ഷേപം മാറ്റുന്നതിലുമുള്ള അസ്വസ്ഥതയാണ് ഇത്തരം ആസൂത്രിതമായ അപവാദ പ്രചാരണങ്ങൾക്ക് (Disinformation Campaign) പിന്നിലെന്നാണ് നിരീക്ഷകർ വിലയിരുത്തുന്നത്. സംഭവത്തെക്കുറിച്ച് ബംഗ്ലാദേശ് അധികൃതർ കൂടുതൽ അന്വേഷണം നടത്തിവരികയാണ്.
