രാജസ്ഥാനിലെ ഡൽഹി–മുംബൈ എക്സ്പ്രസ് വേയിലുണ്ടായ വാഹനാപകടത്തിൽ ഇന്ത്യൻ സൈനികന് വീരമൃത്യു. മറ്റൊരു സൈനികന് പരിക്കേറ്റു. കോട്ട ജില്ലയിലെ ജാലിംപുര ടോൾ പ്ലാസയ്ക്ക് സമീപം തിങ്കളാഴ്ച ഉച്ചയ്ക്ക് രണ്ടുമണിയോടെയാണ് അപകടം സംഭവിച്ചത്. സൈനികർ സഞ്ചരിച്ചിരുന്ന ട്രക്ക് റോഡരികിൽ നിർത്തിയിട്ടിരിക്കുകയായിരുന്നു. ഈ സമയത്ത് അമിതവേഗത്തിലെത്തിയ ട്രെയിലർ പിന്നിൽ നിന്ന് സൈനിക വാഹനത്തിലേക്ക് ഇടിച്ചുകയറുകയായിരുന്നു. അപകടത്തിൽ മരിച്ച സൈനികൻ ആന്ധ്രാപ്രദേശിലെ വിജയവാഡ സ്വദേശിയായ ഹവിൽദാർ നാരായൺ ലാൽ (30) ആണെന്ന് തിരിച്ചറിഞ്ഞു. കോട്ടയിൽ സൈനിക സേവനത്തിലായിരുന്നു അദ്ദേഹം. പരിക്കേറ്റ ദീപക് (35) എന്ന സൈനികനെ ഉടൻ ആശുപത്രിയിൽ പ്രവേശിപ്പിച്ചു.
ട്രെയിലറിൽ നിറച്ചിരുന്നത് ഒഴിഞ്ഞ ഗ്യാസ് സിലിണ്ടറുകളായിരുന്നു. അപകടത്തെ തുടർന്ന് ഇവ റോഡിലേക്ക് ചിതറിവീണു. ഇത് എക്സ്പ്രസ് വേയിൽ കുറച്ചുസമയം ഗതാഗത തടസ്സത്തിനും പരിഭ്രാന്തിക്കും കാരണമായി. വിവരമറിഞ്ഞ് സുൽത്താൻപൂർ പൊലീസ് സ്ഥലത്തെത്തി രക്ഷാപ്രവർത്തനം നടത്തി. ഇരുവരെയും സമീപത്തെ കമ്മ്യൂണിറ്റി ഹെൽത്ത് സെന്ററിലേക്ക് മാറ്റി. അവിടെ എത്തിയപ്പോഴേക്കും നാരായൺ ലാൽ മരിച്ചതായി ഡോക്ടർമാർ സ്ഥിരീകരിച്ചു. പരിക്കേറ്റ ദീപക്കിനെ പിന്നീട് കോട്ടയിലെ സൈനിക ആശുപത്രിയിലേക്ക് മാറ്റി. മരിച്ച സൈനികന്റെ മൃതദേഹം പോസ്റ്റ്‌മോർട്ടത്തിനായി അയച്ചു.
കോട്ടയിൽ നിന്ന് മറ്റ് സൈനിക വാഹനങ്ങൾക്കൊപ്പമാണ് അപകടത്തിൽപ്പെട്ട ട്രക്ക് യാത്ര ചെയ്തിരുന്നതെന്ന് പൊലീസ് അറിയിച്ചു. ജാലിംപുരയ്ക്ക് സമീപം വാഹനം നിർത്തിയ സമയത്താണ് ഗ്യാസ് സിലിണ്ടറുകളുമായി എത്തിയ ട്രെയിലർ പിന്നിൽ നിന്ന് ഇടിച്ചത്. സംഭവത്തിൽ ട്രെയിലർ ഡ്രൈവറെ പൊലീസ് കസ്റ്റഡിയിലെടുത്തിട്ടുണ്ട്. ഇയാൾക്കെതിരെ ബന്ധപ്പെട്ട വകുപ്പുകൾ പ്രകാരം കേസെടുത്തതായും കൂടുതൽ അന്വേഷണം നടക്കുന്നതായും സുൽത്താൻപൂർ പൊലീസ് അറിയിച്ചു. അപകടത്തിന്റെ കൃത്യമായ കാരണവും ഡ്രൈവറുടെ അശ്രദ്ധയോ അമിതവേഗമോ എത്രത്തോളം കാരണമായെന്നതും അന്വേഷണത്തിലൂടെ വ്യക്തമാകും. സംഭവത്തെ തുടർന്ന് സൈനിക ഉദ്യോഗസ്ഥരെയും വിവരം അറിയിച്ചിട്ടുണ്ട്.
