ലോകത്തിലെ ഏറ്റവും ശ്രദ്ധേയമായ സാഹിത്യ പുരസ്കാരങ്ങളിലൊന്നായ ബുക്കർ പ്രൈസ് നേടി ചരിത്രം സൃഷ്ടിച്ചിരിക്കുകയാണ് 81കാരനായ ബ്രിട്ടീഷ് എഴുത്തുകാരൻ എം. ജോൺ ഹാരിസൺ. 2026ലെ ബുക്കർ പുരസ്കാരമാണ് അദ്ദേഹത്തിന്റെ ‘ദി എൻഡ് ഓഫ് എവരിതിങ്’ (The End of Everything) എന്ന നോവലിന് ലഭിച്ചത്. ഇതോടെ ബുക്കർ പുരസ്കാര ചരിത്രത്തിലെ ഏറ്റവും പ്രായം കൂടിയ ജേതാവായി അദ്ദേഹം മാറി. 2019ൽ 79-ാം വയസ്സിൽ പുരസ്കാരം നേടിയ മാർഗരറ്റ് അറ്റ്വുഡിന്റെ റെക്കോർഡാണ് ഹാരിസൺ മറികടന്നത്. കൂടാതെ, പരമ്പരാഗത സയൻസ് ഫിക്ഷൻ സാഹിത്യലോകത്തുനിന്ന് ബുക്കർ പുരസ്കാരം നേടുന്ന ആദ്യ എഴുത്തുകാരനെന്ന നേട്ടവും അദ്ദേഹത്തിന് സ്വന്തമായി.
ലണ്ടനിൽ നവംബർ 9ന് നടന്ന ചടങ്ങിലാണ് പുരസ്കാരം പ്രഖ്യാപിച്ചത്. 50,000 പൗണ്ട് സമ്മാനത്തുകയും ബുക്കർ ട്രോഫിയുമാണ് അദ്ദേഹത്തിന് ലഭിച്ചത്. ആറ് പതിറ്റാണ്ടിലേറെയായി എഴുത്തുരംഗത്ത് സജീവമായ ഹാരിസണിന്റെ ആദ്യ ബുക്കർ നാമനിർദേശവും ഇതുതന്നെയായിരുന്നു. 1945 ജൂലൈ 26ന് ഇംഗ്ലണ്ടിലെ വാർവിക്‌ഷയറിലെ റഗ്ബിയിലാണ് മൈക്കൽ ജോൺ ഹാരിസൺ എന്ന എം. ജോൺ ഹാരിസൺ ജനിച്ചത്. 1965ൽ ആദ്യ കഥ വിറ്റതോടെയാണ് അദ്ദേഹത്തിന്റെ സാഹിത്യജീവിതം ആരംഭിച്ചത്. പിന്നീട് പ്രശസ്ത സയൻസ് ഫിക്ഷൻ മാസികയായ ‘ന്യൂ വേൾഡ്സ്’ന്റെ ഭാഗമായി. 1969 മുതൽ 1978 വരെ മാസികയുടെ പുസ്തക വിഭാഗത്തിന്റെ ചുമതലയും വഹിച്ചു. സയൻസ് ഫിക്ഷൻ, ഫാന്റസി, സാഹിത്യകഥകൾ തുടങ്ങി വിവിധ മേഖലകളിൽ അദ്ദേഹം നിരവധി രചനകൾ നടത്തി. ‘ക്ലൈംബേഴ്സ്’ എന്ന നോവലിന് 1989ൽ ബോർഡ്മാൻ ടാസ്കർ പുരസ്കാരവും ‘നോവ സ്വിങ്’ എന്ന കൃതിക്ക് 2007ൽ ആർതർ സി ക്ലാർക്ക് പുരസ്കാരവും ലഭിച്ചു. 2020ൽ ‘ദി സൺകെൻ ലാൻഡ് ബിഗിൻസ് ടു റൈസ് എഗെയ്ൻ’ എന്ന നോവലിലൂടെ ഗോൾഡ്സ്മിത്ത്സ് പുരസ്കാരവും നേടി.
ഹാരിസണിന്റെ പതിമൂന്നാമത്തെ നോവലായ ‘ദി എൻഡ് ഓഫ് എവരിതിങ്’ 198 പേജുകൾ മാത്രമുള്ള ഒരു ഡിസ്റ്റോപ്യൻ കൃതിയാണ്. ഭാവിയിലെ ഇംഗ്ലണ്ടിലെ കെന്റ് തീരപ്രദേശമാണ് കഥയുടെ പശ്ചാത്തലം. അജ്ഞാതമായ ഒരു ദുരന്തത്തിനും രൂപം മാറാൻ കഴിയുന്ന ‘ഐഗെട്ടി’ (iGhetti) എന്ന വിചിത്ര ജീവികളുടെ കടന്നുകയറ്റത്തിനും ശേഷം തകർന്ന സമൂഹത്തിൽ ജീവിക്കാൻ ശ്രമിക്കുന്ന ഫിലിപ്പ് ടെന്നന്റും പ്രായമായ അമ്മായി മാർണിയുമാണ് പ്രധാന കഥാപാത്രങ്ങൾ. സമൂഹത്തിലെ നിയമവ്യവസ്ഥകളും സാധാരണ ജീവിതരീതികളും തകർന്നുപോകുന്ന സാഹചര്യത്തിൽ മനുഷ്യർ നേരിടുന്ന ആശയക്കുഴപ്പങ്ങളും ഭയങ്ങളുമാണ് നോവൽ അവതരിപ്പിക്കുന്നത്. സമകാലിക രാഷ്ട്രീയത്തെയും സാമൂഹിക മാറ്റങ്ങളെയും ഭാവിയിലെ ദുരന്തസാഹചര്യങ്ങളിലൂടെ വിമർശനാത്മകമായി അവതരിപ്പിക്കുന്നതാണ് കൃതിയുടെ പ്രത്യേകതയെന്ന് വിധികർത്താക്കൾ വിലയിരുത്തി. പ്രശസ്ത ചരിത്രകാരി മേരി ബിയർഡ് അധ്യക്ഷയായ സമിതിയാണ് ഏകകണ്ഠമായി കൃതി തിരഞ്ഞെടുത്തത്.
