ഇറാനുമായുള്ള യുദ്ധം ഫലത്തിൽ സൈനികമായി അവസാനിച്ചുവെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്. ഇറാന്റെ സൈനികശേഷി തകർത്തുവെന്നും നിലവിൽ യുദ്ധം തുടരേണ്ട സാഹചര്യമില്ലെന്നുമാണ് ട്രംപിന്റെ അവകാശവാദം. നവംബർ 9ന് വൈറ്റ് ഹൗസിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൽറഹ്മാൻ അൽതാനിയുമായി നടത്തിയ കൂടിക്കാഴ്ചയ്ക്ക് പിന്നാലെയായിരുന്നു ട്രംപിന്റെ പ്രതികരണം. ഇറാന്റെ സൈനിക നേതൃത്വവും പ്രതിരോധ സംവിധാനങ്ങളും വലിയ തോതിൽ തകർന്നുവെന്നും നിലവിലെ സ്ഥിതി തുടരാനാണ് അമേരിക്ക ആഗ്രഹിക്കുന്നതെന്നും അദ്ദേഹം പറഞ്ഞു. അതേസമയം, ഇറാന്റെ ആണവപദ്ധതി പൂർണമായി നിയന്ത്രിക്കുന്നതിനുള്ള ദീർഘകാല കരാർ ഉണ്ടാകേണ്ടത് അത്യാവശ്യമാണെന്നും ട്രംപ് വ്യക്തമാക്കി.
പുതിയ സൈനിക നടപടി ഇപ്പോൾ ആവശ്യമാണെന്ന് തോന്നുന്നില്ലെങ്കിലും സാഹചര്യം മാറിയാൽ ഏത് നിമിഷവും ആക്രമണം നടത്താൻ അമേരിക്കൻ സൈന്യം തയ്യാറാണെന്ന് ട്രംപ് മുന്നറിയിപ്പ് നൽകി. അമേരിക്കൻ സൈന്യം ‘ലോക്ക്ഡ് ആൻഡ് ലോഡഡ്’ അവസ്ഥയിലാണെന്നും അദ്ദേഹം പറഞ്ഞു. ഇറാനെതിരായ നാവിക ഉപരോധം തുടരുമെന്നും ഇത് രാജ്യത്തിന്റെ സാമ്പത്തിക മേഖലയെ വലിയ രീതിയിൽ ബാധിക്കുന്നുണ്ടെന്നും ട്രംപ് അവകാശപ്പെട്ടു. യുദ്ധം പുനരാരംഭിക്കേണ്ട സാഹചര്യം ഉണ്ടായാൽ ഇറാനിലെ 38 പാലങ്ങൾ ഉൾപ്പെടെയുള്ള അടിസ്ഥാന സൗകര്യങ്ങൾ ലക്ഷ്യമിടുമെന്നും അദ്ദേഹം നേരത്തെ വ്യക്തമാക്കിയിരുന്നു. അതേസമയം, കഴിഞ്ഞ ദിവസങ്ങളിലും ഇറാന്റെ വ്യോമപ്രതിരോധ സംവിധാനങ്ങൾക്കെതിരെ പരിമിതമായ ആക്രമണങ്ങൾ നടന്നതായാണ് റിപ്പോർട്ടുകൾ. ഹോർമുസ് കടലിടുക്കിലൂടെയുള്ള കപ്പൽ ഗതാഗതവും സംഘർഷത്തെ തുടർന്ന് സാധാരണ നിലയിലേക്ക് മടങ്ങിയിട്ടില്ല.
അതിനിടെ, ഖത്തറിന്റെയും സൗദി അറേബ്യയുടെയും പിന്തുണയോടെ സമാധാനപരമായ പരിഹാരം കണ്ടെത്താനാണ് അമേരിക്ക ശ്രമിക്കുന്നതെന്ന് ട്രംപ് പറഞ്ഞു. ഇറാനുമായി നടക്കുന്ന ചർച്ചകളിൽ പുരോഗതിയുണ്ടെന്നും ശക്തമായ ഒരു കരാറിലെത്താൻ കഴിഞ്ഞാൽ പുതിയ ആക്രമണങ്ങൾ വേണ്ടിവരാനുള്ള സാധ്യത കുറവാണെന്നും അദ്ദേഹം സൂചിപ്പിച്ചു. എന്നാൽ അമേരിക്കയുടെ നാവിക ഉപരോധം അവസാനിപ്പിക്കുക, സാമ്പത്തിക ഉപരോധങ്ങൾ നീക്കുക, യുദ്ധനാശത്തിന് നഷ്ടപരിഹാരം നൽകുക തുടങ്ങിയ ആവശ്യങ്ങളാണ് ഇറാൻ മുന്നോട്ടുവയ്ക്കുന്നത്. ട്രംപിന്റെ യുദ്ധം അവസാനിച്ചെന്ന പ്രസ്താവനയെ ഇറാൻ പ്രതിനിധികൾ സംശയത്തോടെയാണ് കാണുന്നത്. ഔദ്യോഗിക വെടിനിർത്തൽ പ്രഖ്യാപനമോ സമാധാനകരാറോ ഇതുവരെ ഉണ്ടായിട്ടില്ല. അതിനാൽ യുദ്ധം അവസാനിച്ചെന്ന ട്രംപിന്റെ പ്രഖ്യാപനത്തിനിടയിലും പശ്ചിമേഷ്യയിൽ വീണ്ടും സൈനിക സംഘർഷം ഉണ്ടാകാനുള്ള സാധ്യത പൂർണമായി മാറിയിട്ടില്ല.
