ജനങ്ങളുടെ പരാതികൾ പരിഹരിക്കുന്നതിൽ വീഴ്ച വരുത്തിയ 15 സർക്കാർ ഉദ്യോഗസ്ഥരെ സസ്പെൻഡ് ചെയ്ത് ബിഹാർ സർക്കാർ. മുഖ്യമന്ത്രി സമ്രാട്ട് ചൗധരിയാണ് ഉദ്യോഗസ്ഥർക്കെതിരെ അടിയന്തര നടപടിക്ക് ഉത്തരവിട്ടത്. നവംബർ 10ന് പട്നയിലെ മുഖ്യമന്ത്രി സെക്രട്ടേറിയറ്റിൽ നടന്ന സംസ്ഥാനതല ‘സഹയോഗ്’ ജനപരാതി പരിഹാര പരിപാടിക്കിടെയാണ് നടപടി. വിവിധ ജില്ലകളിൽ നിന്നുള്ള ജനങ്ങൾ നേരിട്ട് മുഖ്യമന്ത്രിയെ കണ്ട് പരാതികൾ അറിയിച്ചു. ആകെ 76 പരാതിക്കാരാണ് അന്നത്തെ പരിപാടിയിൽ പങ്കെടുത്തത്. പരാതികൾ സമയബന്ധിതമായി പരിഹരിക്കാതിരിക്കുക, അപേക്ഷകളിൽ കൃത്യമായ നടപടി സ്വീകരിക്കാതിരിക്കുക, യഥാർഥ പ്രശ്നങ്ങൾക്ക് പരിഹാരം കാണാതെ നീട്ടിക്കൊണ്ടുപോകുക തുടങ്ങിയ വീഴ്ചകളാണ് ഉദ്യോഗസ്ഥർക്കെതിരെ കണ്ടെത്തിയത്. സസ്പെൻഷനൊപ്പം ഇവർക്കെതിരെ വകുപ്പുതല അന്വേഷണത്തിനും മുഖ്യമന്ത്രി ഉത്തരവിട്ടു.
റവന്യൂ-ഭൂനികുതി വകുപ്പ്, ഗ്രാമവികസന വകുപ്പ്, നഗരവികസന-ഭവന വകുപ്പ്, പൊതുജനാരോഗ്യ എൻജിനീയറിങ് വകുപ്പ് എന്നിവിടങ്ങളിലെ ജീവനക്കാരാണ് നടപടിക്ക് വിധേയരായത്. സസ്പെൻഡ് ചെയ്തവരിൽ ഒമ്പത് പേർ റവന്യൂ വിഭാഗവുമായി ബന്ധപ്പെട്ട ഉദ്യോഗസ്ഥരാണ്. സർക്കിൾ ഓഫീസർമാർ, ബ്ലോക്ക് ഡെവലപ്‌മെന്റ് ഓഫീസർ, എക്സിക്യൂട്ടീവ് ഓഫീസർ, അസിസ്റ്റന്റ് എൻജിനീയർ, ജൂനിയർ എൻജിനീയർമാർ, റവന്യൂ ജീവനക്കാർ എന്നിവരും പട്ടികയിലുണ്ട്. പരാതികൾ പരിഹരിക്കുന്നതിൽ ഉണ്ടായ വീഴ്ചകൾ പരിശോധിച്ച ശേഷമാണ് സസ്പെൻഷൻ ഉത്തരവ് പുറപ്പെടുവിച്ചത്.
സർക്കാരിന്റെ ‘സഹയോഗ്’ പോർട്ടലിലൂടെ ലഭിക്കുന്ന പരാതികൾ സമയത്തിനുള്ളിൽ തീർപ്പാക്കുന്നതിൽ മാത്രം ഉദ്യോഗസ്ഥർ ശ്രദ്ധ കേന്ദ്രീകരിച്ചാൽ പോരെന്നും പരാതികൾക്ക് ഗുണമേന്മയുള്ള പരിഹാരം ഉറപ്പാക്കണമെന്നും മുഖ്യമന്ത്രി നിർദേശിച്ചു. പ്രശ്നം യഥാർഥത്തിൽ പരിഹരിക്കാതെ അപേക്ഷ തീർപ്പാക്കിയതായി രേഖപ്പെടുത്തുന്ന പ്രവണത അനുവദിക്കില്ലെന്നും അദ്ദേഹം മുന്നറിയിപ്പ് നൽകി. ജില്ലാ മജിസ്‌ട്രേറ്റുമാർ, വകുപ്പ് സെക്രട്ടറിമാർ, മുഖ്യമന്ത്രി സെക്രട്ടേറിയറ്റിലെ ഉദ്യോഗസ്ഥർ എന്നിവർ പരാതികളുടെ പുരോഗതിയും പരിഹാരത്തിന്റെ ഗുണനിലവാരവും നിരന്തരം പരിശോധിക്കണം. ജനങ്ങളോട് മാന്യമായി പെരുമാറുകയും അവരുടെ പ്രശ്നങ്ങൾക്ക് സുതാര്യവും നിഷ്പക്ഷവുമായ പരിഹാരം നൽകുകയും വേണമെന്നും മുഖ്യമന്ത്രി വ്യക്തമാക്കി. പരാതികൾ അവഗണിക്കുന്ന ഉദ്യോഗസ്ഥർക്കെതിരെ ഇനിയും കർശനമായ അച്ചടക്ക നടപടികൾ സ്വീകരിക്കുമെന്ന മുന്നറിയിപ്പും അദ്ദേഹം നൽകി.
