ധാക്ക/ന്യൂഡൽഹി: ഭരണം നഷ്ടപ്പെട്ട് ഇന്ത്യയിൽ അഭയം തേടിയ ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീന നാട്ടിലേക്ക് തിരിച്ചെത്തിയാൽ അവർക്ക് മുൻപിൽ വധശിക്ഷ ഏറ്റുവാങ്ങുകയല്ലാതെ മറ്റ് വഴികളില്ലെന്ന് ബംഗ്ലാദേശ് അന്താരാഷ്ട്ര കുറ്റകൃത്യ ട്രൈബ്യൂണൽ (ICT). ന്യൂഡൽഹിയിലെ ബംഗ്ലാദേശ് ഹൈക്കമ്മീഷൻ വഴി ഹസീന പുതിയ പാസ്‌പോർട്ടിനും ഐഡന്റിറ്റി കാർഡിനുമായി അപേക്ഷ സമർപ്പിച്ചതിന് പിന്നാലെയാണ് ചീഫ് പ്രോസിക്യൂട്ടർ എം.ഡി. അമിനുൽ ഇസ്ലാം കടുത്ത മുന്നറിയിപ്പുമായി രംഗത്തെത്തിയത്.
2024 ഓഗസ്റ്റിൽ നടന്ന ജനകീയ പ്രക്ഷോഭത്തെ തുടർന്ന് അധികാരം നഷ്ടപ്പെട്ട് ഇന്ത്യയിലേക്ക് കടന്ന ഹസീനയ്‌ക്കെതിരെ വധശിക്ഷാ വിധി നിലനിൽക്കുന്നുണ്ട്. പ്രക്ഷോഭകർക്ക് നേരെയുണ്ടായ ക്രൂരമായ അടിച്ചമർത്തലിനും മാനവികതയ്‌ക്കെതിരായ കുറ്റകൃത്യങ്ങൾക്കുമാണ് ട്രൈബ്യൂണൽ ഹസീനയ്ക്ക് മരണശിക്ഷ വിധിച്ചത്. ഈ വിധിയിൽ അപ്പീൽ നൽകാൻ അനുവദിച്ച നിശ്ചിത സമയപരിധിക്കുള്ളിൽ തിരിച്ചെത്താത്ത ഹസീനയുടെ ഇപ്പോഴത്തെ നീക്കങ്ങൾ നാടകീയമാണെന്ന് പ്രോസിക്യൂഷൻ കുറ്റപ്പെടുത്തി. അതേസമയം, അറസ്റ്റ് ചെയ്യപ്പെടുകയോ കൊല്ലപ്പെടുകയോ ചെയ്താലും ജനങ്ങൾക്കൊപ്പമുള്ള തന്റെ കടമയിൽ നിന്ന് പിന്നോട്ടില്ലെന്നും ഡിസംബറിൽ ബംഗ്ലാദേശിലേക്ക് മടങ്ങുമെന്നുമാണ് ഹസീന നേരത്തെ വ്യക്തമാക്കിയത്.
ലണ്ടനിലെ അഭിഭാഷകർ മുഖേന ഹസീന നൽകിയ അപേക്ഷ ബംഗ്ലാദേശ് ഭരണകൂടം മണിക്കൂറുകൾക്കകം തള്ളി. ഹസീനയെ ഉടൻ വിട്ടുനൽകണമെന്ന് ബംഗ്ലാദേശിലെ പുതിയ സർക്കാർ ഇന്ത്യയോട് തുടർച്ചയായി ആവശ്യപ്പെടുന്നുണ്ട്. 2026 ഫെബ്രുവരിയിലെ പൊതുതിരഞ്ഞെടുപ്പിലൂടെ അധികാരത്തിലെത്തിയ ബംഗ്ലാദേശ് പ്രധാനമന്ത്രി താരിഖ് റഹ്മാനും ഇന്ത്യയുമായുള്ള ബന്ധത്തിൽ വലിയ തണുപ്പൻ നയമാണ് സ്വീകരിക്കുന്നത്. ഡൽഹിയിൽ നടന്ന ബ്രിക്സ് ഉച്ചകോടിയിൽ നിന്നടക്കം താരിഖ് റഹ്മാൻ വിട്ടുനിന്നിരുന്നു. ഹസീനയെ കൈമാറുന്ന വിഷയത്തിൽ ഇന്ത്യ നിലവിൽ നിയമവശങ്ങൾ പരിശോധിച്ച് വരികയാണ്. ഹസീനയുടെ തിരിച്ചുവരവും അതിനോടനുബന്ധിച്ചുള്ള സംഭവവികാസങ്ങളും ദക്ഷിണേഷ്യൻ രാഷ്ട്രീയത്തിൽ വലിയ അനിശ്ചിതത്വമാണ് സൃഷ്ടിച്ചിരിക്കുന്നത്.
