ജമ്മു കാശ്മീരിലെ ഇന്ത്യ-പാകിസ്ഥാൻ അതിർത്തിയിൽ സുരക്ഷ ശക്തമാക്കുന്നതിന് നിർണായക ചുവടുവെപ്പുമായി ഇന്ത്യൻ സൈന്യം. 740 കിലോമീറ്ററിലധികം ദൈർഘ്യമുള്ള നിയന്ത്രണ രേഖയിൽ (LoC) ദുർഘടമായ പ്രദേശങ്ങളിൽ നിരീക്ഷണം ശക്തമാക്കുന്നതിനായി നാല് കാലുകളുള്ള നൂതന ‘റോബോട്ട് നായ്ക്കളെ’ വിന്യസിച്ചു. സൈനികർക്കും പരമ്പരാഗത സൈനിക നായ്ക്കൾക്കുമൊപ്പം ‘MULE’ (മൾട്ടി-യൂട്ടിലിറ്റി ലെഗ്ഗ്ഡ് എക്യുപ്‌മെന്റ്) എന്ന് പേരിട്ടിരിക്കുന്ന ഈ റോബോട്ടുകളും ഇനി അതിർത്തിയിൽ കാവലുണ്ടാകും.
2024 ജൂണിലാണ് ഇത്തരം 100 റോബോട്ടിക് യൂണിറ്റുകളുടെ ആദ്യ ബാച്ച് സൈന്യത്തിന്റെ ഭാഗമായത്. നിലവിൽ ജമ്മു കാശ്മീരിലെ അഖ്നൂർ, രജൗരി തുടങ്ങി അതീവ സുരക്ഷാ പ്രാധാന്യമുള്ള അതിർത്തി മേഖലകളിലാണ് ഇവയെ സജീവമായി വിന്യസിച്ചിരിക്കുന്നത്. സാധാരണ ചക്രങ്ങളുള്ള വാഹനങ്ങൾക്കോ ട്രാക്ക് വാഹനങ്ങൾക്കോ എത്തിച്ചേരാൻ സാധിക്കാത്ത മലനിരകൾ, മഞ്ഞുമൂടിയ പ്രദേശങ്ങൾ, മരുഭൂമികൾ, പുഴകൾ എന്നിവ എളുപ്പത്തിൽ കടന്നുപോകാൻ ഈ റോബോട്ടുകൾക്ക് കഴിയും. 45 ഡിഗ്രി വരെ ചരിവുള്ള പർവതനിരകൾ കയറാൻ ശേഷിയുള്ളവയാണ് ഇവ.
മൈനസ് 40 ഡിഗ്രി സെൽഷ്യസ് മുതൽ പ്ലസ് 55 ഡിഗ്രി സെൽഷ്യസ് വരെയുള്ള കഠിനമായ കാലാവസ്ഥാ വ്യതിയാനങ്ങളെ അതിജീവിച്ച് തടസ്സമില്ലാതെ പ്രവർത്തിക്കാൻ ഈ റോബോട്ട് നായ്ക്കൾക്ക് കഴിയും. അതിർത്തിയിലെ കഠിനമായ സാഹചര്യങ്ങളിൽ സൈനികരുടെ ശാരീരിക അധ്വാനം കുറയ്ക്കുന്നതിനായി 12 കിലോഗ്രാം മുതൽ 15 കിലോഗ്രാം വരെ ഭാരമുള്ള ആയുധങ്ങൾ, റേഷൻ, ഇന്ധനം എന്നിവ പോരാട്ട മേഖലകളിലേക്ക് വഹിച്ചുകൊണ്ടുപോകാനും ഇവയ്ക്ക് ശേഷിയുണ്ട്.
ശത്രുക്കളുടെ നീക്കങ്ങളും ഭീഷണികളും തത്സമയം കണ്ടെത്തുന്നതിനായി 360-ഡിഗ്രി ക്യാമറകൾ, ഇലക്ട്രോ-ഓപ്റ്റിക്സ്, തെർമൽ/ഇൻഫ്രാറെഡ് സാങ്കേതികവിദ്യ, റഡാർ സംവിധാനങ്ങൾ എന്നിവയാണ് ഇവയിൽ സജ്ജീകരിച്ചിട്ടുള്ളത്. രാത്രിയിലടക്കം നുഴഞ്ഞുകയറ്റക്കാരെ കണ്ടെത്താനും സൈന്യത്തിന്റെ ഏറ്റുമുട്ടൽ ദൗത്യങ്ങൾക്കും (അംബുഷ് ഓപ്പറേഷൻസ്) ഇവ വലിയ പിന്തുണ നൽകും.
റോബോട്ടുകൾക്ക് പുറമെ ആർട്ടിഫിഷ്യൽ ഇന്റലിജൻസ് (AI), ഹൈടെക് സെൻസറുകൾ, സ്മാർട്ട് ഫെൻസിംഗ്, സാറ്റലൈറ്റ് ഇന്റഗ്രേഷൻ, ലേസർ അധിഷ്ഠിത കൗണ്ടർ-ഡ്രോൺ സംവിധാനങ്ങൾ എന്നിവയും സംയോജിപ്പിച്ച് അതിർത്തി സുരക്ഷ ചരിത്രത്തിലില്ലാത്തവിധം കരുത്തുറ്റതാക്കുകയാണ് ഇന്ത്യൻ സൈന്യം.
