ട്രെയിൻ യാത്രക്കിടെ വയോധികയുടെ 47 പവൻ സ്വർണം കവർന്നു തമിഴ്നാട്ടിലേക്കു കടന്ന മോഷ്ടാവ് ഒടുവിൽ കേരള പൊലീസിന്റെ പിടിയിൽ. ഇൻസ്റ്റഗ്രാം റീലുകളിലൂടെയും പോസ്റ്റുകളിലൂടെയും വലിയ രീതിയിൽ ഉപദേശങ്ങൾ നൽകുകയും, മോഷണമുതൽ ഉപയോഗിച്ച് നാട്ടുകാർക്ക് വിലപിടിപ്പുള്ള സമ്മാനങ്ങളും ഭക്ഷണവും നൽകി ആഘോഷം കൊഴുക്കുകയും ചെയ്ത ഡിണ്ടിഗൽ സ്വദേശി ബാലമുരളി മുത്തയ്യയെയാണ് (38) പാലക്കാട് റെയിൽവേ പൊലീസും ആർഎഫ്പിയും ചേർന്ന് സാഹസികമായി പിടികൂടിയത്. നേരത്തേ ലാപ്ടോപ് മോഷണക്കേസിലും ഇയാൾ പ്രതിയാണെന്ന് പൊലീസ് വ്യക്തമാക്കി.
ചെന്നൈയിൽ നിന്ന് പേരക്കുട്ടിയുടെ വിവാഹത്തിനായി 47 പവൻ സ്വർണവുമായി ചെങ്ങന്നൂരിലേക്കു ട്രെയിനിൽ യാത്ര ചെയ്യുകയായിരുന്ന ചെങ്ങന്നൂർ സ്വദേശി കുമാരിയുടെ (66) ബാഗാണ് ഇയാൾ തന്ത്രപരമായി കവർന്നത്. തൃശൂരിൽ എത്തിയപ്പോഴാണ് സ്വർണം അടങ്ങിയ ബാഗ് നഷ്ടപ്പെട്ട വിവരം ഇവർ അറിയുന്നത്. തുടർന്ന് ഉടൻ തന്നെ പൊലീസിൽ പരാതി നൽകുകയായിരുന്നു. സംഭവത്തിൽ റെയിൽവേ പൊലീസ് ഊർജിതമായ അന്വേഷണം ആരംഭിക്കുകയും തമിഴ്നാട്ടിലേക്ക് സംഘം തിരിക്കുകയും ചെയ്തു.
കേരളത്തിൽ നിന്ന് ട്രെയിൻ മാർഗ്ഗം പല സ്റ്റേഷനുകൾ കയറിയിറങ്ങിയാണ് പ്രതി തമിഴ്നാട്ടിലെ ഡിണ്ടിഗലിൽ എത്തിയത്. റെയിൽവേ സ്റ്റേഷനുകളിലെ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ മാസ്ക് ധരിച്ചാണ് ഇയാൾ സഞ്ചരിച്ചിരുന്നതെന്ന് പൊലീസ് കണ്ടെത്തി. ഈ സിസിടിവി ദൃശ്യങ്ങളാണ് പ്രതിയെ തിരിച്ചറിയാൻ അന്വേഷണ സംഘത്തിന് നിർണായക തുമ്പായത്.
മോഷണത്തിനു ശേഷം ഡിണ്ടിഗലിലെത്തിയ ഇയാൾ സ്വർണം വിറ്റുകിട്ടിയ പണം ഉപയോഗിച്ച് പിറന്നാളും ദീപാവലിയും ഉൾപ്പെടെയുള്ള ആഘോഷങ്ങൾ വൻതോതിൽ അടിപൊളിയാക്കുകയായിരുന്നു. സുഹൃത്തുക്കൾക്കും നാട്ടുകാർക്കും വിലപിടിപ്പുള്ള സമ്മാനങ്ങൾ വാരിക്കോരി നൽകിയ ഇയാൾ, പാവപ്പെട്ടവർക്ക് ഭക്ഷണവും വസ്ത്രങ്ങളും വിതരണം ചെയ്യുകയും ചെയ്തു. ഇതിനെല്ലാം പുറമേ, സമൂഹമാധ്യമങ്ങളിൽ ഭക്തിനിർഭരമായ ഉപദേശങ്ങളും സന്ദേശങ്ങളും പോസ്റ്റ് ചെയ്യുന്നതാണ് ഇയാളുടെ യഥാർത്ഥ സ്വഭാവം അറിയാത്തവരെ അമ്പരപ്പിച്ചത്.
പ്രതിയെ പിടികൂടാൻ പൊലീസ് ഡിണ്ടിഗലിൽ എത്തിയെങ്കിലും കുടുംബത്തോടൊപ്പം ഒളിവിൽ കഴിഞ്ഞിരുന്ന ഇയാളെ കണ്ടെത്തുക എളുപ്പമായിരുന്നില്ല. ഇതിനിടയിൽ കോയമ്പത്തൂർ പാപ്പാംപെട്ടിയിലെ വാടകവീട്ടിൽ സൂക്ഷിച്ചിരുന്ന സ്വർണം മാറ്റാൻ എത്തിയപ്പോഴാണ് ചൊവ്വാഴ്ച വൈകിട്ട് പൊലീസ് സംഘം ഇയാളെ വളഞ്ഞുപിടിച്ചത്. കവർച്ച ചെയ്ത സ്വർണത്തിൽ നിന്ന് 36.42 പവൻ പൊലീസ് ഇതിനകം കണ്ടെടുത്തു. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
