ലോകം ഇന്ന് വിവിധ പ്രശ്നങ്ങൾക്ക് പരിഹാരം തേടി ഇന്ത്യയിലേക്ക് ഉറ്റുനോക്കുകയാണെന്ന് ആർഎസ്എസ് സർസംഘചാലക് മോഹൻ ഭാഗവത്. ഇന്ത്യയുടെ പരമ്പരാഗത അറിവും അനുഭവങ്ങളും ഉപയോഗിച്ച് ലോകത്തിന് പുതിയ വികസന മാതൃക നൽകാൻ കഴിയുമെന്നും അദ്ദേഹം പറഞ്ഞു. നാഗ്പൂർ ജില്ലയിലെ രാംടെക്കിൽ ദത്താ മെഘെ ഫൗണ്ടേഷൻ ആരംഭിച്ച വെറ്ററിനറി, കാർഷിക കോളേജിന്റെ ഉദ്ഘാടന ചടങ്ങിൽ സംസാരിക്കുകയായിരുന്നു അദ്ദേഹം. മനുഷ്യന്റെ ജീവിതം, മൃഗങ്ങളുടെ ആരോഗ്യം, പ്രകൃതി എന്നിവ തമ്മിൽ അടുത്ത ബന്ധമുണ്ടെന്നും ഇവയെ വേർതിരിച്ച് കാണാനാകില്ലെന്നും അദ്ദേഹം ചൂണ്ടിക്കാട്ടി. സ്വന്തം ക്ഷേമം മാത്രം ലക്ഷ്യമിടാതെ എല്ലാ ജീവജാലങ്ങളുടെയും ക്ഷേമം ഉറപ്പാക്കുന്ന ജീവിതരീതിയാണ് ആവശ്യമെന്നും ഭാഗവത് പറഞ്ഞു.
മനുഷ്യർ പ്രകൃതിയുടെ ഉടമകളല്ലെന്നും പ്രകൃതിയുടെ ഭാഗമാണെന്നും ഭാഗവത് ഓർമിപ്പിച്ചു. ജൈവവൈവിധ്യം, പരിസ്ഥിതി സംരക്ഷണം, മൃഗങ്ങളുടെ ആരോഗ്യം എന്നിവ മനുഷ്യന്റെ നിലനിൽപ്പിന് അത്യാവശ്യമാണ്. മനുഷ്യരുടെയും മൃഗങ്ങളുടെയും പരിസ്ഥിതിയുടെയും ആരോഗ്യം പരസ്പരം ബന്ധപ്പെട്ടിരിക്കുന്ന ‘വൺ ഹെൽത്ത്’ എന്ന ആശയം ഇന്ന് ലോകം കൂടുതൽ പ്രാധാന്യത്തോടെ കാണുന്നുണ്ട്. എന്നാൽ ഈ കാഴ്ചപ്പാട് ഇന്ത്യയുടെ പാരമ്പര്യ ജീവിതരീതിയിൽ നൂറ്റാണ്ടുകളായി നിലനിന്നിരുന്നുവെന്നും അദ്ദേഹം പറഞ്ഞു. മൃഗങ്ങളിൽ നിന്ന് മനുഷ്യരിലേക്ക് രോഗങ്ങൾ പടരാനുള്ള സാധ്യതയും പരിസ്ഥിതി നശിച്ചാൽ മനുഷ്യന്റെ ആരോഗ്യത്തെ ബാധിക്കുന്ന സാഹചര്യങ്ങളും അദ്ദേഹം ചൂണ്ടിക്കാട്ടി. വികസനത്തിനൊപ്പം പ്രകൃതിയെയും സംരക്ഷിക്കണം. വിജയം നേടുമ്പോൾ പിന്നാക്കം നിൽക്കുന്നവരെ മറക്കരുതെന്നും സ്വയം നിയന്ത്രണവും സന്തുലിതമായ ജീവിതരീതിയും വളർത്തണമെന്നും അദ്ദേഹം കൂട്ടിച്ചേർത്തു.
രാജ്യത്തിന്റെ സ്വയംപര്യാപ്തതയ്ക്കും മോഹൻ ഭാഗവത് പ്രത്യേക പ്രാധാന്യം നൽകി. മറ്റുള്ളവരെ അമിതമായി ആശ്രയിക്കുന്നത് രാജ്യങ്ങളെ സമ്മർദങ്ങൾക്കും ചൂഷണത്തിനും വിധേയമാക്കുമെന്ന് അദ്ദേഹം പറഞ്ഞു. ഇന്ത്യയുടെ തനത് അറിവുകളും വിഭവങ്ങളും ശരിയായി ഉപയോഗിക്കണമെന്നും അദ്ദേഹം ആവശ്യപ്പെട്ടു. പാലുത്പാദനം വർധിപ്പിക്കാൻ വിദേശ ഇനങ്ങളിലുള്ള കന്നുകാലികളെ ആശ്രയിച്ചപ്പോൾ തദ്ദേശീയ ഇനങ്ങളുടെ പ്രാധാന്യം വേണ്ടത്ര തിരിച്ചറിഞ്ഞില്ലെന്നും അദ്ദേഹം ചൂണ്ടിക്കാട്ടി. ചടങ്ങിൽ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ് കാലാവസ്ഥാ വ്യതിയാനം കാർഷിക മേഖലയെ ബാധിക്കുന്നതിനെക്കുറിച്ച് സംസാരിച്ചു. കൃഷിയിൽ ഗവേഷണവും നൂതന സാങ്കേതികവിദ്യയും കൂടുതൽ പ്രയോജനപ്പെടുത്തണമെന്ന് അദ്ദേഹം പറഞ്ഞു. കേന്ദ്രമന്ത്രി നിതിൻ ഗഡ്കരിയും ചടങ്ങിൽ പങ്കെടുത്തു. വിദർഭയിലെ ക്ഷീരമേഖലയുടെ വളർച്ചയ്ക്കായി നാഗ്പൂരിലെ മദർ ഡയറി പ്ലാന്റിന്റെ വികസനം സഹായിക്കുമെന്നും അദ്ദേഹം വ്യക്തമാക്കി.
