ഇസ്ലാമാബാദ്: പാകിസ്ഥാനിലെ വടക്കുപടിഞ്ഞാറൻ പ്രവിശ്യയായ ഖൈബർ പഖ്തൂൺഖ്വയിലുണ്ടായ രൂക്ഷമായ ഏറ്റുമുട്ടലിൽ 18 ഭീകരരെയും 10 പോലീസ് ഉദ്യോഗസ്ഥരെയും വധിച്ചു. ബുധനാഴ്ച കൊഹാട്ട് (Kohat) ജില്ലയിലെ ദരാബുക്കാച്ച് മേഖലയിലാണ് രാജ്യത്തെ നടുക്കിയ വെടിവെപ്പുണ്ടായത്. പ്രദേശത്ത് നടക്കുന്ന അനധികൃത സ്വർണ്ണഖനനത്തിനെതിരെ നടപടിയെടുത്ത് മടങ്ങുകയായിരുന്ന പോലീസ് സംഘത്തിന് നേരെ നിരോധിത ഭീകരസംഘടനയായ തെഹ്‌രീകെ-ഇ-താലിബാൻ പാകിസ്ഥാൻ (TTP) പതിയിരുന്ന് ആക്രമണം നടത്തുകയായിരുന്നുവെന്ന് ജിയോ ന്യൂസ് റിപ്പോർട്ട് ചെയ്തു.
ഏറ്റുമുട്ടലിൽ കൊല്ലപ്പെട്ട പോലീസുകാരിൽ ഡെപ്യൂട്ടി സൂപ്രണ്ട് ഓഫ് പോലീസ് (DSP) ഹൈദർ സമാനും ഉൾപ്പെടുന്നു. പ്രദേശത്തെ അനധികൃത സ്വർണ്ണഖനന മാഫിയയുമായി കൈകോർത്താണ് ടി.ടി.പി ഭീകരർ ആക്രമണം ആസൂത്രണം ചെയ്തതെന്ന് ഉന്നത ഉദ്യോഗസ്ഥർ വ്യക്തമാക്കി. ഭീകരസംഘടനകളും പ്രാദേശിക ക്രിമിനൽ ശൃംഖലകളും തമ്മിലുള്ള അവിശുദ്ധ കൂട്ടുകെട്ടിന്റെ വ്യക്തമായ തെളിവാണിതെന്നും, ബാഹ്യശക്തികളുടെ നിർദ്ദേശപ്രകാരമാണ് ഭീകരർ പ്രവർത്തിക്കുന്നതെന്നും അധികൃതർ ആരോപിച്ചു.
ആക്രമണത്തെ പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് ശക്തമായി അപലപിച്ചു. രാജ്യത്തിന്റെ സമാധാനത്തിനും സുരക്ഷയ്ക്കുമായി ജീവൻ ബലിയർപ്പിച്ച പോലീസ് ഉദ്യോഗസ്ഥരെ വീരനായകന്മാർ എന്ന് വിശേഷിപ്പിച്ച അദ്ദേഹം, മരിച്ചവരുടെ കുടുംബാംഗങ്ങളുടെ ദുഃഖത്തിൽ പങ്കുചേരുന്നതായും അറിയിച്ചു. ക്രിമിനൽ സംഘങ്ങളും ടി.ടി.പിയും തമ്മിലുള്ള കൂട്ടുകെട്ട് രാജ്യത്ത് അരാജകത്വം പടർത്താനുള്ള ശ്രമമാണെന്നും, ഭീകരവാദത്തെ പൂർണ്ണമായും തുടച്ചുനീക്കാൻ സർക്കാർ പ്രതിജ്ഞാബദ്ധമാണെന്നും പ്രധാനമന്ത്രി വ്യക്തമാക്കി.
അതിനിടെ, പാകിസ്ഥാനിൽ ഭീകരാക്രമണങ്ങൾ കഴിഞ്ഞ 12 വർഷത്തെ ഏറ്റവും ഉയർന്ന നിരക്കിലേക്ക് എത്തിയതായാണ് റിപ്പോർട്ടുകൾ. ഖൈബർ പഖ്തൂൺഖ്വ, ബലൂചിസ്ഥാൻ പ്രവിശ്യകളിൽ ടി.ടി.പി ഉൾപ്പെടെയുള്ള ഭീകരസംഘടനകൾ ആക്രമണം ശക്തമാക്കിയിരിക്കുകയാണ്. പാകിസ്ഥാൻ ഇൻസ്റ്റിറ്റ്യൂട്ട് ഫോർ കോൺഫ്ലിക്റ്റ് ആൻഡ് സെക്യൂരിറ്റി സ്റ്റഡീസിന്റെ (PICSS) കണക്കുകൾ പ്രകാരം 2026 സെപ്റ്റംബറിൽ മാത്രം 225 ഭീകരാക്രമണങ്ങളാണ് രാജ്യത്ത് രേഖപ്പെടുത്തിയത്. ഓഗസ്റ്റിൽ നടന്ന 199 ആക്രമണങ്ങളെ അപേക്ഷിച്ച് 13 ശതമാനത്തിന്റെ വർദ്ധനവാണിത്.
അഫ്ഗാനിസ്ഥാനിലെ താലിബാൻ ഭരണകൂടം ടി.ടി.പി ഭീകരർക്ക് താവളമൊരുക്കുന്നുവെന്ന് പാകിസ്ഥാൻ ആവർത്തിച്ച് ആരോപിക്കുന്നുണ്ട്. അഫ്ഗാൻ മണ്ണിലിരുന്നാണ് ഭീകരർ പാകിസ്ഥാനിലേക്ക് ആക്രമണങ്ങൾ ആസൂത്രണം ചെയ്യുന്നതെന്നാണ് ഇസ്ലാമാബാദിന്റെ നിലപാട്. എന്നാൽ ഈ ആരോപണങ്ങൾ താലിബാൻ തള്ളിക്കളയുകയാണ്. ഇരുരാജ്യങ്ങളും തമ്മിൽ പലവട്ടം സമാധാന ചർച്ചകൾ നടന്നെങ്കിലും തർക്കങ്ങൾക്ക് ഇതുവരെ പരിഹാരമായിട്ടില്ല.
