തലസ്ഥാന നഗരത്തിന്റെ വികസന കുതിപ്പിന് പുത്തൻ വേഗം പകരാൻ തിരുവനന്തപുരം കോർപ്പറേഷനും ഗുജറാത്തിലെ അഹമ്മദാബാദ് മുനിസിപ്പൽ കോർപ്പറേഷനും കൈകോർക്കുന്നു. ഇരു നഗരങ്ങളെയും ‘ഇരട്ട നഗരങ്ങളായി’ (Twin Cities) ബന്ധിപ്പിച്ചുകൊണ്ടുള്ള സംയുക്ത വികസന നിർദേശത്തിന് സംസ്ഥാന സർക്കാർ ഔദ്യോഗിക അനുമതി നൽകി. മാലിന്യസംസ്കരണം, ജലസ്രോതസ്സുകളുടെ ശുചീകരണം, റോഡ് വികസനം, സാങ്കേതികവിദ്യ കൈമാറ്റം, ധനസമാഹരണം തുടങ്ങിയ സുപ്രധാന മേഖലകളിൽ ഇരു നഗരസഭകളും ഇനി ഒരുമിച്ച് പ്രവർത്തിക്കും.
പദ്ധതിക്ക് അന്തിമരൂപം നൽകുന്നതിനായി ഇന്ന് ചേരുന്ന തിരുവനന്തപുരം കോർപ്പറേഷൻ കൗൺസിൽ യോഗത്തിൽ പ്രമേയം അവതരിപ്പിച്ച് അംഗീകാരം തേടും. രാജ്യത്തെ ഏറ്റവും മികച്ച രീതിയിൽ നഗരവികസനവും മാലിന്യസംസ്കരണവും നടപ്പാക്കുന്ന നഗരങ്ങളിലൊന്നായ അഹമ്മദാബാദിന്റെ പ്രവർത്തന മാതൃകയും സാങ്കേതിക മികവും തിരുവനന്തപുരത്ത് പ്രയോജനപ്പെടുത്തുകയാണ് ലക്ഷ്യം. കൗൺസിൽ അംഗീകാരം ലഭിക്കുന്നതോടെ ഇരു നഗരസഭകളും തമ്മിലുള്ള ഔദ്യോഗിക കരാറിൽ ഒപ്പുവെക്കും.
തലസ്ഥാന നഗരം നേരിടുന്ന ഏറ്റവും വലിയ വെല്ലുവിളിയായ ജലമലിനീകരണത്തിന് ശാശ്വത പരിഹാരം കാണുക എന്നതാണ് സംയുക്ത പദ്ധതിയിലെ പ്രധാന ലക്ഷ്യം. പാർവതി പുത്തനാർ, കരമനയാർ, ആമയിഴഞ്ചാൻ തോട്, കിള്ളിയാർ, ആക്കുളം കായൽ എന്നിവയുടെ സമഗ്ര ശുചീകരണവും നവീകരണവും അഹമ്മദാബാദ് നഗരസഭയുടെ സാങ്കേതിക സഹകരണത്തോടെ നടപ്പാക്കും. സബർമതി നദീതട വികസനം ഉൾപ്പെടെയുള്ള പദ്ധതികളിൽ അഹമ്മദാബാദ് കൈവരിച്ച വിജയം തലസ്ഥാനത്തെ ജലാശയങ്ങളുടെ വീണ്ടെടുപ്പിന് കരുത്താകുമെന്നാണ് വിലയിരുത്തൽ. ഇതിനുപുറമെ നഗരത്തിലെ മാലിന്യസംസ്കരണത്തിനും നിർമാർജനത്തിനുമായി പ്രത്യേക കർമ്മപദ്ധതികളും ആവിഷ്കരിക്കും.
വൻകിട വികസന പദ്ധതികൾക്കാവശ്യമായ മൂലധനം കണ്ടെത്തുന്നതിനായി മുനിസിപ്പൽ ബോണ്ടുകൾ (Municipal Bonds) പുറത്തിറക്കാനും തിരുവനന്തപുരം കോർപ്പറേഷൻ ആലോചിക്കുന്നുണ്ട്. രാജ്യത്ത് മുനിസിപ്പൽ ബോണ്ടുകളിലൂടെ വിജയകരമായി ഫണ്ട് സമാഹരിച്ച അഹമ്മദാബാദ് കോർപ്പറേഷന്റെ അനുഭവസമ്പത്ത് ഇതിനായി പ്രയോജനപ്പെടുത്തും. നഗരവികസനവുമായി ബന്ധപ്പെട്ട നൂതന സാങ്കേതികവിദ്യകളും ഭരണനിർവഹണ രീതികളും ഇരു നഗരസഭകളും പരസ്പരം കൈമാറും. കേന്ദ്രസർക്കാരിന്റെ വിവിധ അർബൻ ഡെവലപ്‌മെന്റ് പദ്ധതികളും ഫണ്ടുകളും തിരുവനന്തപുരത്തേക്ക് ആകർഷിക്കാനും അഹമ്മദാബാദുമായുള്ള ഈ സഹകരണം വഴിയൊരുക്കുമെന്നാണ് കോർപ്പറേഷൻ അധികൃതരുടെ പ്രതീക്ഷ.
