ഇസ്രായേലിൽ അധികാരം നഷ്ടപ്പെടുന്നതിന്റെ വക്കിൽ നിൽക്കുന്ന കാവൽ പ്രധാനമന്ത്രി ബെഞ്ചമിൻ നെതന്യാഹു ഇറാനെതിരെ പുതിയ സൈനികനീക്കത്തിന് കോപ്പുകൂട്ടുന്നതിനിടെ, ഇസ്രായേൽ ചാരസംഘടനയായ മൊസാദിന്റെ മേധാവി റോമൻ ഗോഫ്മാൻ അടിയന്തരമായി അമേരിക്കയിലെത്തി. ഒക്ടോബർ 27-ന് നടന്ന തിരഞ്ഞെടുപ്പിൽ ഭൂരിപക്ഷം നഷ്ടപ്പെട്ടതോടെ കാവൽ പ്രധാനമന്ത്രിയായി തുടരുന്ന നെതന്യാഹു, രാഷ്ട്രീയ നേട്ടത്തിനായി ഇറാനെതിരെ വീണ്ടും യുദ്ധത്തിന് ശ്രമിക്കുന്നുവെന്ന ആശങ്ക ശക്തമാകുന്നതിനിടെയാണ് മൊസാദ് തലവന്റെ രഹസ്യ സന്ദർശനം. അതേസമയം, ഇസ്രായേലിൽ പുതിയ സർക്കാർ രൂപവത്കരണത്തിന് ചുക്കാൻ പിടിക്കുന്ന യാഷാർ പാർട്ടി നേതാവും മുൻ സൈനിക മേധാവിയുമായ ഗാഡി ഐസൻകോട്ട്, നെതന്യാഹുവിന്റെ യുദ്ധനീക്കങ്ങൾ തടയാനുള്ള ശക്തമായ പ്രതിരോധം തീർക്കുകയാണ്.
വാഷിങ്ടണിലെത്തിയ മൊസാദ് മേധാവി റോമൻ ഗോഫ്മാൻ അമേരിക്കൻ ചാരസംഘടനയായ സി.ഐ.എയുടെ (CIA) ഡയറക്ടർ ജോൺ റാറ്റ്ക്ലിഫുമായും മറ്റ് മുതിർന്ന ഉദ്യോഗസ്ഥരുമായും ഇറാൻ യുദ്ധസാഹചര്യങ്ങളെക്കുറിച്ച് നിർണ്ണായക ചർച്ചകൾ നടത്തി. അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോയുമായി കൂടിക്കാഴ്ച നടത്തുന്ന ഗോഫ്മാൻ, ഡൊണാൾഡ് ട്രംപിന്റെ പ്രത്യേക പ്രതിനിധി സ്റ്റീവ് വിറ്റ്കോഫുമായി ചർച്ച നടത്തുന്നതിനായി മയാമിയിലേക്ക് പോകുമെന്നും അന്താരാഷ്ട്ര മാധ്യമമായ ‘ആക്സിയോസ്’ (Axios) റിപ്പോർട്ട് ചെയ്തു. ഇറാനെതിരെ സൈനിക നടപടി പുനരാരംഭിക്കാൻ ട്രംപ് ഭരണകൂടത്തിന് മേൽ സമ്മർദ്ദം ചെലുത്തുകയാണ് ഈ സന്ദർശനത്തിന്റെ പ്രധാന ലക്ഷ്യം.
കഴിഞ്ഞ ദിവസം നെതന്യാഹുവും സൈനിക സെക്രട്ടറി ഗൈ മാർക്കിസാനോയും ഗാഡി ഐസൻകോട്ടുമായി രണ്ട് മണിക്കൂറോളം നീണ്ട ചർച്ച നടത്തിയിരുന്നു. എന്നാൽ, ഈ യോഗം നടക്കുമ്പോഴും മൊസാദ് തലവൻ അമേരിക്കയിലേക്ക് പോയ വിവരം നെതന്യാഹു ഐസൻകോട്ടിൽ നിന്ന് മനഃപൂർവ്വം മറച്ചുവെക്കുകയായിരുന്നുവെന്ന് ഇസ്രായേലി മാധ്യമങ്ങൾ റിപ്പോർട്ട് ചെയ്യുന്നു. സർക്കാർ രൂപവത്കരണ ചർച്ചകൾ അട്ടിമറിക്കാനും അധികാരത്തിൽ കടിച്ചുതൂങ്ങാനും വേണ്ടിയാണ് നെതന്യാഹു ഇറാനെ പ്രകോപിപ്പിക്കാൻ ശ്രമിക്കുന്നതെന്ന് പ്രതിപക്ഷ നേതാക്കൾ ആരോപിക്കുന്നു.
പുതിയ സർക്കാർ അധികാരമേൽക്കുന്നതുവരെ ഇത്തരം ഏകപക്ഷീയമായ സൈനിക നീക്കങ്ങളിൽ നിന്ന് കാവൽ സർക്കാർ പിന്മാറണമെന്ന് ഐസൻകോട്ട് കർശനമായി ആവശ്യപ്പെട്ടു. രാജ്യത്തിന്റെ സുരക്ഷാ ഏജൻസി മേധാവികളെ ഭരണഘടനാ പ്രതിസന്ധിയിലാക്കരുതെന്ന് ചൂണ്ടിക്കാട്ടി അദ്ദേഹം നെതന്യാഹുവിന് കത്തയക്കുകയും ചെയ്തു. ദേശീയ സുരക്ഷയെ രാഷ്ട്രീയ ലാഭത്തിനായി ഉപയോഗിക്കാൻ അനുവദിക്കില്ലെന്നും, കാവൽ സർക്കാരിന്റെ നീക്കങ്ങൾക്ക് മേൽ കർശന നിരീക്ഷണമുണ്ടാകുമെന്നും ഐസൻകോട്ട് വ്യക്തമാക്കി. എന്നാൽ, ഐസൻകോട്ടിന്റെ കത്ത് ദേശീയ സുരക്ഷാവിഷയങ്ങളെ രാഷ്ട്രീയവത്കരിക്കാനുള്ള നീക്കമാണെന്നാണ് നെതന്യാഹുവിന്റെ മറുപടി.
അതേസമയം, നെതന്യാഹുവിന്റെ ഈ യുദ്ധനീക്കങ്ങൾക്ക് ഇസ്രായേൽ സൈനിക നേതൃത്വത്തിനുള്ളിൽ നിന്നുതന്നെ കടുത്ത എതിർപ്പ് നേരിടുന്നുണ്ട്. നിലവിലെ സാഹചര്യത്തിൽ ഇറാനെതിരെ അടിയന്തര ആക്രമണം നടത്തുന്നത് പുതിയ സർക്കാർ രൂപീകരണത്തെ ബാധിക്കുമെന്ന നിലപാടിലാണ് ഐ.ഡി.എഫ് (IDF) മേധാവി ഇയാൽ സമീർ. ഇതിനെച്ചൊല്ലി നെതന്യാഹുവും സൈനിക മേധാവിയും തമ്മിൽ രൂക്ഷമായ ഭിന്നത നിലനിൽക്കുന്നതായും, മറ്റൊരു പശ്ചിമേഷ്യൻ യുദ്ധത്തിലേക്ക് എടുത്തുചാടാൻ ഡൊണാൾഡ് ട്രംപിനും താൽപ്പര്യമില്ലെന്നുമാണ് പുറത്തുവരുന്ന റിപ്പോർട്ടുകൾ.
