അന്താരാഷ്ട്ര ക്രിക്കറ്റ് കൗൺസിലിന്റെ (ഐ.സി.സി) ചെയർമാനായി ജയ് ഷാ രണ്ടാം തവണയും എതിരില്ലാതെ തിരഞ്ഞെടുക്കപ്പെട്ടു. ഇന്തോനേഷ്യയിലെ ബാലിയിൽ നടന്ന ഐ.സി.സി ബോർഡ് യോഗത്തിലാണ് രണ്ട് വർഷത്തെ പുതിയ കാലാവധിയിലേക്ക് ജയ് ഷായെ വീണ്ടും നിയമിക്കാൻ തീരുമാനമായത്. ഐ.സി.സി ഡയറക്ടർമാരുടെ ഏകകണ്ഠമായ നിർദ്ദേശത്തെത്തുടർന്നാണ് ഈ പുനർനിയമനം. അന്താരാഷ്ട്ര ക്രിക്കറ്റ് വലിയ മാറ്റങ്ങളിലൂടെയും അവസരങ്ങളിലൂടെയും കടന്നുപോകുന്ന ഈ നിർണ്ണായക ഘട്ടത്തിൽ ജയ് ഷായുടെ തുടർച്ചയായ നേതൃത്വം ഏറെ അനിവാര്യമാണെന്ന് ഐ.സി.സി ബോർഡ് അംഗങ്ങൾ അഭിപ്രായപ്പെട്ടു.
തന്നിൽ അർപ്പിച്ച വിശ്വാസത്തിനും പിന്തുണയ്ക്കും ഐ.സി.സി ബോർഡിനോടും എല്ലാ ഡയറക്ടർമാരോടും ജയ് ഷാ നന്ദി അറിയിച്ചു. ഐ.സി.സി ചെയർമാനായി സേവനമനുഷ്ഠിക്കുന്നത് വലിയൊരു ബഹുമതിയും ഉത്തരവാദിത്തവുമാണെന്നും ലോകമെമ്പാടും ക്രിക്കറ്റിന്റെ വളർച്ചയ്ക്കായി അംഗരാജ്യങ്ങളുമായി ചേർന്ന് പ്രവർത്തിക്കുന്നത് തുടരുമെന്നും അദ്ദേഹം പറഞ്ഞു. 2028-ലെ ഒളിമ്പിക്സിലേക്ക് ക്രിക്കറ്റ് തിരിച്ചെത്തുന്നത് കായികരംഗത്തിന്റെ വളർച്ചയിലെ പ്രധാന നാഴികക്കല്ലാണെന്നും, ലക്ഷ്യങ്ങൾ പ്രാവർത്തികമാക്കി വരും തലമുറയ്ക്കായി മികച്ചൊരു പാരമ്പര്യം സൃഷ്ടിക്കുന്നതിലായിരിക്കും തന്റെ ശ്രദ്ധയെന്നും അദ്ദേഹം വ്യക്തമാക്കി.
2024-ൽ ഗ്രെഗ് ബാർക്ലേയുടെ പിൻഗാമിയായാണ് 38-കാരനായ ജയ് ഷാ ആദ്യമായി എതിരില്ലാതെ ഐ.സി.സി ചെയർമാനായി തിരഞ്ഞെടുക്കപ്പെട്ടത്. ഐ.സി.സിയുടെ ചരിത്രത്തിലെ ഏറ്റവും പ്രായം കുറഞ്ഞ ചെയർമാനായ ഇദ്ദേഹം, ജഗ്മോഹൻ ഡാൽമിയ, ശരദ് പവാർ, എൻ. ശ്രീനിവാസൻ, ശശാങ്ക് മനോഹർ എന്നിവർക്ക് ശേഷം ഈ പദവിയിലെത്തുന്ന അഞ്ചാമത്തെ ഇന്ത്യക്കാരനാണ്. നേരത്തെ ബി.സി.സി.ഐ സെക്രട്ടറിയായും ഏഷ്യൻ ക്രിക്കറ്റ് കൗൺസിൽ (എ.സി.സി) അധ്യക്ഷനായും പ്രവർത്തിച്ച ജയ് ഷാ, വനിതാ പ്രീമിയർ ലീഗ് (ഡബ്ല്യു.പി.എൽ) ആരംഭിക്കുന്നതിലും റെക്കോർഡ് തുകയ്ക്കുള്ള ഐ.പി.എൽ സംപ്രേക്ഷണ അവകാശ കരാർ യാഥാർത്ഥ്യമാക്കുന്നതിലും നിർണ്ണായക പങ്കുവഹിച്ചിരുന്നു.












