അന്തരിച്ച മുതിർന്ന സി.പി.എം നേതാവ് കോടിയേരി ബാലകൃഷ്ണന്റെ ഭാര്യാസഹോദരനും തലശ്ശേരി മുൻ എം.എൽ.എ എം.വി. രാജഗോപാലൻ മാസ്റ്ററുടെ മകനുമായ എസ്.ആർ. വിനയകുമാർ സി.പി.എമ്മുമായുള്ള ബന്ധം ഉപേക്ഷിക്കുന്നു. തിരുവനന്തപുരത്തെ കേശവദാസപുരം ബ്രാഞ്ച് കമ്മിറ്റി അംഗമായിരുന്ന അദ്ദേഹം ഇത്തവണ പാർട്ടി അംഗത്വം പുതുക്കാൻ തയ്യാറായില്ലെന്ന് മാതൃഭൂമി റിപ്പോർട്ട് ചെയ്യുന്നു. പാർട്ടിയിൽ ‘പിണറായിസം’ മാത്രമാണ് നിലനിൽക്കുന്നതെന്നും, കമ്മ്യൂണിസ്റ്റ് മൂല്യങ്ങൾ നഷ്ടപ്പെടുത്തി മുന്നോട്ടുപോകുന്ന പ്രസ്ഥാനത്തിൽ ഇനി തുടരുന്നതിൽ അർത്ഥമില്ലെന്നും വിനയകുമാർ ആരോപിച്ചതായി റിപ്പോർട്ടിൽ പറയുന്നു.
‘പിണറായി വിജയൻ എന്നാൽ സി.പി.എം എന്നും സി.പി.എം എന്നാൽ പിണറായി വിജയൻ എന്നുമാണ് സംസ്ഥാന സെക്രട്ടറി എം.വി. ഗോവിന്ദൻ പറയുന്നതെന്നും, പാർട്ടിയിൽ കമ്മ്യൂണിസ്റ്റ് ആശയങ്ങൾക്കൊന്നും ഒരു സ്ഥാനവുമില്ല’ എന്നും വിനയകുമാർ വിമർശിച്ചതായി മാതൃഭൂമി വാർത്തയിൽ വ്യക്തമാക്കുന്നു. പാർട്ടിയിൽ മുൻപൊരിക്കലും കേട്ടുകേൾവിയില്ലാത്ത കാര്യങ്ങളാണ് ഇപ്പോൾ നടക്കുന്നതെന്നും അദ്ദേഹം കുറ്റപ്പെടുത്തി.
കുറേക്കാലമായി പാർട്ടിയിൽ ക്രിയാത്മകമായ മറ്റ് പ്രവർത്തനങ്ങളൊന്നും നടക്കുന്നില്ലെന്നും, മുഖ്യമന്ത്രി പിണറായി വിജയന്റെ കുടുംബവുമായി ബന്ധപ്പെട്ട് ചുറ്റിത്തിരിയുന്ന കേസുകളും അതിന് പ്രതിരോധം തീർക്കലും മാത്രമാണ് നടക്കുന്നതെന്നും വിനയകുമാർ ആരോപിച്ചതായി റിപ്പോർട്ടിലുണ്ട്. കോടിയേരി ബാലകൃഷ്ണന്റെ അടുത്ത ബന്ധുവും ആദ്യകാല കമ്മ്യൂണിസ്റ്റ് നേതാവിന്റെ മകനുമായ ഒരാൾ തന്നെ പാർട്ടി നേതൃത്വത്തിനെതിരെ പരസ്യ വിമർശനമുന്നയിച്ച് അംഗത്വം ഉപേക്ഷിക്കുന്നത് രാഷ്ട്രീയ കേന്ദ്രങ്ങളിൽ വലിയ ചർച്ചകൾക്ക് വഴിവെച്ചിട്ടുണ്ട്.












