തിരുവനന്തപുരം: മാനവീയം വീഥിയുമായി ബന്ധപ്പെട്ട് കഴിഞ്ഞ ദിവസങ്ങളിൽ ഉയർന്നുവന്ന പ്രതിഷേധങ്ങളും വാർത്തകളും തികച്ചും അടിസ്ഥാനരഹിതമാണെന്ന് തിരുവനന്തപുരം മേയർ വി.വി. രാജേഷ് വ്യക്തമാക്കി. കലാകാരന്മാരെ തടയുന്നു എന്ന തരത്തിൽ തെറ്റിദ്ധാരണ പരത്താനാണ് ചിലർ ശ്രമിക്കുന്നതെന്നും, പാളയം മാർക്കറ്റ് പോലെ മാനവീയം വീഥിയെയും സ്വകാര്യ സ്വത്താക്കി മാറ്റാനുള്ള നീക്കമാണ് കോർപ്പറേഷൻ മുളയിലേ നുള്ളിയതെന്നും അദ്ദേഹം ഫേസ്ബുക്ക് കുറിപ്പിലൂടെ അറിയിച്ചു.
നവംബർ 14-ന് ഏതെങ്കിലും കലാകാരന്റെ പരിപാടി അവതരിപ്പിക്കുന്നതിനായി മാനവീയം വീഥിയിൽ ആരും അപേക്ഷ നൽകിയിട്ടില്ലെന്നും അത്തരമൊരു അപേക്ഷ നിരസിച്ചിട്ടില്ലെന്നും മേയർ വ്യക്തമാക്കി. പാട്ടുപാടാനോ മറ്റ് കലാപരിപാടികൾക്കോ നിശ്ചിത ഫീസ് ഈടാക്കി അനുമതി നൽകുന്നതാണ് കോർപ്പറേഷന്റെ രീതി. എന്നാൽ, ‘മാനവീയം വീഥിയുടെ രജതജൂബിലി ആഘോഷ സമിതി’ എന്ന പേരിലാണ് നവംബർ 14-ന് കോർപ്പറേഷനിൽ ഓൺലൈനായി അപേക്ഷ ലഭിച്ചത്. ഇത്തരത്തിൽ ഒരു സമിതി രൂപീകരിച്ചതായോ കൗൺസിൽ പ്രമേയം പാസാക്കി അംഗീകരിച്ചതായോ ഉള്ള യാതൊരു രേഖയും കോർപ്പറേഷനിലില്ലെന്ന് അദ്ദേഹം ചൂണ്ടിക്കാട്ടി.
സംസ്ഥാന സർക്കാരിന്റെ ഉടമസ്ഥതയിലുള്ളതും കോർപ്പറേഷന് നിയന്ത്രണാവകാശമുള്ളതുമായ മാനവീയം വീഥിയുടെ രജതജൂബിലി ആഘോഷിക്കുമ്പോൾ സർക്കാരിന്റെയോ കോർപ്പറേഷന്റെയോ പ്രതിനിധികൾ സമിതിയിൽ ഉണ്ടാകേണ്ടതാണ്. കഴിഞ്ഞ 11 മാസമായി മേയറായി പ്രവർത്തിക്കുന്ന തന്നെ നാളിതുവരെ ഇങ്ങനെയൊരു സമിതി ബന്ധപ്പെട്ടിട്ടില്ല. നവംബർ 3-ന് സമർപ്പിച്ച അപേക്ഷയിൽ എവിടെയും കലാകാരന്മാരുടെ പരിപാടി അവതരിപ്പിക്കാൻ അനുമതി ചോദിച്ചിട്ടില്ലെന്നും, കൃത്യമായ കാരണങ്ങളുള്ളതുകൊണ്ടാണ് ആ അപേക്ഷ നിരസിച്ചതെന്നും മേയർ വിശദീകരിച്ചു.
അദൃശ്യമായ ഒരു കൂട്ടായ്മയ്ക്ക് രജതജൂബിലി ആഘോഷിക്കാൻ അനുമതി നൽകാനാവില്ല. മാധ്യമങ്ങളെയും കലാകാരന്മാരെയും തെറ്റിദ്ധരിപ്പിച്ച് വാർത്ത സൃഷ്ടിക്കുന്നവരുടെ ലക്ഷ്യം മാനവീയം വീഥി കൈയടക്കുക എന്നതാണെന്നും, അത് ഒരുകാരണവശാലും നടക്കില്ലെന്നും മേയർ വ്യക്തമാക്കി.












