ന്യൂഡൽഹി: ഇന്ത്യ-നേപ്പാൾ ഉഭയകക്ഷി ബന്ധത്തിന് പുതിയ ഊർജ്ജം പകർന്നുകൊണ്ട് നേപ്പാൾ പ്രധാനമന്ത്രി ബാലേന്ദ്ര ഷാ (ബാലെൻ ഷാ) നവംബർ 22, 23 തീയതികളിൽ ഇന്ത്യയിൽ ഔദ്യോഗിക സന്ദർശനം നടത്തും. പ്രധാനമന്ത്രി നരേന്ദ്ര മോദിയുടെ പ്രത്യേക ക്ഷണപ്രകാരമാണ് സന്ദർശനം. പ്രധാനമന്ത്രി പദത്തിലെത്തിയ ശേഷമുള്ള അദ്ദേഹത്തിന്റെ ആദ്യ വിദേശ സന്ദർശനങ്ങളിൽ ഒന്നാണിത്.
കാഠ്മണ്ഡുവിൽ നിന്ന് 34 അംഗ ഉന്നതതല പ്രതിനിധി സംഘത്തോടൊപ്പമാണ് അദ്ദേഹം ന്യൂഡൽഹിയിലെത്തുന്നതെന്ന് നേപ്പാൾ വിദേശകാര്യ സെക്രട്ടറി അമൃത് ബഹാദൂർ റായ് അറിയിച്ചു.
നവംബർ 23 തിങ്കളാഴ്ച ഇരു പ്രധാനമന്ത്രിമാരും പ്രതിനിധിതല ചർച്ചകൾ നടത്തും. ഊർജ്ജം, വ്യാപാരം, സാമ്പത്തിക ചർച്ചകൾക്ക് ശേഷം ഇരുനേതാക്കളും ചേർന്ന് നിരവധി ഊർജ്ജ പദ്ധതികൾ സംയുക്തമായി ഉദ്ഘാടനം ചെയ്യും. വിവിധ മേഖലകളിലെ സഹകരണം ഉറപ്പാക്കുന്ന സുപ്രധാന കരാറുകളിൽ ഒപ്പുവെക്കുകയും ചെയ്യും. തുടർന്ന് സംയുക്ത വാർത്താസമ്മേളനത്തെ അഭിസംബോധന ചെയ്യുന്ന ഇരുനേതാക്കളും പ്രധാനമന്ത്രി മോദി ഒരുക്കുന്ന ഉച്ചവിരുന്നിലും പങ്കെടുക്കും.
രാഷ്ട്രപതി ദ്രൗപദി മുർമുവിനെ സന്ദർശിക്കുന്ന ബാലേന്ദ്ര ഷാ രാജ്ഘട്ടിലെത്തി മഹാത്മാഗാന്ധിക്ക് ആദരാഞ്ജലികൾ അർപ്പിക്കും. ഇരുരാജ്യങ്ങളും തമ്മിലുള്ള വാണിജ്യ നിക്ഷേപ സാധ്യതകൾ ചർച്ച ചെയ്യുന്ന നേപ്പാൾ-ഇന്ത്യ ബിസിനസ് ഫോറത്തിലും അദ്ദേഹം മുഖ്യാതിഥിയാകും.
സന്ദർശനത്തിന്റെ അജണ്ടകൾക്ക് അന്തിമരൂപം നൽകുന്നതിനായി നേപ്പാളിലെ പുതിയ ഇന്ത്യൻ അംബാസഡർ സുധാകർ ദലേല ബുധനാഴ്ച ബാലേന്ദ്ര ഷായുമായി കൂടിക്കാഴ്ച നടത്തിയിരുന്നു. പ്രധാനമന്ത്രി നരേന്ദ്ര മോദിയുടെ ആശംസകൾ കൈമാറിയ അംബാസഡർ, സന്ദർശനത്തിന്റെ ഒരുക്കങ്ങൾ വിശദീകരിച്ചു.
നേപ്പാളിലെ രസുവ-ഭോടെകോശി മേഖലയിലുണ്ടായ പ്രളയദുരന്തത്തിൽ ഇന്ത്യ നൽകിയ അടിയന്തര സഹായങ്ങൾക്ക് ബാലേന്ദ്ര ഷാ നന്ദി അറിയിച്ചു. 1,751 കിലോമീറ്റർ തുറന്ന അതിർത്തി പങ്കിടുന്ന ഇരുരാജ്യങ്ങളും തമ്മിലുള്ള ചരിത്രപരവും സാമ്പത്തികവുമായ ബന്ധം കൂടുതൽ ശക്തിപ്പെടുത്താൻ ഈ സന്ദർശനം വഴിയൊരുക്കും.










