ഇന്ത്യൻ ക്രിക്കറ്റ് താരം യുസ്വേന്ദ്ര ചഹൽ ഭാരതീയ ജനതാ പാർട്ടിയിൽ (ബി.ജെ.പി) ചേരുകയും പാർട്ടിയുടെ പുനഃസംഘടിപ്പിച്ച ഒ.ബി.സി മോർച്ച ദേശീയ നിർവ്വാഹക സമിതിയിൽ പ്രത്യേക ക്ഷണിതാവായി നിയമിതനാകുകയും ചെയ്തു. ശനിയാഴ്ച ബി.ജെ.പി ദേശീയ അധ്യക്ഷൻ നിതിൻ നബിൻ പുറത്തിറക്കിയ ഭാരവാഹികളുടെ പുതിയ പട്ടികയിലാണ് ചഹലിനെ ഉൾപ്പെടുത്തിയിരിക്കുന്നത്. പാർട്ടിയിൽ അംഗത്വമെടുത്തതിന് പിന്നാലെ തന്നെ ബി.ജെ.പി കുടുംബത്തിലേക്ക് സ്വാഗതം ചെയ്ത പ്രധാനമന്ത്രി നരേന്ദ്ര മോദിക്കും മറ്റ് മുതിർന്ന നേതാക്കൾക്കും ചഹൽ നന്ദി അറിയിച്ചു.
പാർട്ടി പ്രവേശനത്തിന് മുന്നോടിയായി ബി.ജെ.പി ഒ.ബി.സി മോർച്ച ദേശീയ അധ്യക്ഷൻ അമർപാൽ മൗര്യയുമായി ചഹൽ കൂടിക്കാഴ്ച നടത്തിയിരുന്നു. രാജ്യത്തെ പിന്നാക്ക വിഭാഗങ്ങൾക്കിടയിൽ പാർട്ടിയുടെ സ്വാധീനം ശക്തിപ്പെടുത്തുന്നതിന്റെ ഭാഗമായാണ് ഒ.ബി.സി മോർച്ചയിൽ പുതിയ നിയമനങ്ങൾ നടത്തിയതെന്ന് പാർട്ടി വൃത്തങ്ങളെ ഉദ്ധരിച്ച് റിപ്പോർട്ടുകൾ വ്യക്തമാക്കുന്നു.
ഹരിയാന സ്വദേശിയായ ഈ ലെഗ് സ്പിന്നറുടെ കടന്നുവരവ് യുവാക്കൾക്കും കായികപ്രേമികൾക്കുമിടയിൽ പാർട്ടിക്ക് കൂടുതൽ സ്വീകാര്യത നൽകുമെന്നാണ് നേതൃത്വത്തിന്റെ വിലയിരുത്തൽ.
അന്താരാഷ്ട്ര ക്രിക്കറ്റിൽ ഇന്ത്യക്കായി നിരവധി മത്സരങ്ങളിൽ തിളങ്ങിയിട്ടുള്ള ചഹൽ, ക്രിക്കറ്റ് കരിയറിനൊപ്പമാണ് ഇപ്പോൾ പുതിയ രാഷ്ട്രീയ ഇന്നിംഗ്സിന് തുടക്കം കുറിച്ചിരിക്കുന്നത്. കായിക രംഗത്ത് നിന്ന് പൊതുപ്രവർത്തനത്തിലേക്ക് കടന്നുവരുന്ന പ്രമുഖ താരങ്ങളുടെ പട്ടികയിലേക്കാണ് ചഹലും എത്തിച്ചേർന്നിരിക്കുന്നത്. വരും ദിവസങ്ങളിൽ പാർട്ടിയുടെ സംഘടനാ പ്രവർത്തനങ്ങളിലും പ്രചാരണ പരിപാടികളിലും താരം സജീവമായി പങ്കെടുക്കുമെന്ന് ബി.ജെ.പി വൃത്തങ്ങൾ അറിയിച്ചു.









