ശ്രീനഗർ : കശ്മീരി പണ്ഡിറ്റുകൾക്ക് സർക്കാർ ജോലി ഉറപ്പാക്കുന്നതിനായി പ്രധാനമന്ത്രി ആവിഷ്‌കരിച്ച പദ്ധതിയിലേക്ക് ഒഴുകിയത് പതിനായിരക്കണക്കിന് അപേക്ഷകൾ. പദ്ധതിയ്ക്ക് കീഴിൽ 30,000 ത്തോളം കശ്മീരി പണ്ഡിറ്റുകളാണ് ജോലി ആവശ്യപ്പെട്ട് അപേക്ഷ നൽകിയിരിക്കുന്നത്. അപേക്ഷ ക്ഷണിച്ച് ദിവസങ്ങൾക്കുള്ളിലാണ് ഇത്രയധികം അപേക്ഷകൾ ലഭിച്ചതെന്ന് അധികൃതർ പറയുന്നു.
ഏപ്രിൽ അവസാനത്തോടെ അർഹരായവരെ കണ്ടെത്താനുള്ള നടപടികൾ പൂർത്തിയാക്കി അന്തിമ പട്ടിക പ്രസിദ്ധീകരിക്കും. അപേക്ഷകരിൽ ജോലിക്കർഹരായവരെ കണ്ടെത്തുന്നതിനായി അധികൃതർ നടപടികൾ ആരംഭിച്ചു.2015 ലാണ് കശ്മീരി പണ്ഡിറ്റുകൾക്ക് സർക്കാർ ജോലി നൽകുന്നതിനായി കശ്മീരി പണ്ഡിറ്റുകൾക്കായുള്ള തൊഴിൽ പാക്കേജിന് കേന്ദ്ര സർക്കാർ തുടക്കം കുറിച്ചത്.
പാക്കേജ് പ്രകാരം സർക്കാർ മേഖലയിൽ ഒഴിവുള്ള 6,000 തസ്തികകളിലേക്കാണ് പ്രവേശനം. ഇതിൽ 3841 ഒഴിവുകളിലേക്കുള്ള ഉദ്യോഗാർത്ഥികൾക്ക് സർക്കാർ നിയമനം നൽകി. ബാക്കിയുള്ള 2000 ത്തോളം ഒഴിവുകളിലേക്കാണ് സർക്കാർ വീണ്ടും അപേക്ഷ ക്ഷണിച്ചത്.
Discussion about this post