വിജയദശമി ആശംസാ കാർഡിൽ ഇന്ത്യൻ ഭൂപ്രദേശങ്ങൾ കൂട്ടിച്ചേർക്കാത്ത നേപ്പാളിന്റെ പഴയ ഭൂപടം ഉപയോഗിച്ച് പ്രധാനമന്ത്രി കെ.പി ശർമ ഒലി. ഇന്ത്യയുമായുള്ള അതിർത്തി തർക്കം രൂക്ഷമായ സമയത്ത് ഇന്ത്യയുടെ ഉത്തരാഖണ്ഡ് ഉൾപ്പെടെയുള്ള സംസ്ഥാനങ്ങളുൾപ്പെടുത്തി മാസങ്ങൾക്കു മുമ്പ് നേപ്പാൾ പുതിയ ഭൂപടം അവതരിപ്പിച്ചിരുന്നു. എന്നാലിപ്പോൾ ആശംസാ കാർഡിൽ ഇന്ത്യൻ ഭൂപ്രദേശങ്ങൾ കൂട്ടിച്ചേർക്കാത്ത നേപ്പാളിന്റെ പഴയ ഭൂപടമുപയോഗിച്ചത് ഇന്ത്യയുമായുള്ള ബന്ധം മെച്ചപ്പെടുത്താനുള്ള ശ്രമത്തിന്റെ ഭാഗമായാണെന്നാണ് സൂചനകൾ.
അതേസമയം, ആശംസാകാർഡിൽ ഉപയോഗിച്ചിരിക്കുന്നത് പുതിയ ഭൂപടമാണെന്നും കാർഡിനു വലിപ്പം കുറവായതിനാലാണ് പുതിയതായി ഉൾപ്പെടുത്തിയ പ്രദേശങ്ങൾ കാണാൻ സാധിക്കാത്തതെന്നും വിശദമാക്കി നേപ്പാൾ പ്രധാനമന്ത്രിയുടെ മാധ്യമ ഉപദേഷ്ടാവായ സൂര്യ താപ്പ രംഗത്തുവന്നിട്ടുണ്ട്. കഴിഞ്ഞ മാസം, പുതിയ ഭൂപടമുൾപ്പെടുത്തിയ സ്കൂൾ പാഠപുസ്തകങ്ങൾ കെ.പി ശർമ ഒലി പിൻവലിച്ചിരുന്നു.
ചൈന അനധികൃതമായി നേപ്പാളിലെ അതിർത്തി പ്രദേശങ്ങൾ കയ്യേറിക്കൊണ്ടിരിക്കുന്ന സാഹചര്യത്തിലാണ് നേപ്പാളിന്റെ ഈ പുതിയ നീക്കമെന്നത് ശ്രദ്ധേയമാണ്. അടുത്ത മാസം ഇന്ത്യൻ സൈനിക മേധാവി എം. എം നരവനെ നേപ്പാൾ സന്ദർശിക്കുമെന്നാണ് ലഭ്യമായ വിവരങ്ങൾ.
