മഹാദേവ് ഓൺലൈൻ ബെറ്റിങ് ആപ്പിന്റെ സഹസ്ഥാപകനും പ്രധാന പ്രമോട്ടറുമായ രവി ഉപ്പാലിനെ ദുബായിൽ അധികൃതർ കസ്റ്റഡിയിലെടുത്തു. ഇയാളെ ഇന്ത്യയിലെത്തിക്കാനുള്ള നടപടികൾ കേന്ദ്ര അന്വേഷണ ഏജൻസികളായ എൻഫോഴ്‌സ്‌മെന്റ് ഡയറക്ടറേറ്റും (ED) സെൻട്രൽ ബ്യൂറോ ഓഫ് ഇൻവെസ്റ്റിഗേഷനും (CBI) ആരംഭിച്ചു. ഇന്ത്യയുടെ ആവശ്യപ്രകാരം പുറപ്പെടുവിച്ച ഇന്റർപോൾ റെഡ് നോട്ടീസിന്റെ അടിസ്ഥാനത്തിലാണ് ദുബായ് അധികൃതർ ഉപ്പാലിനെ പിടികൂടിയത്. മറ്റൊരു പ്രധാന പ്രതിയായ സൗരഭ് ചന്ദ്രാകറെ കഴിഞ്ഞ ദിവസങ്ങളിൽ ഒമാനിൽ നിന്ന് സി.ബി.ഐ ഇന്ത്യയിലെത്തിച്ചതിന് തൊട്ടുപിന്നാലെയാണ് രവി ഉപ്പലും വിദേശത്ത് പിടിയിലാകുന്നത്.
46 വയസ്സുകാരനായ ഉപ്പാൽ ഛത്തീസ്ഗഢിലെ ഭിലായ് സ്വദേശിയാണ്. മഹാദേവ് ആപ്പിന്റെ മറ്റൊരു പ്രധാന പ്രമോട്ടറായ സൗരഭ് ചന്ദ്രാകറിനെ ഒമാനിൽ നിന്ന് ഇന്ത്യയിലെത്തിച്ചതിന് പിന്നാലെയാണ് ഈ നടപടി.
2019-ൽ ഇന്ത്യ വിട്ട ഉപ്പാൽ ദുബായ് കേന്ദ്രീകരിച്ചാണ് പ്രവർത്തിച്ചിരുന്നതെന്നാണ് അന്വേഷണ ഏജൻസികളുടെ കണ്ടെത്തൽ. 2023 ഒക്ടോബറിൽ ഇയാൾക്കെതിരെ ഇന്റർപോൾ റെഡ് നോട്ടീസ് പുറപ്പെടുവിച്ചിരുന്നു. ഇതിന്റെ അടിസ്ഥാനത്തിൽ 2023 ഡിസംബറിലും ദുബായിൽ കസ്റ്റഡിയിലെടുത്തിരുന്നു. എന്നാൽ 45 ദിവസത്തിനുള്ളിൽ മോചിതനായി. പിന്നീട് യുഎഇ വിട്ട് പസഫിക് ദ്വീപ് രാജ്യമായ വനുവാട്ടുവിൽ താമസിക്കുന്നതായും റിപ്പോർട്ടുകളുണ്ടായിരുന്നു. മഹാദേവ് ബെറ്റിങ് ശൃംഖലയുടെ സാമ്പത്തിക ഇടപാടുകൾ, ഹവാല പണമിടപാടുകൾ, ഇന്ത്യയിലെ ബെറ്റിങ് ഓപ്പറേറ്റർമാരുമായുള്ള ബന്ധങ്ങൾ എന്നിവ കൈകാര്യം ചെയ്തിരുന്നത് ഉപ്പാലാണെന്നാണ് ഇ.ഡിയുടെ കണ്ടെത്തൽ.
2019-20 കാലഘട്ടത്തിൽ പ്രവർത്തനം ആരംഭിച്ച മഹാദേവ് ഓൺലൈൻ ബുക്ക് എന്ന ബെറ്റിങ് ശൃംഖല രാജ്യത്തുടനീളം ആയിരക്കണക്കിന് പാനലുകൾ വഴി പ്രവർത്തിച്ചിരുന്നതായാണ് അന്വേഷണ ഏജൻസികളുടെ കണ്ടെത്തൽ. ക്രിക്കറ്റ്, ഫുട്ബോൾ, ടെന്നീസ് തുടങ്ങിയ കായിക മത്സരങ്ങൾക്കൊപ്പം വിവിധ കാർഡ് ഗെയിമുകളിലും ഓൺലൈൻ വാതുവെപ്പ് നടത്തിയിരുന്നു. വ്യാജ അക്കൗണ്ടുകൾ, ഹവാല ഇടപാടുകൾ, വിദേശത്തേക്കുള്ള പണമൊഴുക്ക് എന്നിവയിലൂടെ കോടിക്കണക്കിന് രൂപയുടെ നിയമവിരുദ്ധ വരുമാനം സൃഷ്ടിച്ചതായും ഇ.ഡി ആരോപിക്കുന്നു. 2026 ജൂലൈയിൽ കേന്ദ്ര അന്വേഷണ ഏജൻസിയായ സി.ബി.ഐ കേസുമായി ബന്ധപ്പെട്ട് കൂടുതൽ കുറ്റപത്രങ്ങൾ സമർപ്പിച്ചിരുന്നു. കേസിൽ 116 പ്രതികളെ ഉൾപ്പെടുത്തി ഇ.ഡി അന്വേഷണം തുടരുകയാണ്.
