പ്രധാനമന്ത്രി നരേന്ദ്ര മോദിക്കും കേന്ദ്ര ആഭ്യന്തരമന്ത്രി അമിത് ഷായ്ക്കുമെതിരെ രൂക്ഷമായ വ്യക്തിഗത അധിക്ഷേപങ്ങളും ആരോപണങ്ങളുമായി ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. പ്രധാനമന്ത്രി നരേന്ദ്ര മോദി രാജ്യത്തെ ഒറ്റുകൊടുക്കുന്ന ആളാണെന്നും അമേരിക്കൻ പ്രസിഡന്റ് ഡോണൾഡ് ട്രംപിന്റെ താളത്തിനനുസരിച്ചാണ് പ്രവർത്തിക്കുന്നതെന്നും രാഹുൽ ആരോപിച്ചു. പഞ്ചാബിലെ സിഖ് റാലിയെ അഭിസംബോധന ചെയ്ത് സംസാരിക്കവെയാണ് രാഹുൽ ഗാന്ധി കേന്ദ്ര സർക്കാരിനും പഞ്ചാബിൽ ഭരണത്തിലുള്ള ആം ആദ്മി പാർട്ടി (എ.എ.പി) ഭരണകൂടത്തിനുമെതിരെ അടിയന്തര രാഷ്ട്രീയ ആയുധങ്ങളുമായി രംഗത്തെത്തിയത്.
2029 ഡിസംബർ 31-ഓടെ പഞ്ചാബിനെയും രാജ്യത്തെയും ലഹരിമുക്തമാക്കുമെന്ന അമിത് ഷായുടെ പ്രഖ്യാപനത്തെ എടുത്തുപറഞ്ഞ രാഹുൽ, മൂന്ന് വർഷത്തിനുള്ളിൽ അമിത് ഷാ കേന്ദ്ര ആഭ്യന്തരമന്ത്രി സ്ഥാനത്തുണ്ടാകില്ലെന്നും മോദി സർക്കാർ ഒരു വർഷം പോലും തികച്ചു ഭരിക്കില്ലെന്നും പരിഹസിച്ചു. അമേരിക്കൻ പ്രസിഡന്റ് ഡോണൾഡ് ട്രംപിന്റെ താല്പര്യങ്ങൾ സംരക്ഷിക്കുന്ന മോദിയുമായി ഏതൊരു നിമിഷവും പരസ്യ സംവാദത്തിന് തയ്യാറാണെന്ന് താൻ വെല്ലുവിളിച്ചിട്ടും അദ്ദേഹം ഒളിച്ചോടുകയാണെന്ന് രാഹുൽ കുറ്റപ്പെടുത്തി.
2027-ൽ നടക്കാനിരിക്കുന്ന പഞ്ചാബ് നിയമസഭാ തിരഞ്ഞെടുപ്പിന് മുന്നോടിയായി കോൺഗ്രസ് സംഘടിപ്പിച്ച ‘ഇൻസാഫ് റാലി’യിലാണ് രാഹുൽ എ.എ.പിക്കും ബി.ജെ.പിക്കുമെതിരെ കടന്നാക്രമണം നടത്തിയത്. കൊല്ലപ്പെട്ട പ്രമുഖ പഞ്ചാബി ഗായകനും കോൺഗ്രസ് നേതാവുമായ സിദ്ധു മൂസ്‌വാലയുടെ പിതാവ് ബൽക്കൗർ സിംഗിനെ വേദിയിലേക്ക് ക്ഷണിച്ച രാഹുൽ, മൂസ്‌വാലയുടെ കൊലപാതകത്തിന് കാരണം പഞ്ചാബിലെ ക്രമസമാധാന തകർച്ചയാണെന്നും ആരോപിച്ചു. സംസ്ഥാനത്തെ ലഹരിമാഫിയയും ഗാങ്‌സ്റ്റർ സംസ്കാരവും തുടച്ചുനീക്കാൻ എ.എ.പി സർക്കാരിന് കഴിഞ്ഞിട്ടില്ലെന്നും പഞ്ചാബ് ഭരണം ദില്ലിയിൽ നിന്ന് കേജ്രിവാളും അമിത് ഷായും ചേർന്നാണ് നിയന്ത്രിക്കുന്നതെന്നും രാഹുൽ ആഞ്ഞടിച്ചു.
