ഇസ്ലാമാബാദ്: സ്വന്തമായി വികസിപ്പിച്ചെടുത്ത ദീർഘദൂര എയർ-ടു-എയർ മിസൈൽ ‘ഫാസ്’ (Fa’az) വിജയകരമായി പരീക്ഷിച്ചെന്ന അവകാശവാദവുമായി പാകിസ്ഥാൻ. പാകിസ്ഥാൻ വ്യോമസേനയുടെ (PAF) ശേഷി വർദ്ധിപ്പിക്കുമെന്നും പ്രതിരോധ രംഗത്ത് സ്വാശ്രയത്വം കൈവരിച്ചെന്നുമാണ് പാകിസ്ഥാൻ അവകാശപ്പെടുന്നത്. എന്നാൽ യഥാർത്ഥ വിവരങ്ങളോ സാങ്കേതിക വ്യക്തതയോ ഇല്ലാതെയുള്ള ഇത്തരം അവകാശവാദങ്ങൾ വെറും പൊള്ളയായ പ്രചാരണങ്ങൾ മാത്രമാണെന്നാണ് പ്രതിരോധ വിദഗ്ധർ ചൂണ്ടിക്കാണിക്കുന്നത്.
അത്യാധുനിക ടെർമിനൽ ഗൈഡൻസ് സംവിധാനമുണ്ടെന്നും അതിവേഗ ലക്ഷ്യങ്ങളെ തകർക്കുമെന്നും പാകിസ്ഥാൻ അവകാശപ്പെടുന്നുണ്ടെങ്കിലും, മിസൈലിന്റെ പ്രവർത്തന പരിധി (Operational Range), വേഗത, കൃത്യത തുടങ്ങിയ നിർണ്ണായക സാങ്കേതിക വിവരങ്ങളൊന്നും തന്നെ ഇസ്ലാമാബാദ് പുറത്തുവിട്ടിട്ടില്ല. യഥാർത്ഥ പരീക്ഷണ വിവരങ്ങൾ മറച്ചുവെച്ച് രാജ്യത്തിന്റെ പ്രതിച്ഛായ വർദ്ധിപ്പിക്കാനുള്ള രാഷ്ട്രീയ തന്ത്രം മാത്രമാണിതെന്ന് വിമർശകർ പറയുന്നു.
സ്വതന്ത്ര ഏജൻസികളുടെ പരിശോധനകളോ സ്ഥിരീകരണമോ ഇല്ലാത്തതിനാൽ ഈ മിസൈലിന്റെ യഥാർത്ഥ ശേഷി സംബന്ധിച്ച് വലിയ അന്താരാഷ്ട്ര സംശയങ്ങൾ നിലനിൽക്കുന്നുണ്ട്. ആയുധ നിർമ്മാണത്തിൽ വിദേശ രാജ്യങ്ങളെ വൻതോതിൽ ആശ്രയിക്കുന്ന പാകിസ്ഥാൻ ഇത്തരം അവകാശവാദങ്ങളിലൂടെ സ്വന്തം പരാജയങ്ങൾ മറച്ചുവെക്കാൻ ശ്രമിക്കുകയാണെന്നാണ് വിലയിരുത്തപ്പെടുന്നത്.
